داڵه‌هوو له‌ يۆنان زاگرۆسه‌!

شفق نيوز

ئه‌گه‌ريش ته‌ماشای لای باشووری بكه‌يم له‌ باشوور گاواره‌ ده‌س وه‌پی ئه‌كار و له‌ ناوچه‌ی كرن كووتايی وه‌پی ئه‌ياد. داڵه‌هوو كويه‌يگه‌ ئێڵاخی و هه‌ميشه‌ شنه‌وای هوونك له‌ليه‌و سه‌رچه‌وه‌ ئه‌گريد و تا وه‌خته‌يل فريه‌يگيش له‌شوون وه‌رز زمسانيش به‌رزايه‌يل ئی كويه‌ی سه‌خته‌ هه‌ر وه‌ وه‌فر چه‌رمگ پوشرياگه‌.

به‌رزايه‌گه‌ی ١٨١٠ مه‌تره‌و به‌رزترين مله‌ی ئی جه‌وه‌ڵيشه‌ وه‌پی ئويشن"بايكه‌وان" يا باريكه‌وه‌ن ك زاڵه‌ له‌بان ده‌يشت زه‌هاو و نوڕيده‌ خاك عراق و چه‌م سيروان. وه‌ل ئه‌وه‌يشا له‌ سه‌رده‌مه‌يل گوزه‌يشت قه‌ڵای سه‌خت و ستراتيجی و سه‌نگه‌ريگيش بويه‌ ئه‌را وه‌رگری و په‌لامار.

وه‌ گووره‌ی بڕيگ سه‌رچه‌وه‌ ئه‌وه‌ ده‌ركه‌فتگه‌ ك ئاو ئه‌ڵوه‌ن له‌ی كويه‌ی داڵه‌هووه‌ سه‌رچه‌وه‌ ئه‌گريد و دريژه‌و ئه‌دێ تا ئه‌ڕشيه‌يده‌ چه‌م دياله‌ له‌ ناو خاك عراق. كويه‌ی داڵه‌هوو له‌ ديم باكووريه‌و ئه‌ڕه‌سيده‌ كويه‌ی به‌ند زه‌رد ك به‌رزايه‌گه‌ی ١٣٥٠ مه‌تره‌و له‌ خوه‌رهه‌ڵاتيشه‌و ئه‌ڕه‌سيده‌ كويه‌ی گوڵبان ك يه‌يش به‌رزايه‌گه‌ی ٢٠١٠ مه‌تره‌.

له‌وه‌خت خوه‌ی يۆنانيه‌يل وه‌ هه‌ردوگ كويه‌ی داڵه‌هوو و بالوول وتنه‌"زاگرۆس"، ئه‌گه‌ريش ته‌ماشای گه‌شتنامه‌ی گه‌شته‌كه‌ره‌يل بيگانه‌ بكه‌يم وه‌ تايبه‌ت گه‌شتكه‌ره‌يل يۆنان ك هه‌ميشه‌ وه‌ ده‌يشت ئه‌وريشم كوردستانه‌و ره‌سينه‌سه‌ ناوچه‌ی زه‌هاو و شوونه‌يل تر، ئه‌وه‌ ئه‌رامان ده‌ركه‌فێد ك ئی دو زنجيره‌ جه‌وه‌ڵه‌ هه‌ر له‌ زويه‌و له‌لای يۆنانيه‌يل ناودار بويه‌، چوينكه‌ يه‌كيگ بويه‌ له‌ ڕيه‌يل ستراتيجی ناونی ئيران و وڵات دوچه‌مان و زوورم گه‌شتكه‌ر و بازرگانه‌يل بيگانه‌يش وه‌ی شوونه‌يل ستراتيجيه‌و گوزه‌ر كردنه‌، ك هه‌ر وه‌و خاتريشه‌ داڵه‌هوو له‌ يۆنان وه‌ زاگرۆس ناسريا.

جه‌ماڵ ئه‌ركه‌وازی

سه‌رچه‌وه‌/ جوگرافيای كوردستان