فه‌يلی كورد نييه‌.. كورد فه‌يليه!!‌

شفق نيوز

وه‌ ملله‌تيگ سه‌روه‌خوه‌ی يا چينيگ سه‌ر وه‌ نه‌ته‌وه‌يگ غه‌ير كورد ناويان به‌ن. ئی باوه‌ڕه‌ يا خاستر بويشم ئی هويره‌ نه‌ ته‌نيا له‌لای مه‌ردم بێگانه‌ به‌ڵكو له‌لای بڕێگ له‌ كورده‌يليش وجود ديرێ، ته‌نانه‌ت بڕێگ له‌ خود فه‌يليه‌يل و ئێزديه‌يل و شه‌به‌ك و...!. دياره‌ ك ئی هويره‌ خوه‌ی له‌ خوه‌يه‌و نه‌هاتيه‌. بڕێگ ئه‌را ئه‌وه‌گ دژايه‌تی ملله‌ت كورد‌ بكه‌ن و نه‌يلن ماڵ كورد يه‌كبخريه‌ێد و يه‌كگرتگه‌و بوود، كار ئه‌را ئه‌وه‌ كه‌ن تا چنه‌ باوه‌ڕێگ له‌ناو هوير ئی كورده‌يل ره‌سه‌نه‌ په‌روه‌رده‌ بكه‌ن و له‌ نه‌ته‌وه‌ی خوه‌يان جيايانه‌و بكه‌ن. ئه‌را ئه‌وه‌يشه‌ ده‌س نانه‌سه‌ بان هه‌ستيارترين و مه‌ترسيدارترين خاڵ، ك ئه‌وه‌يش جياوازی ئۆلی(مه‌زهه‌بی) و ئاينييه‌. ئمڕوو كورد تويش كێشه‌يگ هاتيه‌ ك له‌ مێژووی ئی ملله‌ته‌ تا ئيسه‌ ئيچنه‌ كێشه‌يگ وجود نه‌ياشتيه. وه‌خاتر ئه‌و سياسه‌ته‌يله‌ ك له‌لايه‌ن ده‌وڵه‌ته‌يل هاوسای كوردستان و ڕه‌وته‌يل مه‌زهه‌بی له‌روی كورده‌يل فه‌يلی و شه‌به‌ك و ئێزدی په‌يڕه‌و كرياس، بڕێگ له‌ی كورده‌يله‌ كه‌فتنه‌سه‌ ژێر كاريگه‌ری ئه‌و سياسه‌ته‌يله‌و و بڕێگيش وه‌خاتر به‌رژه‌وه‌نديه‌يل خوه‌يان كار ئه‌را بڵاوه‌و كردن ئه‌و هويره‌ له‌ناو هاوزووانه‌يل خوه‌يان كه‌ن. له‌لايگتره‌و وه‌وخاتره‌گ ساڵه‌يل دويرودريژيگ ئی كورده‌يله‌ له‌ناو عه‌ره‌ب و فارس ژيانه‌ ئاسيميله‌ بوينه‌و بڕێگيان وه‌ته‌واوه‌تی له‌ناو ئه‌و ملله‌ته‌يله‌ تاويانه‌سه‌و. له‌ێره‌ توام جوور نموونه‌ باس كورد فه‌يلی بكه‌م ك كێشه‌گه‌ی تا ڕاده‌ێگ هاوبه‌شه‌ وه‌ل ئه‌و چينه‌يل تر كورده‌ ك باسيان كردم. هه‌ڵبه‌ته‌ كێشه‌ی كورد فه‌يلی له‌ باشوور و ڕووژهه‌ڵات و ده‌يشت كوردستان هويچ جياوازييگ نه‌ێرێد. بڕێگ جار باس كريه‌ێد و ئويشن ك فه‌يلی كورد نييه‌، نه‌ وه‌و مانا ك كورد نين به‌ڵكو وه‌مانای ئه‌وه‌ ك له‌ هه‌ڵوێسته‌يل نه‌ته‌وه‌يی ئه‌را نموونه‌ له‌ هه‌ڵوژاردنه‌يل(انتخابات) ده‌نگ وه‌ كورد نه‌يانه‌، ك باوه‌ڕم ئی مه‌سه‌له‌ پێوه‌ر كوردبوين نييه‌و مانای ئه‌وه‌ نييه‌ ك هه‌ر كه‌سيگ له‌ هه‌ڵوژاردنه‌يل ده‌نگ وه‌ ليستيگ كوردی نه‌يه‌ێد مانای ئه‌وه‌سه‌ ك كورد نييه يا مانای ئه‌وه‌سه‌ ك ده‌نگ وه‌ مه‌زهه‌ب داس‌، هه‌ڵبه‌ته‌ من پشگيری له‌ی كێشه‌ی گه‌ورا نيه‌كه‌م وه‌لی وه‌باوه‌ڕ من ده‌نگ نه‌يان وه‌ كورد له‌ مه‌سه‌له‌يل سياسی نيشانه‌ی ناڕازيبوينه‌ و وه‌و جووره‌ ناڕه‌زايه‌تی خوه‌يان نيشان ده‌ن. بڕێگ تريش كورده‌يل مه‌زهه‌بی توندڕه‌ون ك سوننی بوين كردنه‌سه‌ پێوه‌ر ئه‌را كوردايه‌تی ك ئه‌وه‌يش له‌ نه‌تيجه‌ی ئه‌و شاڵاو وه‌هابيه‌ت و سه‌له‌فييه‌ته‌سه‌ ك له‌وڵاته‌يليگ جوور عه‌ره‌بستان ئه‌را جوانه‌يل كوردستان هه‌نارده‌ كريه‌ن، ك يه‌ نه‌ته‌نيا بويه‌سه‌ مايه‌ی توندڕه‌وی مه‌زهه‌بی به‌ڵكو هه‌ست نه‌ته‌وايه‌تييش له‌ناو نه‌وه‌ی ئمڕوو كورد كه‌مڕه‌نگه‌و كرديه‌. بڕێگ تريش كورد فه‌يلی تاوانبار وه‌ ئه‌وه‌ كه‌ن ك فه‌رهه‌نگ و ڕه‌سه‌نايه‌تی كوردی خوه‌يان له‌ ده‌سدانه‌و وه‌زووان داڵگی خوه‌يان قسه‌ نيه‌كه‌ن، ك يه‌يشه‌ وه‌ باوه‌ڕ من ڕاسه‌ كێشه‌ی گه‌ورايگه‌ وه‌لی فره‌ ئاسايی و سروشتيه‌ چوينكه‌ ته‌نيا كورده‌يل فه‌يلی تويش ئی كێشه‌ نه‌هاتنه‌ به‌ڵكو هه‌ر كورديگ ك له‌ ده‌يشت كوردستان ژياس، جينۆسايد فه‌رهه‌نگی و بومبواران فكری كرياس، چونكه‌ فره‌ كورد هه‌س ك زووان داڵگی خوه‌ی نيه‌زانێد و فه‌رهه‌نگه‌ ئه‌و كومه‌ڵگا و ملله‌ته‌ گرديه‌سه‌ خوه‌ی ك له‌ناويان گه‌ورا بويه‌ ك يه‌يشه‌ هه‌وه‌جه‌ وه‌ باسيگ دوير و دريژ ديرێد. يانه‌ چه‌ن نموونه‌يگ بوين له‌و باوه‌ته‌يله‌‌ ك هه‌ميشه‌ كورده‌يل فه‌يلی وه‌پييان تاوانبار كريه‌ن. وه‌لی بايه‌د يه‌ خاس بزانن ك ئه‌وانه‌گ باسيان كرديمن گشتيان كێشه‌ن نه‌ك پێوه‌ر(ئه‌را كوردبوين) و هه‌وه‌جه‌ وه‌ چاره‌سه‌ريگ نه‌ته‌وه‌يی ديرن. له‌كووتايی ئاماژه‌ وه‌يه‌يش بكه‌م ك ره‌سه‌نايه‌تی و كوردبوين كورده‌يل فه‌يلی، شه‌به‌ك يا ئێزدی...تد، هويچ شك و گومانيگ له‌تی نييه‌ تا له‌ێره‌ من بتوام ئه‌را ئسبات كردنی به‌ڵگه‌ بارم، ئه‌گه‌ر كه‌سيگ هه‌وه‌جه‌ وه‌ به‌ڵگه‌ ديرێد خاسترين به‌ڵگه‌، مێژووی چه‌ن هزار ساڵه‌ی ملله‌ت كورده‌ ك شايه‌تی له‌بان ئه‌وه‌ ئه‌ياد ك: ره‌چه‌ڵه‌ك كورد، فه‌يليه‌.

 

ئاراس جه‌واد   ‌