كورد و ئه‌سپ سوارى

شفق نيوز

له‌هه‌مان وه‌خت تویه‌نیم بویشیم مه‌سه‌له‌ى ئه‌سپ سوارى چیه‌سه‌ ناو كلتوور كورده‌وارى و تاریخیگ له‌ى باوه‌ته‌وه‌ توومار كردگه‌. ك یه‌یش تا وه‌ختیگ ته‌كنۆلۆجیاى تازه‌ جویر سه‌یاره‌و هووكاره‌یل جیوازكردن جویر ئیسه‌ نه‌وى و تانزیك ساڵه‌یل شه‌س و هه‌فتاى سه‌ده‌ى وه‌رینیش له‌ئاواییگ مه‌گه‌ر ته‌نیا سه‌یاره‌یگ وجوود بیاشاتاگ وه‌ك(جێب رووسى و سه‌یاره‌ى دۆج ئه‌مریكى یا فۆڵگه‌و سه‌یاره‌یلیگ ئه‌ڵمانى كویه‌ن)، ئنجا دوینسید مه‌ردم وه‌ ئه‌سپه‌وه‌ هاتوچوو شار و ئاوایه‌یل تر كردیان و له‌هه‌مان وه‌خت مه‌ردم كورد فره‌یگ له‌لیان كارو كاسبییش هه‌ر وه‌ئه‌سپ كردیان و له‌ڕى ئه‌سپه‌وه‌ تویه‌نستیان درامه‌تیگ بارنه‌ ده‌س ئه‌را ژیان خیزانه‌یلیان. وه‌لى دى له‌وساوه‌ تائیسه‌ كه‌مه‌ كه‌مه‌ مه‌سه‌له‌ى ئه‌سپ سوارى و ئه‌سپدارى روى له‌كزى كردو ته‌كنۆلۆجیاى تازه‌ شوونى گرت.

بیجگه‌ ئه‌وه‌یش ئه‌سپ هه‌میشه‌ خزمه‌ت وه‌ملله‌ت كورد كردگه‌ له‌ سه‌رده‌مه‌یل كویه‌ن و جیاجیاو فره‌جار له‌جموجویل رزگاریخواز كورد وه‌ ئه‌سپه‌وه‌ هه‌ر په‌یامیگ بویاتاگ هه‌ڵه‌په‌ڵه‌ ره‌سیاگه‌ شوون مه‌به‌س و ته‌نانه‌ت ئه‌سپ وه‌كاریش هاوریاگه‌ له‌ جه‌نگ و شووڕشه‌یلیش.

ئه‌سپ له‌ڕوى وه‌فادارییشه‌وه‌، ئه‌و سفه‌ت جوانه‌ دیریگ  ك وه‌فاداره‌ ئه‌را خاوه‌ن خوه‌ى و شاره‌زایه‌یل له‌یوا باس كه‌ن ك گوایا به‌عزه‌ جاریگ جویر ئاده‌میزادیش خفه‌ت خوه‌یگ  و ئه‌را هه‌ر شكه‌ستیگ یا له‌وه‌خت له‌ده‌سداین سواره‌گه‌ى كزى و په‌شیوى وه‌پیه‌وه‌ دیاره‌و له‌لیانیش هه‌س گیریگ . ئه‌وسا له‌سه‌رده‌م كویه‌ن ئه‌سپ سواره‌یل وه‌ختى سوار ئه‌سپه‌یلیان بویان له‌لاى چه‌په‌وه‌ پا خستیانه‌ ڕكاو ئه‌را سواربوین، ك یه‌یش هووكارى ئه‌وه‌ بویه‌ ئى نه‌ریته‌ چووگه‌وه‌ ئه‌را چه‌نه‌ها سه‌ده‌ وه‌رجه‌ ئیسه‌و له‌ى باوه‌ته‌وه‌ داستانیگ توومار كریاگه‌و له‌وه‌رجه‌ سه‌ده‌ها ساڵ ئه‌سپ له‌جه‌نگ هاوریاسه‌ كار و له‌و جه‌نگیشه‌ شمشیر چه‌ك سه‌ره‌كى بویه‌، ئنجا پیاوه‌یل ده‌سڕاسیش شمشیره‌یلیان كردیانه‌ لاى چپیانه‌وه‌ ئه‌را ئه‌وه‌ك بتویه‌نن وه‌ده‌س ڕاسیان یه‌كسه‌ر شمشیره‌گه‌ هه‌ڵكیشن، هه‌ر له‌وه‌ر ئه‌وه‌یش تویه‌نستنه‌ وه‌ئاسانى پاى ڕاسى به‌رزه‌و بكا له‌وه‌خت سواربوین ئه‌سپ، دى وه‌و جووریشه‌ شمشیره‌گه‌ى نه‌ویه‌سه‌ ڕیگر له‌وه‌خت سواربوینى و هه‌ر له‌وه‌ر ئه‌وه‌یش ئه‌سپ سواره‌یل له‌ دیم چه‌په‌وه‌ سوار ئه‌سپه‌یلیان بویان. بیجگه‌ ئه‌وه‌یش ئیسه‌ ئه‌سپ سوارى وه‌رزشیگه‌ له‌گشت وڵاته‌یل دونیا. وه‌لى دوینید فره‌جار مه‌سه‌له‌ى ئه‌سپ سوارى كه‌سیگ توایگ  شاره‌زایى داشتووگ له‌لى و زویتر مه‌شق كاره‌گه‌ كردویگ و له‌هه‌مان وه‌خت بایه‌سه‌ جورئه‌ت خاسیگ داشتووگ و چه‌ن جاریگ هه‌وڵ بیه‌یگ تا وه‌ته‌واوى هووكاره‌ى ئه‌سپ سوارى بوود. پیشینه‌یل خوه‌مانیش وتنه‌(سوار تا نه‌كه‌فیگ نیه‌وگه‌ سوار).

 

ج. عه‌لى میرى