2300 خوه‌يكوش ديارى برايه‌يل عه‌ره‌ب بوى ئه‌را ملله‌ت عراقى

شفق نيوز

ئمجا زوورم ئه‌و كرده‌وه‌يل خوه‌يكوشيه‌ ك باس كريا له‌ بازاڕه‌يل و مزگفته‌يل و حسه‌ينيه‌يل و له‌ناو پرسه‌خوه‌نين و مه‌زارگه‌و جاده‌يل و شوونه‌يل قه‌ره‌باڵغ روێداو هويچ بنگه‌يليگ سه‌ربازى بيگانه‌ يا عراقى يا ده‌زگايه‌يل ئاسايشى و هه‌واڵگرى نه‌گرته‌و.

ئه‌و برايه‌يل خوه‌يكوش عه‌ره‌به‌ له‌ عراق سه‌ر وه‌ جه‌ماعه‌ت وه‌هابى و ته‌كفيرى بوين وه‌گشت ناوه‌يل جياجياو له‌وانه‌يش قاعيده‌و داعش، وه‌لى ئنتماى نيشتمانييان وه‌ى جووره‌ بوى:

فلستينيه‌يل(1300) خوه‌يكوش

سعوديه‌يل(350 ) خوه‌يكوش

يه‌مه‌نى(270 ) خوه‌يكوش

سوورى (210 ) خوه‌يكوش

تونسى (45 ) خوه‌يكوش

مسرى (95) خوه‌يكوش

ليبى (40 ) خوه‌يكوش

جه‌زايرى و مۆريتانى و به‌حره‌ينى و قه‌ته‌رى و لوبنانى و له‌ باقى وڵاته‌يل تر عه‌ره‌بى(40) خوه‌يكوش تر.

برايه‌يل عه‌ره‌ب وه‌ى قوربانيه‌يل جياى خويناويه‌ تويه‌نستن ئامانج "نه‌ته‌وه‌ى عه‌ره‌ب يه‌كيگه"‌ بارنه‌ دى و مه‌رزه‌يل جوگرافى له‌ شام تا به‌غدا لاوه‌ن و له‌ نه‌جده‌و تا يه‌مه‌ن و شوونه‌يل تر. وه‌لێ چه‌وديره‌يل ئه‌پرسن: ئه‌راچه‌ خوه‌يكوشه‌يل مكوڕن له‌بان جيوه‌جيكردن ئامانج يه‌كگرتگى عه‌ره‌بى و ئسلامى ته‌نيا له‌ عراق و دژ مه‌ده‌نيه‌يل عراقى؟!

ئه‌ى له‌وه‌رچه‌ ئى ئامانجه‌يله‌ له‌ وڵاته‌يل داگيركرياگ موسڵمانه‌يل جيوه‌جى ناكه‌ن و له‌وانه‌يش فلستين داگيركرياگ ك رووژانه‌ وه‌ده‌س سايۆنيزم كوشيه‌ن؟! ئايا چه‌ بوياد ئه‌گه‌ر ئه‌و 1300 خوه‌يكوش فلستينيه‌ خوه‌يان شه‌هيد بكرديان له‌بان‌ وڵاته‌گه‌ى خوه‌يان دژ ده‌زگايه‌يل سه‌ربازى داگيركه‌ر؟!

د . عه‌لى ئه‌لموئمن