ده‌رفه‌ته‌ ته‌ڵایه‌گه‌

شفق نيوز

ئۆباما هه‌وڵ ئه‌وه‌ ئه‌یاد له‌ ماوه‌و جڵه‌و ده‌سڵات خوه‌ى كووتایى وه‌ قه‌یران عراق بارید و له‌ هه‌مان وه‌خت وه‌رپرسیارێتى ئاسایش و سیاسى عراق له‌بان وڵاته‌گه‌ى نه‌یلید، یا ئه‌تویه‌نیم ئاشكراتر بویشیم ك ئۆباما ئه‌خوازید عراق له‌ڕى دابه‌شكردنى ئه‌را بان سێ جوگرافیاو هه‌رێم "نه‌ته‌وه‌یى – مه‌زه‌وى" بكاده‌ خاوه‌ن جووریگ له‌ سه‌قامگیرى و هاوردنه‌وه‌ى حوكمڕانى خاس و ئاره‌زوومه‌ندانه‌ ئه‌را هه‌رسێ هه‌رێمه‌ دابه‌شكریاگه‌گه‌.

كۆنگرس ئه‌مریكاو ئداره‌ى ئۆباما ئاماده‌كارى ته‌مامیگ كردنه‌ ئه‌را ئى مه‌رامه‌و جوور زه‌مینه‌سازییگیش ئه‌را جیوه‌جیكردن ئى مه‌سه‌له‌ له‌ خاڵ یه‌كه‌م مالكى دویره‌و ئه‌خریه‌یدو ئه‌و ٣٠٠ راویژكار سه‌ربازییشه‌ ك شاره‌زان له‌ كه‌رت ئاسایش و جوگرافى ره‌وانه‌ى عراق ئه‌كه‌ن و له‌ خاڵ دویه‌میش ئه‌كه‌فنه‌ هه‌وڵ جیوه‌جیكردن پلانه‌گه‌.

له‌یرا ئه‌وه‌ك مینیده‌و ئه‌را كورد، ئه‌ویش قوناغ دویای مالكی و مامڵه‌كردن و گفت كورده‌ وه‌ل پرووژه‌گه‌و دروسكردن باریگ خاس و نیشتمانسازى و یه‌كگرتگى و یه‌كئاراسته‌یى له‌ وه‌رانوه‌ر رویداگه‌و ئاماژه‌یل ئاینده‌ى سیاسى.

وه‌ل ئه‌وه‌یشا یه‌كهه‌ڵویستى و یه‌كده‌نگى نیشتمانى و نه‌ته‌وه‌یى و یه‌ك به‌ره‌یى و یه‌ك ستراتیجى و هاوباوه‌ڕى، گشت ئه‌یانه‌ گره‌نتى گه‌ورایگه‌ ئه‌را ئیمه‌و ئه‌را وه‌ده‌سهاوردنه‌وه‌ى خواست و داواكاریه‌یل كورد.

ئمجا هه‌ر وه‌و خاتریشه‌ بایه‌سه‌ گشتلایگ و گشت لایه‌ن و هیزه‌یل لینك په‌یوه‌ندى و له‌یه‌كڕه‌سینه‌وه‌یان بته‌وتر بكه‌ن و پلانیگ سیاسى و هاوبه‌ش ئه‌را ئى قوناغه‌ دابنه‌ن. دى ئه‌وه‌كیش ده‌رئه‌كه‌فید و ڕوى ئه‌یاد ئه‌وه‌سه‌ ك كورد له‌گشت لایه‌نه‌یل فیشتر له‌لى نه‌ف وه‌رئه‌گریدو ده‌رفه‌تیگ مێژوویى و ته‌ڵاییه‌و ئه‌كریه‌ید قانجاز له‌لى بكه‌یم و ئاینده‌ى ئه‌زره‌ت گه‌وراتریگ له‌بانی بنیات بنه‌یم.

په‌یڕه‌و ئه‌نوه‌ر

ج . أڕ