گومبوین رووژنامه‌ى قاقه‌زین..!

شفق نيوز

چاپكریاگ جوور هووكاریگ ك هێمان وجوود دیرێد له‌جه‌هان، وه‌تایبه‌ت ته‌نیا هووكاریگ بوى ك وجوود داشت وه‌رجه‌ په‌یابوین هووكاره‌یل ره‌سانن دوینریاگ و ژنه‌فیاگ ك زیاتر ره‌واجه‌ له‌ى رووژگاره‌یله‌ جوور رادیۆ و كه‌ناڵه‌یل ئاسمانى، ك مه‌ردم ئه‌را ساڵه‌یل دویرودریژیگ مه‌یل خوه‌ندنه‌وه‌ى رووژنامه‌یل قاقه‌زین داشتن وه‌ل خواردن فنجانیگ قاوه‌ یا پیاڵه‌یگ چاى له‌وه‌خت ناشتاكردن.

 

بیگومان شیواز خوه‌ندنه‌وه‌ له‌كه‌سیگ ئه‌را كه‌سیگ تر جیاوازه‌، بڕیگ له‌لیان مه‌یل خوه‌ندنه‌وه‌ى رووژنامه‌ى قاقه‌زین دیرن و دووس دیرن لاپه‌ڕه‌یل قاقه‌ز بیه‌نه‌ یه‌كا، وه‌لى بڕیگ تر دووس رووژنامه‌ى ئه‌لكترۆنى دیرن و گه‌ردین له‌ناو ماڵپه‌ڕ هه‌واڵه‌یل كه‌ن له‌بان تووڕ ئه‌نته‌رنێت، وه‌ جووریگ ك گه‌ردین رووژانه‌ له‌ناو رووژنامه‌ى ئه‌لكترۆنى بویه‌سه‌ به‌شیگ گرنگ و بنه‌ڕه‌تى له‌ ژیانیان و تواناى ده‌سوه‌ردارى نه‌یرن.

 

له‌یره‌ دوینیم حاڵه‌ته‌گه‌ ئاڵشت بوى له‌شوون هاتن ته‌كنۆلۆجیاو هووكاره‌یل تازه‌ له‌ جه‌هان پان و وه‌رین، ئمجا رووژنامه‌ى ئه‌لكترۆنى له‌بان تووڕ ئه‌نته‌رنێت بویه‌ هووكار بته‌و مه‌یلكیشان خوه‌نه‌وار و رووشنهویر له‌ى ساڵه‌یل دویاخره‌ وه‌تایبه‌ت له‌شوون بڵاوكردنه‌وه‌ى هه‌واڵ و رویداگه‌یل هه‌ڵه‌په‌ڵه‌ له‌جه‌هان، ك یه‌یش بویه‌ هووكار ئه‌را ده‌سكه‌فتن زانیارى گورج له‌جیاى ئه‌وه‌ك 24 سه‌عات چه‌وه‌ڕى بكا ئه‌را خوه‌ندنه‌وه‌ى هه‌واڵه‌یل له‌ رووژنامه‌ى قاقه‌زین و چاپكریاگ.

 

ئمجا له‌وه‌ر په‌ره‌سه‌ندن گورج جه‌هان رووژنامه‌ى ئه‌لكترۆنى، فرانسیس گورى وه‌ڕێه‌وبه‌ر گشتى ریكخریاگ جه‌هانى فكرى پێشبینى كه‌مه‌وكردن و نه‌مه‌ندن رووژنامه‌ى قاقه‌زین ئه‌كا له‌جه‌هان له‌ساڵ(2040)وه‌ یه‌كجارى، یه‌یش وه‌گووه‌رى زانست خوه‌ى له‌ڕوى له‌یه‌كه‌وداین تازه‌، وه‌لى وه‌ل ئه‌وه‌یشا پیشبینى ئه‌كا ك رووژنامه‌ى قاقه‌زین له‌ وڵاته‌یل یه‌كگرتگ ئه‌مریكا ئه‌را ساڵ(2017) گوما بوود، یه‌یش ماناى ئه‌وه‌سه‌ رووژنامه‌یل چاپكریاگ تا چه‌ن ساڵیگ تر وجوود نه‌مینێدو ڕى ئه‌را رووژنامه‌ى ئه‌لكترۆنى واز بكا.

 

وه‌لى هیمان تائیسه‌یش رووژنامه‌ى قاقه‌زین له‌ كوومه‌ڵگایه‌یل عه‌ره‌بى نه‌خش و كاریگه‌رى گه‌ورایگ دیرێد له‌مه‌یدان ره‌سانن، یه‌یش له‌وه‌ختیگه‌ ك هیمان به‌ش فره‌ێگ مه‌ردم تواناى وه‌كارهاوردن ئه‌نته‌رنێت نه‌یرن وه‌تایبه‌ت گه‌ورا ساڵه‌یل ك وه‌كارهاوردن هووكاره‌یل ته‌كنۆلۆجى و چشته‌یل تازه‌ سه‌خته‌ له‌لایان، یه‌یش بیجگه‌ ئه‌و خیزانه‌یله‌ ك تواناى خه‌رج به‌شداریكردن له‌ تووڕ ئه‌نته‌رنێت نه‌یرن.

 

هه‌ر له‌وه‌ر ئه‌وه‌یش وه‌ل سسى ره‌سین ته‌كنۆلۆجیاى تازه‌ ئه‌را جه‌هان عه‌ره‌بى، پیشنیار ئه‌وه‌ كریه‌ێد ك تا ساڵ 2040 ئى رووژنامه‌ى قاقه‌زینه‌ بمینێد. ره‌سانن یا میدیایش جوور بواره‌یل تر ك ده‌وڵه‌ته‌یل عه‌ره‌بى جیاوازن له‌لى وه‌ل ده‌وڵه‌ته‌یل تر جه‌هان ك ته‌كنۆلۆجیا له‌تیان په‌ره‌ سه‌ندگه‌ وه‌شیوه‌ى گورج و فره‌یگ ، هه‌ر له‌وه‌ر ئه‌وه‌یش چشتیگ نییه‌ مه‌حاڵ بوود له‌سایه‌ى ئى شووڕشه‌یل ئه‌لكترۆنیه‌ ك جیاوازه‌ له‌ شووڕشه‌یل وه‌هار عه‌ره‌بى سه‌رلیشیویاگه‌..!!

 

عه‌لى وه‌حید عه‌بودى

 

 

 

ج. ا