له‌ليداينيگ تر له‌ عه‌ره‌ب سنی وه‌ده‌س خالد عوبێدی

شفق نيوز

له‌ی ماوه‌ی دوياخره‌ كرده‌وه‌يل واقع ڕيز له‌لیگيرياگ بوی وه‌ لێدوانه‌يل خالد عوبێدی و تويه‌نست لايه‌نگری و پشتگيری له‌ لايه‌نه‌يليگ شيعه‌ی عه‌مامه‌ وه‌سه‌ر و لايه‌نه‌يليگ تر وه‌ده‌س بارێد.

ته‌سليم پۆست وه‌زير وه‌رگری وه‌ خالد عوبێدی وه‌ ئه‌وه‌گ له‌ عه‌ره‌ب سنی بوی تا نه‌خشه‌يگ پيشكه‌ش بكا ك سوپای عراقی گشت پيكهاته‌يل ملله‌ت عراقی ئه‌گرێده‌و، يه‌يش جوور ئه‌وه‌گ ئاشكراس ك ئی وزاره‌ته‌ له‌ گشت ده‌وڵه‌ته‌يل جه‌هان گرينگی خوه‌ی ديرێد، وه‌تايبه‌ت له‌ی چنه‌ باريگ ك هاته‌سه‌ تويش عراق، هه‌ر وه‌و خاتريشه‌ ئه‌و پۆسته‌ گرنگی فريه‌يگ ديرێد ئه‌را ئاينده‌ی عراق و هه‌ر له‌وه‌ر ئه‌وه‌يش له‌يوا له‌و كه‌سه‌ ئه‌كا ك ته‌كليف وه‌ وه‌رگرتن ئه‌و پۆسته‌ كرياگه‌ وه‌ چه‌و ئعتباره‌و ته‌ماشای خواست عراقيه‌يل بكاو نه‌بايه‌د ئه‌را زوورمينه‌ی شيعه‌ی فه‌رمانڕه‌وا له‌ عراق و ئيران لايه‌نگری ئی پۆست و پايه‌ی گرينگه‌ بيلنه‌و وه‌بی به‌رژه‌وه‌ندی.

ئمجا له‌وه‌ر ئه‌وه‌گ روی وه‌ڕوی بوينه‌وه‌ی داعش له‌ ناوچه‌يل عه‌ره‌ب سنی و له‌وانه‌يش شار موسڵ شوون له‌داڵگبوين خالد عوبێديه‌، ئی مه‌سه‌له‌يشه‌ له‌يوا كرد هه‌ڵوژريه‌ێد ئه‌را وه‌رگرتن ئی پۆسته‌و له‌ واجهه‌ بوود له‌وه‌رده‌م هه‌ر ده‌سدريژييگ ئنسانی ك بايده‌ تويش ناوچه‌گه‌.

له‌يرا نهێنی ته‌سليمكردن ئی پۆست وزاريه‌ وه‌ عه‌ره‌ب سنی ده‌ركه‌فێد و شايه‌ت له‌ ئاينده‌ی نزيكيگيش دويره‌و بخريه‌ێد له‌شوون كووتاييهاتن وه‌ مه‌سه‌له‌ی ئازادكردن ناوچه‌يل سنی نشين له‌ داعش، مه‌گه‌ر له‌ حاڵه‌تيگ خالد عوبێدی وه‌رده‌وام بدێ و ئسپات مه‌يلداری خوه‌ی كرد ئه‌را ئه‌جنده‌ی ئيرانی له‌وه‌رانوه‌ر مقه‌يه‌تيكردنی وه‌ پۆسته‌گه‌، ئمجا له‌وه‌ر ئه‌وه‌گ يه‌كيگه‌ له‌ ئه‌فسه‌ره‌يل سوپای وه‌رين عراقی له‌ سه‌رده‌م رژيم سه‌دام ئه‌گه‌ره‌يل فريه‌يگ ديرێد مساومه‌ بكريه‌ێد ئه‌را وازهاوردن پۆسته‌گه‌ له‌ وه‌رانوه‌ر فه‌زيحه‌ت نه‌كردن و ده‌رنه‌خستن لاپه‌ڕه‌يلی، ئی مه‌سه‌له‌يشه‌ بويه‌ نه‌ريتيگ له‌ حكومه‌ت ناوه‌ندی و حزبه‌يلی و هه‌ر لايه‌نيگ دوسيه‌يليگ ديرێد دژ لايه‌نه‌يل تر و مقه‌يه‌تی له‌لی ئه‌كا تا له‌وه‌خت هه‌وه‌جه‌ بارێده‌ كار، يه‌يش له‌يوا كردگه‌ چه‌ودێره‌يل و شيه‌وكه‌ره‌يل سياسی پرسيار هووكار بيده‌نگبوين خالد عوبێدی بكه‌ن وه‌رجه‌ داوه‌تكردنی ئه‌را ميوانداری له‌ په‌رله‌مان عراقی و ناوزڕانن لايه‌نه‌يليگ دياريكرياگ، ك هه‌رچه‌نی له‌ وته‌يليشی هه‌وڵ ئه‌وه‌دا باس لايه‌نه‌يليگ بكا له‌وه‌ر گومان نه‌كرن له‌بان بنه‌ڕه‌ت هه‌ڵويسته‌گه‌و ده‌سوه‌شاننيگ له‌ كزترين هه‌ڵقه‌يگ له‌ په‌رله‌مان و حكومه‌ت ناوه‌ندی ك ئه‌ويش عه‌ره‌ب سنی بوی، ئمجا له‌يرا پرسياريگ ديرم ئه‌را گرينگيده‌ره‌يل وه‌ ميوانداريكردن خالد عوبێدی له‌ په‌رله‌مان: ك ئايا ئه‌راچه‌ خالد عوبێدی هه‌نای ناو نوری مالكی برد وه‌پی وتياد براو وه‌گشت وه‌رپرسيارێتی و حورمه‌تيگه‌و ناوی بردێاد؟!

د . سوزان ئامێدی