دارتاشى پیشه‌یگ ئه‌را گشت سه‌رده‌میگ

شفق نيوز

 

ئاشناكردن رووژگاره‌یل گوزه‌یشته‌ وه‌ گشت لایه‌نه‌یل خاس و خراویه‌و، بوود بكریه‌یده‌ هووكاریگ كاریگه‌ر ئه‌را سه‌رله‌نوو بنیاتناین و دیاریكردن چاره‌نویس ئیسه‌و ئاینده‌مان، مه‌ردمانیگ ك شماره‌یان كه‌م نیه‌ باوه‌ڕیان ئه‌وه‌سه‌ ك پیشكه‌فتن و شارستانیه‌ت وه‌ له‌وه‌ركردن ده‌سه‌ جنگیگ كوڵ خوه‌رئاوایى ده‌سه‌وه‌ر بوود!!

یا دوینید مه‌ردمانیگ هه‌ن باوه‌ڕیان ئه‌وه‌سه‌ وه‌ ئاڵشتكردن دیكۆر ماڵ و سه‌ندن سه‌یاره‌یگ مۆدێرن پیشكه‌فتن ده‌سه‌وه‌ر ئه‌كه‌ن.

له‌راسى ئه‌و جووره‌ كه‌سه‌یله‌ ك وه‌و جووره‌ هویره‌و ئه‌كه‌ن ئه‌وانه‌ وه‌ غه‌ڵه‌ت چینه‌، چوینكه‌ ئه‌وانه‌ ته‌نیا نوڕنه‌ روخسار و جوانیه‌و، یه‌یش له‌وه‌ختیگ ك هویر و فام ژیرخان ئابوورى فه‌رامووش كردنه‌ ك گه‌وهه‌ر و هووكار سه‌ره‌كى گشت ئاڵشتكاریه‌یله‌.

ئه‌گه‌ر پیشكه‌فتن وه‌ مۆدێل جنگ و رانین سه‌یاره‌ى هاوچه‌رخ بوود، ئیسه‌ جاده‌و بازاڕ و ماڵه‌یلمان له‌وه‌ر زاناو داناو داهێنه‌ر شوون كه‌س تر له‌لى نه‌ویه‌و. ژیان كویه‌ن كورده‌وارى ژیانیگ ساده‌و بى گریه‌و گرفت بویه‌، زوورم مه‌ردم له‌بان به‌رهه‌م كشتوكاڵ و به‌رهه‌م ئاژه‌ڵدارى و باخ و بوسان ژیان.

ئمجا ئى جووره‌ كاره‌یلیشه‌ هه‌وه‌جه‌ وه‌ كه‌ره‌سه‌ داشتگه‌ ك له‌لایه‌ن چه‌ن پیشه‌كاریگه‌و دروس كریا ئه‌را دابینكردن خواست و هه‌وه‌جه‌یل ئه‌و مه‌ردمه‌، دى كه‌مه‌ كه‌مه‌ و گام وه‌ گام چه‌نه‌ها كارو پیشه‌ له‌ ناو كومه‌ڵكاى كورده‌وارى ده‌ركه‌فت جوور" ئاسنگه‌رى و كارخانه‌چى و ته‌ونگه‌رى و پینه‌چى و جنگ دویر و دارتاشى و ده‌یه‌ها پیشه‌ى تر، ك یه‌یش خوه‌ى له‌ خوه‌ى جووریگ بوى له‌ پیشكه‌فتن كومه‌ڵایه‌تى و مه‌ردمان تر قانجاز له‌لیان كردیان و كاروبار مه‌ردمیش كه‌فته‌ پیشكه‌فتن، دى تویه‌نیم بویشیم مه‌زه‌نه‌ى ئه‌وه‌ ئه‌كریه‌ید ك سه‌دان ساڵ وه‌رجه‌ ئیسه‌ پیشه‌ى دارتاشى له‌ كوردستان په‌یا بوید، ئمجا دارتاشه‌یل نه‌ك هه‌ر ته‌نیا هه‌وه‌جه‌یل كشتوكاڵى، به‌ڵكوو كه‌ره‌سه‌و هه‌وه‌جه‌یل ماڵیش دروس كردنه‌ جوور " هه‌وجار ، مژانه‌، نیله‌و قوفڵه‌، جه‌نجه‌ڕ ئاو، خاكه‌ناز، ده‌سگه‌ چه‌كوش، هه‌لویلگ، سه‌ندووق ته‌ماكو، شه‌ن، وه‌فره‌ماڵ، ته‌خته‌به‌ن ئه‌را خه‌فتن، دوڵاو....هتد.

دارتاشه‌یل له‌بان داره‌یل جوور چنار و دار به‌ڕوى و دار توى كار كردیان و گشت كاریگیش دارتاشى هه‌وه‌جه‌ وه‌ سه‌رڕشته‌و شاره‌زایى داشتگه‌، ك له‌ى بواریشه‌و شماره‌ى فره‌یگ له‌ دارتاش خاس له‌ كوردستان ده‌ركه‌فت و تائیسه‌یش نه‌وه‌یلیان هه‌ر خه‌ریك ئه‌و پیشه‌نه‌ ك له‌ باوگ و باپیره‌یلیان ئه‌رایان مه‌نده‌سه‌ جى.

مام هه‌ژار

ج . أ