وڵاته‌گه‌م، چووه‌ تویه‌نیمن ئڕاد بكه‌یمن و چووه‌ له‌ لید خوازیمن؟

شفق نيوز

وه‌رانوه‌ریش ئه‌رك و وه‌زیفه‌یلی له‌سه‌ر شانییه‌. ئیمه‌ چوی كورد تا وه‌ ئمڕوو خه‌بات كردیمنه‌ تاكه‌ بتویه‌نیمن خاك و وڵاتمان له‌ ژیر ده‌ستێ داگیر كه‌ره‌یل ئازاد بكه‌یمن و له‌ی ریگه‌یشه‌ تا ڕاده‌یگ سه‌ركه‌فتن وه‌ ده‌سهاوردیمنه‌. تویه‌نستیمنه‌ نیمه‌و ناته‌مام وه‌ڕیوه‌بردن و ئداره‌ی به‌شیگ له‌ خاكێ كوردستان بگریمنه‌و ده‌س و پا بنه‌یمنه‌ كه‌شه‌یگ نوو. كه‌شه‌یگ ك چوی كورد خوه‌مان ته‌جروبه‌ی ده‌سه‌ڵاتداری كوردیی كه‌یمن. له‌ی ڕاستایشه‌ هه‌رسه‌ی ك رویوه‌روی كیشه‌و گرفتێ فره‌یگ بویمنه‌سه‌و وه‌ڵام، له‌چه‌و وڵاته‌یلێ ده‌ورووبه‌ر ك پیشینه‌ی هه‌زاران ساڵ ده‌سه‌ڵاتداری دیرن خاستره‌ك تویه‌نستیمنه‌ بنه‌وا و بناغه‌ی مه‌شقێ ئازادی و دموكراسی دابڕشنیمن و وه‌ره‌و دموكراسی هه‌نگام ئه‌ڵبگریمن. یه‌ جیا له‌وه‌س ك هیمای نه‌ جوگرافیای كوردستان وه‌گشتی دیاره‌ و نه‌ كورد وه‌ گشتی له‌ شوونیگ جوگرافیایی دیار نیشته‌جییه‌، تاكه‌ وه‌ بی ترس و جه‌لدانه‌ كه‌شه‌یلێ ڕه‌سین وه‌ وڵاتیگ ئازاد و دموكرات بووڕیمن. یه‌كیگ له‌و كیشه‌یله‌ ك ئیمه‌ی كورد رویوه‌روی بوویمنه‌سه‌و په‌خش و بڵاوی نه‌ته‌وه‌گه‌مانه‌ وه‌سه‌ر چه‌ن وڵات و ئایین و مه‌زهه‌ب. ئه‌ویش نه‌ له‌ چوارچووه‌ی جوگرافیایگ دیاری كریاگ، به‌ڵكم بڕیگ له‌ ئیمه‌ی كورد ك كه‌فتیه‌سه‌و ژیر ده‌سه‌ڵاتێ هه‌ر وڵاتیگ، وه‌ هه‌ر بوتیگ بویه‌ كوردستان وه‌ جی هیشتیمنه‌و له‌ شاره‌یلێ تره‌كێ ئه‌و وڵاته‌ نیشته‌جیی بوویمنه‌. وه‌ تایوه‌ت پایته‌خته‌یلی چووی به‌غدا و ده‌مشق و ته‌یران و شارێ گه‌ورایگ چووی ئه‌سته‌مبووڵ. ئه‌و كورده‌یله‌ ك له‌و چنه‌ شوونه‌یلی گیرسیانه‌سه‌و هه‌میشه‌ چه‌ویان له‌و شوونه‌سه‌ ك له‌ لی هاتنه‌ یانی خاكێ كوردستان. ته‌نانه‌ت فره‌جاریش توویه‌نستنه‌ هاز و قه‌وه‌یگ خاس بوون ئڕا جمشتێ ڕزگاری خوازانه‌ی نه‌ته‌وه‌گه‌مان و فره‌ له‌ كاره‌یلێ ته‌شكیلاتی و پشتپه‌ڵیی مادی و ئه‌منیه‌تی حزبه‌یلێ كوردی له‌ لایه‌ن ئه‌و كورده‌یله‌ جیوه‌جیكریاس. وه‌ڵام وه‌ گوزه‌رێ زه‌مان و تایبه‌تمه‌ندیی كه‌سه‌یل، كه‌سایه‌تی هه‌ر یه‌ك له‌ ئیمه‌ی كورد له‌و چنه‌ شوونه‌یلی كه‌فیدنه‌و ژیر كاریگه‌ری و ته‌ئسیرێ داب و نه‌ریت و كرده‌وه‌ و ره‌فتێ مه‌ردمێ ئه‌و شوونه‌. هه‌رله‌یوا په‌یوه‌ندیه‌یلێ مادی و مه‌عنه‌ویگ ك له‌ هه‌ر شوونیگ ئنسانه‌یل گریه‌ ده‌یدنه‌ یه‌كه‌و. هه‌ر وه‌ی بووته‌و نیه‌ودن له‌كوردیگ ك ده‌یان ساڵ دویر له‌ كوردستان ژیاس چووی ئه‌و كورده‌ نووڕس ك ته‌مامی ژیانی له‌ كوردستان بویه‌. چوویه‌نیه‌تی باروگوزه‌رانێ ژیان كار كه‌یدنه‌ شیوه‌ی نووڕستنێ هه‌ریه‌ك له‌ ئیمه‌ نسبه‌ت وه‌ ئه‌و چشته‌یله‌ ك رووژانه‌ روویه‌رووی بوویمنه‌و. كوردێ دوویره‌ وڵات دایم چه‌وی له‌و میلكانه‌سه‌ ك له‌ لیی هاتییه‌، وه‌ڵام ك له‌ دوویای ماوه‌یگ دوویر كه‌فتنه‌وه‌ وه‌ هه‌زاران ئومید و ئاره‌زوو ئه‌ڵگه‌ردیه‌یدنه‌و، دیوویندن نه‌خه‌یر ئی میلكانه‌ میلكانه‌گه‌ی جاران نییه‌، نه‌ كه‌سی ناسی و نه‌ كه‌سی ئه‌و ناسی. یه‌ كیشه‌یگه‌ ك تا وه‌ ئیرنگه‌ فره‌ كه‌س له‌ ئیمه‌ توویشی بوویمنه‌ و دڵنه‌گه‌ران و په‌شیو له‌ تیی گوه‌زه‌ر كردیمنه‌.

وه‌لى ئایا وه‌ی گشته‌ پیشكه‌فتنه‌ نیه‌تویه‌نیم ڕیگه‌ چاره‌یگ په‌یدا بكه‌یمن ئڕا ئه‌وه‌ی ك دی له‌ خاك و نیشتمانێ خوه‌مان ك هه‌زاران یاده‌وه‌ری خوه‌ش و ناخوه‌ش له‌ لی دیریمن ئڕا هه‌میشه‌ نه‌وڕیه‌یمن و هه‌ست وه‌ ناموویی و غه‌ریبی نه‌كه‌یمن؟ چوی كوردیگ چووه‌ بكه‌یمن ئڕا ئه‌وه‌ی ئه‌رك و وه‌زیفه‌یلمان وه‌ جی باریمن هه‌رسه‌ی دویر له‌ كوردستانیش بوویمن؟ چه‌وه‌نووڕیمانیش له‌ كوردستان چووه‌س چووه‌ له‌ لیان خوازیمن؟ له‌ سه‌ركردایه‌تی گرتییه‌ تا مه‌ردمێ ئاسایی؟ هاوڵاتی عه‌زیزێ كوردم ك له‌ خاكێ كوردستان دابڕیایدنه‌ ئڕا ئه‌وه‌ی هه‌میشه‌ كورد بمینیه‌یمن و كوردستان ئومید و په‌ناگامان بوود، بایس ئه‌ركه‌یلی ك وه‌رانوه‌ر وه‌ وڵاته‌گه‌مان له‌سه‌ر شانمانه‌ بناسیمن و وه‌ جی باریمنه‌یان.

له‌ وه‌رانوه‌ریش چه‌وه‌نووڕیه‌یلمان له‌ كوردستان بخه‌یمنه‌ روی و له‌ لیی بتوایمن، هه‌ر ئه‌و جووره‌ی ك ئه‌و له‌ ئیمه‌ چه‌وه‌ڕی كه‌ی چوی كوردیگ له‌ به‌غدا ده‌نگ بیه‌یمن و له‌ ناو ئه‌و دونیای پڕ له‌ كشمه‌كشێ به‌غدا و له‌ ناو ئه‌و گشته‌ عه‌ره‌بێ شیعه‌ و سونی توندڕه‌وه‌ سه‌نگێ كورد بیه‌یم له‌ سینه‌، ئیمه‌یش له‌ ئه‌و بتوایمن ك چووه‌ توایمن و چه‌وه‌نووڕیمان له‌ ئه‌و چووه‌س؟

ئڕا هه‌ر حزبیگ له‌ كوردستان چه‌ن كاناڵێ ئاسمانی بیاشتوود ته‌نانه‌ت ك بازیگ له‌وانه‌ بی ئه‌وه‌ی بتویه‌نن رووشنای بخه‌نه‌سه‌ر كیشه‌و گرفتیگ، كومه‌ڵگای كوردیش له‌ كوردایه‌تی دوویره‌و خه‌ن!. وه‌ڵام ئیمه‌ ك هایمنه‌ قوڵتیه‌سه‌ی جه‌نگه‌گه‌ كاناڵیگ ئاسمانی نه‌یاشتوویمن ك باس له‌ حاڵ و گوزه‌ران و شیوه‌زار و میژوومان بكه‌یدن و بوودنه‌ وه‌سیله‌یگ ئڕا گرده‌و كردنمان له‌ ده‌ورێ یه‌ك؟

ئڕا له‌ كاناڵه‌یلێ ئاسمانی كوردستان كه‌سی نه‌ ده‌نگمان ئه‌ژنه‌فی و نه‌ ڕه‌نگمان دووینی؟ وه‌ڵام...