كلتوور كورده‌وارى ئه‌رزانفرووش بوى!

شفق نيوز

كلتووریش یه‌كیگه‌ له‌نیشانه‌یل وه‌رده‌وامى و زینگى ئه‌و ملله‌ت و نه‌ته‌وه‌یله‌و جویر ناسنامه‌یگه‌ ئه‌ڕاى ك وه‌پى ناسریه‌ێد.

بیگومان ئمڕوو دونیاى ته‌كنۆلۆجى و تازه‌گه‌رى و پیشكه‌فتن وه‌رچه‌رخان بنه‌ڕه‌تى و چشته‌یل فره‌یگ له‌خاس وخراو هاورده‌ ناو كوومه‌ڵگایه‌یل ئنسانى، هه‌ر له‌وه‌ر ئه‌وه‌یش ئاده‌میزاد ئه‌مڕوو هه‌وڵ ئه‌وه‌ ده‌یگ له‌ژیر سایه‌ى ئه‌و ئاڵشتكاریه‌ هویچ چشتیگ له‌بان بنه‌ماى ره‌سه‌نایه‌تى خوه‌ى نه‌یلیگ و ده‌سكارى گشت چشتیگ بكاو له‌وانه‌یش له‌هویره‌وبردن و دویرگرتن له‌كلتوور كورده‌وراى باوگ وباپیره‌یل ك وه‌ل ڕه‌وكردن و كووچكردن جایه‌ڵ جوانه‌یل و تاكه‌یل كوردا ئه‌را ئۆرپاو وڵاته‌یل تر دونیا وه‌ سه‌به‌ب ماڵویرانى كوردو دایركارى و زوڵم و سته‌مكارى رژیم دكتاتۆر به‌عس و ترس له‌فه‌وتیان گرتن و كوشتن و گه‌ردین له‌شوون دراوردن تیكه‌ى نان ئه‌را خیزانه‌یلیان ئه‌رزانفرووش بوى و گرنگى یا ئه‌همیه‌ت خوه‌ى له‌ده‌سدا، یه‌یش له‌وه‌ختیگ فره‌یگ له‌ملله‌ته‌یل بان ئى گووشه‌ى زه‌ویه‌ سه‌رسام بوین وه‌كلتوور كوردو له‌وانه‌یش جنگه‌ جوانه‌گه‌ى ك ئیسه‌ چوین بیناز كه‌فت و بویه‌ قوربان جنگ باو ئۆرپى و مۆدێله‌یل ئه‌ڵڵاجه‌وى بیگانه‌و جایه‌ڵ جوانه‌یلمان شانازى وه‌پیه‌و كه‌ن و له‌ناو كوومه‌ڵگاى كورده‌وارى شوون تایبه‌تیگ ئه‌را خوه‌ى وه‌رگرت و ته‌نانه‌ت سیماو روخسار جنگ ژنانه‌ هویچ نیشانه‌یگ كوردایه‌تى و ره‌سه‌نایه‌تى وه‌پیه‌و نه‌مه‌ندگه‌.

دویاى ئه‌وه‌یش فره‌یگ له‌ره‌فتار و هه‌ڵسووكه‌فت تاك كوردیش چیه‌سه‌ قاڵب ره‌فتار مه‌ردم خوه‌رئاوایى و داب ونه‌ریت ره‌سه‌نایه‌تیمان له‌هس تاكه‌یل كورد ڕوى له‌ كزى و نه‌مه‌ندن كردگه‌، یه‌یش جى داخه‌ ك تاك كورد له‌جیاى ئه‌وه‌ك نه‌ف وه‌ربگریگ له‌رووشنهویرى و بته‌وكردن وه‌یه‌كه‌و گونجیان و جویر ئه‌وه‌ك وڵاته‌یل تر له‌سایه‌ى ژیان به‌خته‌وه‌ریگ به‌نه‌ سه‌ر، نوڕید ته‌نیا پشت وه‌ مه‌سه‌له‌ى مۆدێل و ریكخستن قژ و جوانكارى له‌بان ئه‌و كلتوور سه‌قه‌ت بیگانه‌ به‌سیه‌یگ ك بویه‌سه‌ خوینى فره‌یگ له‌ جایه‌ڵ جوانه‌یلمان و قاپى رووشنهویرى و خوه‌ندن و تاڕاده‌یگ كاركردنیش له‌لیان به‌ساگه‌و ته‌نیا كاریان هه‌ر پویل خه‌رجكردنه‌و هویچ تر!

وه‌ل ئه‌وه‌یشا ئه‌وسا له‌ناو ملله‌ت كورد باوگ ودایگ ده‌ور باڵایگ داشتن له‌ڕینماییكردن له‌ڕوى كوومه‌ڵایه‌تى و چوینیه‌تى ره‌فتار و دریژه‌داین وه‌ مه‌سه‌له‌ى په‌یوه‌ندیكردن یا سڵه‌ى ره‌حم له‌ناونى قه‌وم و كه‌س وكار، وه‌لى ئمڕوو سڵاى ئى جووره‌ مه‌سه‌له‌یگیش له‌ناو خیزنه‌یل فره‌یگ كه‌فته‌سه‌ ده‌س ناخاڵه‌و هه‌رزه‌كار ك وه‌یه‌كجارى دویره‌و كه‌فتنه‌ له‌دونیاى په‌یوه‌ندى و هامشووكردن، هه‌ڵبه‌ته‌ ئى ره‌فتاریشه‌ له‌وڵاته‌یل خوه‌رئاوا زیاتر دوینریه‌یگ و ته‌نانه‌ت وه‌رجه‌ ماوه‌یگ بایه‌سه‌ خه‌وه‌ر بیه‌یده‌ ئه‌و ماڵه‌ ك تواید سه‌ردانیان بكه‌ید، یه‌یش له‌حاڵه‌تیگ ئه‌گه‌ر ماڵه‌گه‌ ئاماده‌ بوون پیشوازى له‌لید بكه‌ن و داواكاریه‌گه‌د جوانه‌مه‌رگ نه‌كه‌ن! ئنجا ئى حاڵه‌ته‌ خه‌ریكه‌ خوه‌ى له‌ناو ره‌فتار خیزانه‌یل كوردیش له‌كوردستان خوه‌مان دوینیگه‌و، وه‌لى دوینید ئه‌وسا له‌كورده‌وارى خاسترین هه‌ڵسووكه‌فت ئه‌وه‌ بوى ك دڵه‌یل پاك وبیگه‌رد بوى و تووز بیڕه‌حمى وه‌پیه‌و نه‌نیشتوید جویر ئه‌وه‌ك ئمڕوو كه‌فیگه‌ وه‌رچه‌و.

خاڵیگ تر هه‌س، ك ئه‌ویش تویه‌نیم ناوى بنه‌یم په‌تاى نه‌فامى، ك ئه‌ویش ئه‌وه‌سه‌ له‌ناونى ناوچه‌یگ و ناوچه‌یگ تر جیاوازى فره‌یگ كریه‌یگه‌ دى له‌ڕوى داب ونه‌ریت كوومه‌ڵایه‌تى و یه‌یش بویه‌سه‌ هووكار ئه‌وه‌ك مه‌ردم ئى ناوچه‌گه‌ وه‌چه‌ویگ سووك و نزمه‌و ته‌ماشاى مه‌ردم ئه‌و ناوچه‌گه‌ بكه‌ن و خوه‌یان وه‌رووشنهویر و پیشكه‌فتگ بزانن، ك گوایا ته‌قلید ئۆرپى كه‌ن و ڕه‌فتاریان جیاوازه‌ له‌ڕه‌فتار مه‌ردم ساده‌و كوڕ كورده‌وارى، له‌ڕاسى ئى په‌تاى كوشنده‌ ئمڕوو وه‌ئاشكرا دیاره‌و چینیگ له‌كوومه‌ڵگا له‌ژیان رووژانه‌یان هه‌ڵسووكه‌فت وه‌پى كه‌ن و دگان وه‌چین ره‌سه‌ن و خاوه‌ن كلتوور نیه‌نه‌ن و هه‌میشه‌ وه‌چین نارووشنهویر و دویاكه‌فتگ ده‌نه‌یانه‌ قه‌ڵه‌م و بگر ناویانیش زڕنن و قسه‌ى ناشرینیش ئه‌ڕایان هه‌ڵوه‌سن و نوكته‌یش له‌بانیان تیه‌رنه‌و، یه‌یش له‌وه‌ختیگ خوه‌یان هه‌رچ ره‌فتاریگ ناپوخت و سه‌قه‌ته‌ تیه‌رنه‌ى كار. ئنجا ئیمه‌ى كورد جى داخه‌ قیمه‌ت كلتوور و فه‌رهه‌نگ و داب ونه‌ریت خوه‌مان وه‌ته‌واوى نیه‌زانیم و ته‌نیا جاروباریگ نه‌ود مه‌گه‌ر له‌ بوونه‌و فیستیڤاڵیگ چشته‌یلیگ كورده‌وارى بوینیمنه‌ چه‌و، وه‌نا فره‌یگ له‌كورده‌یل ره‌نگ و بوو ئه‌و كلتووره‌ له‌لیان دویره‌و نیه‌توان بچنه‌ قه‌ره‌ى و خوه‌یان له‌لى نزیكه‌و بكه‌ن.

 

 

جه‌ماڵ ئه‌ركه‌وازى