ئه‌و غه‌ڵه‌ته‌یله‌ ك بوونه‌ مایه‌ى له‌ده‌سداین ئه‌زره‌ته‌یلمان

شفق نيوز

له‌ شه‌كه‌تى و هه‌وڵداین ئه‌یه‌ێده‌ دى، وه‌لى له‌هه‌مان وه‌خت تویش غه‌ڵه‌ته‌یلیگ  ئه‌یه‌یم ك بوونه‌ رێگر له‌ وه‌دیهاوردن ئه‌زره‌ته‌یلمان و جارجاریگیش بووده‌ مایه‌ى له‌ده‌سداین ئه‌زره‌ته‌یل.

 

ئمجا له‌یره‌ تویه‌نیم بڕێگ له‌و هووكاره‌یله‌ ده‌سنیشان بكه‌یم، جوور:

 

* شیوانن ئه‌زره‌ت مه‌ردمان تر: له‌وه‌ختیگ ئیمه‌ ره‌شبین بویمن وه‌رانوه‌ر هاتنه‌دى ئه‌زره‌ت مه‌ردمان تر، ئه‌وه‌ دوینید وه‌شیوه‌ى خراویگ كار ئه‌كاده‌ بان ئه‌زره‌ته‌یل خوه‌مان، هه‌ر له‌وه‌ر ئه‌وه‌یش بایه‌د ئه‌را ئه‌زره‌ته‌یل خوه‌مان بژیه‌یم له‌جیاى ئه‌وه‌ك له‌وه‌ر خاتر شیوانن ئه‌زره‌ت مه‌ردم ده‌وروه‌ر بژیه‌یم.

 

* بى توانایى: گه‌وراترین كێشه‌ له‌وه‌خت هه‌وڵداین ئه‌را وه‌دیهاوردن ئه‌زره‌ته‌یل، بى تواناییه‌. ئه‌ویش له‌وه‌ختیگ ك تاك تواناى كه‌مه‌و بوود له‌ئاست ئه‌و داواكاریه‌یله‌ ك ئه‌یه‌یده‌ وه‌رده‌مى له‌وه‌خت ته‌قالاكردن ئه‌را وه‌دیهاتن ئه‌زره‌ته‌یلى، هه‌ر له‌وه‌ر ئه‌وه‌یش بایه‌د وه‌رده‌وام بویمن له‌بان هه‌وڵداین و هویچ وه‌ختیگ نائومید نه‌ویمن. چوینكه‌ مومكن له‌ مه‌حاڵ پرسى له‌ كووره‌ ژیه‌ید؟ مه‌حاڵ جوواوى داو وت: له‌ ئه‌زره‌ت كه‌سه‌یل بى توانا ژیه‌م.

 

*- نه‌زانین ئه‌زره‌ته‌یل هه‌ر له‌ بنه‌ماوه‌: یه‌یش وه‌ختیگه‌ ك هه‌م خوه‌مان و هه‌میش مه‌ردم هه‌ڵخه‌ڵه‌تنیم وه‌ ئه‌وه‌ك ئه‌زره‌تیگ دیریم و ته‌قالا ئه‌راى كه‌یم، وه‌لى نووڕید له‌ بنه‌ماوه‌ نیه‌زانیم ئه‌زره‌ت چه‌س، جوور ئه‌وه‌ك ئه‌نیس مه‌نسور ئویشید: سه‌ركه‌فتند پشت به‌سێده‌ ئه‌زره‌ته‌یلد، وه‌لى نه‌ك ئه‌زره‌ت وه‌خته‌یل خه‌و، به‌ڵكوو ئه‌زره‌ت وه‌ ئاگا.

 

* گومبوین ئازایه‌تى ئه‌زره‌ت: نووڕید ئیمه‌ ئه‌زره‌ته‌یلمان له‌ده‌س ئه‌یه‌یم له‌وه‌خت ته‌قالاكردنمان ئه‌را وه‌دیهاوردنیان، ك ئه‌ویش له‌وه‌ر گومبوین ئازایه‌تى ئه‌را وه‌رده‌وامبوین ئه‌زره‌ته‌یلمان. ئمجا واڵت دیزنى ئویشید: تویه‌نریه‌ید گشت ئه‌زره‌ته‌یلمان باێده‌ دى ئه‌گه‌ر ئازایه‌تى داشتویم ئه‌را وه‌رده‌وامبوین.

 

* وسیان له‌وه‌ر خاتر كه‌سه‌یلیگ تا ئه‌زره‌ته‌یلمان بانه‌ دى: فره‌جار هه‌س دوینید كه‌فیمنه‌ ئه‌و غه‌ڵه‌ته‌ ك ئه‌زره‌ته‌یلمان وسنیمن له‌وه‌ر خاتر كه‌سه‌یلیگ له‌ ژیانمان، ك بیگومان یه‌یش بووده‌ مایه‌ى وسیان و له‌كیس چین ئه‌زره‌ته‌یلمان.

 

هه‌ر له‌وه‌ر ئه‌وه‌یش بایه‌د وه‌رده‌وام ته‌قالا ئه‌را وه‌دیهاوردن ئه‌زره‌ته‌یلد بكه‌ید ك هه‌رچه‌نى وه‌ته‌نیایش بوید، چوینكه‌ جوور ئه‌وه‌ك ئاشكراس ئه‌گه‌ر كه‌سیگ ئه‌زره‌ت نه‌یاشت ئه‌وه‌ خوه‌شى و ماناى ژیانیش نیه‌زانێد.

 

رێناس ساڵح

ج. ا