شه‌نگاڵ له‌ناونی قه‌وڵ سه‌رۆك وپشتگيری ملله‌ت

شفق نيوز

هيزه‌ گه‌وراگه‌ی سه‌رده‌م ئه‌سكه‌نده‌ر و جه‌نگيزخان و ته‌يموور له‌نگ و مێژوو په‌لاماره‌يل ئسلام و فارس و يونانيه‌يل و ناپليۆن و نزيكرت ئه‌را سوپای ماوتسی تۆنگ له‌ چين و سوپای قرمز سۆڤێت و ئه‌ڵمانياو سوپای ئه‌مريكاو يابان و ئيران و عراق و هيزه‌يل پێشمه‌رگه‌ی كوردستان له‌ شووڕشه‌يل سه‌خت و خويناوی، وه‌ل داگيركه‌ره‌يل و ترۆريسته‌يل وه‌ده‌ر نين له‌و شكه‌ست و سه‌ركه‌فتنه‌يله‌، وه‌لی مه‌هانه‌يش نيه‌ ئه‌را ئه‌وه‌ك له‌ شه‌نگاڵ رويدا، ك سزای فريه‌و قوربانی و تراژيديای گه‌ورا له‌شوون خوه‌ی هاورد.

په‌لامار ئه‌را بان شه‌نگاڵ له‌لايه‌ن ترۆريسته‌يله‌و ته‌نيا كاريگ ترۆريستانه‌ی نه‌وی، به‌ڵكوو شوونه‌واريگ فكری و ئايدۆلۆجی ئايينی و نه‌ته‌وه‌ييش وه‌ليا بوی، ك ريشگ قويل و مێژوويی داشت و ئيسه‌ وه‌خت ئه‌وه‌ نيه‌ باسی بكه‌يم.

راسه‌ شه‌نگاڵيه‌يل جوور توخميگ وه‌ بنه‌چه‌ك و ريشه‌ی كورد قوربانی گه‌ورا دان، وه‌لی له‌ڕوی ئنسانيه‌و بوينه‌ جی ده‌يه‌ها مه‌ته‌ڵ و هه‌ڵوه‌س و په‌خشان، بوينه‌ ئاواز لاوك و حه‌يران، بوينه‌ نيشانه‌ی مه‌زڵوميه‌ت و چه‌وسيان، ئه‌وان جاريگتر ناسنامه‌ی نه‌ته‌وه‌يی و كوردبوين خوه‌يان تازه‌وه‌ كردن، ريژه‌يان و شماره‌ی مه‌ردمه‌گه‌يان ئيسه‌ كه‌متره‌ له‌ وه‌رجه‌ رويداگه‌يل، وه‌لی گشت كورديگ له‌ هه‌ر شوونيگ دونيا وه‌ ئايين خوه‌يه‌و خوه‌ی وه‌ خه‌ڵك شه‌نگاڵ ئه‌زانيد. مانای ئه‌وه‌سه‌ ئه‌وان وه‌ شماره‌و سووزداره‌يليانه‌و فريه‌ گه‌وراترن له‌ جاران.

كورده‌يل ئێزيدی قوربانی گه‌ورا پيشكه‌ش كردنه‌ نه‌ته‌وه‌و ئنسانيه‌ت، هه‌زاران كه‌س له‌ليان گيان له‌ده‌سدا، وه‌ كوشتن، مردن له‌ ورسگی، وه‌ خنكيان له‌ تيه‌نگی و هه‌ڵكزيان جه‌سه‌يان له‌وه‌ر گه‌رمی خوه‌ر ئه‌و گه‌رمه‌سيره‌، وه‌ له‌پاكه‌فتن و زرانی شكيان و خوه‌يكوشتن، وه‌ سووكايه‌تی وه‌پيكردن و فرووشتنيان له‌ بازاڕه‌يل ديلفرووشی وه‌ناو ده‌وڵه‌ت ئسلامی. بيجگه‌ ئه‌وه‌يش ده‌يه‌ها مه‌رگه‌سات تر وه‌جيمه‌ندن چه‌نه‌ها نه‌خوه‌شی فسيۆلۆجی و سايكۆلۆجی ك ئه‌را چه‌نه‌ها ساڵه‌يل تريش شوونه‌واريان هه‌ر مينيد و ناڵنن وه‌پيه‌و.

يه‌يش جوور ئه‌وه‌ك زويتر له‌و مه‌رگه‌ساته‌يله‌ ك هاته‌ تويش ملله‌ته‌گه‌مان جوور: ئه‌نفال كورده‌يل فه‌يلی و بازانی و كيمياواران هه‌ڵه‌بجه‌و شێخ وه‌سانان و دووڵ جافايه‌تی و بوردمانكردن قه‌ڵادزێ و ئه‌نفال گه‌رميانيه‌يل.

كاره‌سات شه‌نگاڵ ئه‌و مه‌ينه‌تيه‌يله‌ له‌لی رويدا ك باسی كرديم، وه‌لی رزه‌يل كورد يه‌كه‌وخست و كزيه‌يل سه‌ربازی ئه‌رامان ده‌سنيشان كرد و راده‌ی خوسه‌و كينه‌ت دوشمنه‌يلمان ده‌رخست روی سيه‌ی راسكانی فريه‌ لايه‌ن ئاشكرا كرد و كومه‌ڵگای ناوده‌وڵه‌تييش وه‌ ته‌مامی له‌رزانه‌و.

بيجگه‌ گشت ئه‌وانه‌يش كاره‌سات شه‌نگاڵ له‌يوا كرد سه‌رۆك هه‌رێم كوردستان قه‌وڵ بيه‌يد و وچان و ئارامی له‌ خوه‌ی هه‌ڵبگريد ئه‌را هه‌قه‌وكردن و رزگاركردنی، ك وه‌ هه‌وڵه‌يل خاس خوه‌ی پشتگيری كومه‌ڵگای ناوده‌وڵه‌تی هاورده‌ بوار جيوه‌جيكردن، ئه‌و قه‌وڵه‌يل خوه‌ی وه‌ پشتگيری گشت ملله‌ت كوردستان هاورده‌ جی، مه‌ردميش وه‌گشت چين و لايه‌ن و پيكهاته‌يليه‌و پشتگيری له‌ سه‌رۆك خوه‌يان كردن، چوينكه‌ باوه‌ڕ وه‌ سه‌ركردايه‌تی و رابه‌رايه‌تی ئه‌و گه‌ورا ديرن، ك وه‌ پشتگيری ملله‌ت و قاره‌مانێتی پێشمه‌رگه‌ و رابه‌رايه‌تی سه‌رۆك فريه‌يگ له‌ مه‌حاڵه‌يل شكيان و سه‌ركه‌فتن گه‌ورا هاوريا ده‌س و ئه‌كريه‌يد جوور نقڵانه‌يگ ئه‌را سه‌ركه‌فتن و پيشكه‌فتن فيشتر له‌ قه‌ڵه‌م بدريه‌نن. سڵام ئه‌را گيان پاك شه‌هيده‌يل كوردستان.

هيوا ئه‌حمه‌د مسته‌فا

ج . أ