عراقیه‌یل هه‌ق گه‌شتكردن نه‌یرن

شفق نيوز

ئه‌خه‌یده‌ لاى ئه‌و نویساننه‌ ك له‌بانه‌و نویسریاسه‌و ئویشێد"هه‌ڵگر ئى پاسه‌پۆرته‌ ها له‌ژیر مقه‌یه‌تیكردن وڵاته‌یل یه‌كگرتگ ئه‌مریكى له‌بان هه‌ر خاك و له‌ژیر هه‌ر ئاسمانیگ "، یه‌یش ماناى گرینگداین ئه‌مریكاس وه‌ هاووڵاتیه‌یلى و مقه‌یه‌تیكردنه‌ له‌لیان و نیشانه‌ى ئاماده‌ییه‌ ئه‌را وه‌رگریكردن له‌لیان له‌هه‌ر شوونیگ.

ئى نویساننه‌ خوه‌ى دوباره‌و كردگه‌ له‌پاسه‌پۆرته‌یل بریتانییش وه‌شیوازیگ تون سه‌ربازیانه‌و گوزارش له‌ مكوڕبوین و پابه‌ندى بریتانیه‌ له‌بان دابینكردن مقه‌یه‌تى له‌هاووڵاتیه‌یلى و ته‌نانه‌ت ئاماده‌یشه‌ قوربانى به‌ید وه‌ ئاخرین سه‌رباز له‌ سه‌ربازه‌یل خوه‌ى له‌وه‌ر خاتر مقه‌یه‌تیكردن له‌ هه‌ڵگر پاسه‌پۆرت بریتانى، ك له‌تى نویسیاس"شانشین یه‌كگرتگ مقه‌یه‌تى له‌ هه‌ڵگر ئى پاسه‌پۆرته‌ ئه‌كا تا دویا سه‌بازى له‌بان خاكه‌یل خوه‌ى".

له‌ پاسه‌پۆرته‌یل "كه‌نه‌دى"یش ئه‌و گوزارشه‌ كوڵه‌و كریاگه‌ وه‌ى شیواز جوانه‌، ك ئویشێد" گشت كه‌شتیه‌یل ده‌ریاییمان وه‌ خاترد خه‌یمنه‌ جموجویل". وه‌لى له‌ پاسه‌پۆرته‌یل عه‌ره‌بى ئه‌و نویساننه‌یله‌ ئاڵشت بوود ئه‌را وشیارى توندیگ و هه‌ڕه‌شه‌ له‌هه‌ڵگره‌یلى ئه‌كا ك واده‌ى توندترین سزا وه‌پى ئه‌یاد له‌وه‌خت گومكردن پاسه‌پۆرته‌گه‌ى و له‌تى نویسریاگه‌"هه‌ر وه‌ختیگ ئى پاسه‌پۆرته‌ گوم بكا بایه‌سه‌ سزاى دارایى ئه‌دریه‌ێد خوه‌د خه‌یده‌ وه‌ر مه‌سه‌له‌ى پرس وپرسكارى یاسایى لایه‌نه‌یل په‌یوه‌ندیدار ئه‌منى تایبه‌ت".

له‌ پاسه‌پۆرته‌یل"عراقى"یش وشدارداینه‌گه‌ كه‌فتیه‌سه‌ دویا لاپه‌ڕه‌ى پاسه‌پۆرته‌گه‌ له‌ژیر ناونیشان"رینمایى گرنگ "ك وه‌ سێ زووان نویسیاگه‌: عه‌ره‌بى و كوردى و ئینگلیزى، ك له‌تى ئویشێد"ئى پاسه‌پۆرته‌ گرنگى گه‌ورایگ دیرێد، نادێ هویچ كه‌سیگ  بیه‌ریده‌ى كار ك وه‌ناویه‌و نه‌ود، ئه‌گه‌ریش گوم بوى یا پویتركیا بایه‌سه‌ وه‌ زویترین وه‌خت ئاگادار نویسینگه‌ى پاسه‌پۆرت گه‌شتكردن یا نزیكترین كونسڵخانه‌ى عراقى بكه‌ید و دى پاسه‌پۆرتیگ تر یه‌كسه‌ر وه‌پید نادریه‌ێ مه‌گه‌ر له‌شوون تاقیه‌وكردن فره‌یگ و داین زه‌مانه‌تیگ ".

ئه‌ڵڵاجه‌وى ها له‌وره‌ ك عراق ته‌نیا وڵاتیگه‌ جیا له‌ده‌وڵه‌ته‌یل تر جه‌هان ك خاوه‌ن یاسایه‌یل ئه‌ڵڵاجه‌ویه‌و له‌ساڵ 1986ه‌و دانریاگه‌و توندترین بڕیار له‌باوه‌ت پیاوه‌یل ده‌ریا ده‌ركرد و قه‌یه‌غه‌ى گه‌شت و كاركردن له‌ده‌ریایه‌یل خودایى له‌لیان كرد، وه‌و  ره‌فتاریشه‌ عراق وه‌ یاساى شماره‌(90)ساڵ 1986 گه‌وراترین غه‌ڵه‌ت كرد ده‌رهه‌ق كه‌رت تایبه‌ت ده‌ریایى، وه‌ ئه‌وه‌ك هه‌ركامیان مه‌یل كاركردن ده‌ریایى داشتوون كه‌فنه‌ وه‌ر توندترین سزا.

ئه‌وه‌ك مایه‌ى ژان و دڵته‌نگیه‌، ئه‌وه‌سه‌ ك ئه‌و بڕیار و یاسایه‌یله‌ هیمان له‌ساڵ 1986ه‌و تائیسه‌ هه‌ر جیوه‌جى كریه‌ێدو هویچ له‌لیان ئاڵشت نه‌كریانه‌، ئمجا عراق چ زه‌ره‌دیگ ئه‌كا ئه‌گه‌ر بوار كاركردن له‌مه‌یدانى ده‌ریاوانى واز بكا له‌ده‌یشت ئاوه‌یل هه‌رێمى؟ یا له‌وه‌رچه‌ عراق له‌ناونى وڵاته‌یل تر جه‌هان له‌ڕوى بڕیار و یاسا جیاوازه‌ له‌ى باوه‌ته‌و؟ ئى پرسیاره‌یله‌و زیاتریش پیشكه‌شى كه‌یمنه‌ ئه‌ندامه‌یل په‌رله‌مان و چه‌وه‌ڕى جوواویان ئه‌كه‌یم.

 

كازم فنجان