له‌ گڕه‌گه‌ى بوعه‌زیزى بڵێزه‌ى گۆڕان ده‌مگرت

شفق نيوز

مینه‌ى ژیانیگ ئازاد و سه‌ربه‌رزانه‌ كه‌ن، و تاكه‌ چشتیگ ك له‌ كیس ئى ملله‌ته‌یله‌ چوود له‌ شووڕش تویڕه‌بوینیان كۆت و به‌ند و زنجیره‌یل ئه‌و ڕژیمه‌یل دیكتاتۆریه‌سه‌... چوینكه‌ ملله‌ت وه‌ختى تینى ئازادى و ئاو ورسى  نانیگ بوود، پاپاى كوته‌ك ئه‌رجن ده‌س هێز ئاسایش نیه‌ود و ده‌ربه‌ن بۆمبه‌یل عه‌سرڕشن و گورز و زندان نیه‌ود... چوینكه‌ ملله‌ت ئه‌وه‌ تواید ك ئه‌و دیكتاتۆریه‌ت قیزه‌وه‌نه‌ سه‌رخوه‌ى هه‌ڵبگرى ك وه‌دریژى چه‌ن ده‌یه‌یگ  بویه‌سه‌ ته‌وق گه‌ردن مه‌ردم...

بیكارى، ورسێتى، گرانى، سه‌ركوتكردن، بیمارى و گه‌ناته‌كارى ڕووژ وه‌ڕووژ زیایه‌و بوون له‌ وڵاته‌یل عه‌ره‌بى ده‌وڵه‌مه‌ن وه‌ نه‌فت و له‌یه‌یشه‌ زیاتر حوكمڕانى له‌ى وڵاته‌یله‌ كه‌فتیه‌سه‌ ده‌س حاكمه‌گه‌ و خێزانه‌گه‌ى وه‌ته‌نیا...

به‌ڵى.. وه‌ره‌ژان په‌یابوین خوه‌ر ئازادى له‌ وڵاته‌یل عه‌ره‌بى ده‌سكرده‌پى... چوینكه‌ گۆڕانكارى بى گومان هاوه‌ڕیه‌وه‌.. و ئاگر شووڕش ورسیه‌یل له‌ ناو جاده‌یل و گه‌ڕه‌كه‌یل و كویچه‌یله‌وه‌ بڵێزه‌ى هه‌ڵسیا و كه‌سیش نیه‌تویه‌نى كووریه‌و بكه‌ید هه‌رچه‌نى ك تون و تیژى و تیرۆر و سه‌ركوتكردنیش وه‌كاربارى...چوینكه‌ (ملله‌ت تواید ڕژیمه‌گه‌ بڕمیه‌ید) ئى قسه‌یله‌ له‌ قوڕى مه‌ردم تویڕه‌وه‌ له‌ جاده‌یل مسر و تونس و سه‌نعا ده‌رچوى... به‌ڵى وه‌ى قسه‌یله‌ مه‌ردم ورسى شویشه‌ى بیده‌نگى له‌ مسر هوڕووش كردن و وه‌رج له‌وه‌یش له‌ تونس و سه‌نعا و ئوردن و شایه‌ت ئى خودنیشاندانه‌یل ناڕه‌زایه‌تیه‌ بڕه‌سیده‌ وڵاته‌یل عه‌ره‌بییگتر ك له‌ لایه‌ن ڕژیمه‌یل سه‌ركوتكه‌ر حوكمیان كریه‌ن.

هه‌رچه‌نى ك خوه‌شحاڵم وه‌ قه‌وڵه‌یل خاسسازى له‌ لایه‌ن پارت حوكمدادر له‌ مسر وه‌لى من جوور هاووڵاتییگ عیراقى ك مه‌ینه‌تى و جه‌ور گه‌ورایگ كیشا وه‌ده‌س ڕژیم دیكتاتۆرى ك وه‌ ئه‌نفاله‌یل و فه‌رمانه‌یلى وڵاته‌گه‌م كرده‌ قه‌ورسانیگ وه‌جه‌م و له‌یرا وه‌ده‌نگ به‌رز هاوار كه‌م و ئویشم: نه‌بایه‌د ئه‌و قه‌وڵه‌یله‌ داواكاریه‌یل و ناڕه‌زایه‌تیدان له‌ناو بووه‌ید... و چوینكه‌ وه‌رده‌وام بوین له‌ جه‌ختكردن له‌بان ده‌رچوین دیكتاتۆر و خاسسازى ڕیشه‌یى له‌ گشت مه‌یدانیگه‌وه‌ و حساو كتاو كردن و سزاداین ئه‌نجامده‌ره‌یل تاوان  هه‌وه‌جه‌ى هاوه‌ زیاتر جه‌ختكردن و پاداكوتان و ده‌نگ به‌رزه‌وكردن تویڕه‌یى ئه‌را شكانن كۆت و به‌نده‌یل و په‌یابوین خوه‌ر ئازادى نوو له‌ وڵاته‌یلمان ك كریانه‌سه‌ مه‌ته‌ڕێز سه‌ربازى و زندان و سه‌رداب و قه‌ورسانه‌یل ده‌سه‌جه‌مى ك دیكتاتۆره‌یل وه‌ داب و نه‌ریته‌یل قیزه‌وه‌ن نه‌زانى حوكمیان كردیان و حوكمیان كه‌ن.

به‌ڵى... په‌یام ملله‌ته‌یل تویڕه‌ ڕه‌سى و زه‌نگ گۆڕان كوتیا و كه‌س نیه‌تویه‌نى چه‌رخ تاریخ له‌ گڕخواردن بووسنێ و حاكمه‌یلمان بایه‌ته‌ وشیار بوون و له‌وه‌ بڕه‌سنه‌و ك وه‌خت گۆڕان و خاسسازى ڕیشه‌یى هاتیه‌ و بایه‌ته‌ داموده‌زگایه‌یل شارسانى ڕاسكانى دروس یكریه‌ن و گه‌ناته‌كارى له‌ناو بووریه‌ید...

به‌ڵى بایه‌ته‌ له‌ بورجه‌یل عاجى خوه‌یان بدران و ده‌نگ هاوار ملله‌ته‌یلیان بژنه‌فن ك له‌ ژیر كڕ یا خه‌ت هه‌ژارى ژیه‌ن و له‌ رزق و ڕووزى ڕووژانه‌یان پشت وه‌ كوومه‌كه‌یل ناوده‌وڵه‌تى به‌سانه‌ و بى كارى و بیمارى كوشنده‌ چوارده‌وریان گرتیه‌!! و قه‌وڵداین وه‌ به‌رپاكردن چه‌پكیگ خاسسازى گشتى و له‌نواى گشتى ئازادیه‌یل ڕووژنامه‌نویسى نه‌بایه‌د له‌ دویاوه‌خته‌یل گومكریاى بوود، وه‌نه‌ چاره‌نویسیان جوور چاره‌نویس هتله‌ر و مۆسۆلینى و صه‌دام وه‌پى تیه‌ید.

هه‌ڵه‌گه‌ردانن: ماجد سوره‌مێرى