كابينه‌ی هه‌فتم و كه‌ناڵيگ نيشتمانی

شفق نيوز

نه‌خش گرنگيگ ديرێ له‌ كومه‌ڵگا و ئی نه‌خشيشه‌ يا كاريگه‌ریيگ ئه‌رێنی يا نه‌رێنی ديرێد. له‌ سيستم و ده‌سه‌ڵاته‌يل ديكتاتۆری و دژه‌ مه‌ردمی، ره‌سانن وه‌ته‌واوه‌تی ها له‌ خزمه‌ت حكوومه‌ت و گشت كار و كرداره‌يلی ها ژێر چه‌وديری و له‌ڕێ ميدياگه‌ی، هويره‌يل خراوكارانه‌و دژه‌ مه‌ردمی خوه‌ی بڵاوه‌و ئه‌كا. وه‌لی له‌ سيستمه‌يل ديموكراتی، ره‌سانن له‌جياتی ئه‌وه‌گ بووده‌ که‌ره‌سته‌ێگ تایبه‌ت ئه‌را پڕو پاگه‌نده‌ و وه‌ربڵاوه‌وكردن ده‌سه‌ڵات ده‌وڵه‌ت، ئه‌رک گرنگتریگ هابان‌ شانی‌. له‌سیسته‌مه‌يل ديموکرات، ئه‌رک ميديا ئه‌وه‌سه‌ ک‌ هه‌ر کرده‌وه و كردار و هه‌ڵس و بنيشيگ ده‌وڵه‌ت و ده‌سه‌ڵات بخاده‌ ژێر چه‌وديری و وه‌ بێ سڵ کردن له‌ ده‌سه‌ڵات، کار خـوه‌ی بکاو زانیاری و كاری ئاگاداری ره‌ساننه‌ وه‌ مه‌ردم و بووده‌ تریبوونیگ ئازاد ئه‌را بـــاسـه‌يل سیاسی و کێشه‌يل کوومه‌ڵایه‌تی و ئابووری و زانستی و ته‌قالاكردن ئه‌را دروس کردن ده‌رفه‌تيگ ئه‌را ره‌سانن ده‌نگ و خـواست مه‌ردم وه‌ هویروڕای گشتی و فشار خستنه‌ بان ده‌وڵه‌ت و ده‌سه‌ڵات ئه‌را ئه‌دای خاستر و خزمه‌ت فره‌تر وه‌ هاووڵاتييه‌يل. ئه‌وه‌گ جی باسه‌‌ و بـايه‌د له‌ وه‌رچه‌و بگیريه‌ێ ئه‌وه‌سه‌ ک‌، مێـدیـا يا‌ ره‌سانـن، ئه‌و وه‌خته‌ ئه‌‌تويه‌نێ ئه‌رک خوه‌ی وه‌ شێوه‌ێگ ته‌و‌او و ديموکراسیانه‌ بوه‌ێده‌ڕێ، ک‌ وه‌ ته‌واوی سه‌روه‌خـوه‌ی بــوود و له‌ ده‌سه‌ڵات ده‌سه‌ڵاتدار و به‌رژه‌وه‌ندی هه‌ر لايه‌ن و حزب و كه‌سێگ دوير بوود. ميديا مقه‌يه‌تیكه‌ر به‌رژه‌وه‌ندی گشتييه‌، هه‌ر وه‌يخاتره‌ بايه‌د راسگو بوود و وه‌شيوه‌يگ سه‌روه‌خوه‌ی و بێ لايه‌نانه‌ كار خوه‌ی بكا. ئمجا له هه‌رێم كوردستان كه‌ خاوه‌ن سيسته‌ميگ ديموكراتيه‌، سه‌ره‌ڕای ئه‌وه‌گ ده‌يان كه‌ناڵ ميديايی ديريمن ك سه‌ر وه‌ پارت و لايه‌ن و سياسه‌تمه‌داره‌يل و بازرگانه‌يلن و ته‌نانه‌ت چه‌ن ده‌نگيگيانيش سه‌ر وڵاته‌يل بێگانه‌ن، وه‌لی وه‌داخه‌و تا ئيسه‌ ميديايگ نيشتمانی سه‌روه‌خوه‌ی نه‌يريمن ك بتويه‌نێد له‌ كه‌شيگ ديموكراسی و ئازاد ئه‌را به‌رژوه‌ندی گشتی ملله‌ت كوردستان ك گشت لايگمان گرێده‌و كار بكا. پارته‌يل سياسی له‌ وڵاته‌يل ئه‌ورۆپی ئه‌و مافه‌‌ نه‌يرن ك كه‌ناڵيگ ئاسمانی يا مه‌حه‌لی يا راديۆيی داشتوون و هه‌ر كاميان ته‌نيا تويه‌نن له‌ڕێ رووژنامه‌يگ ده‌ربكه‌ن و ئه‌را به‌رژه‌وه‌ندی پارته‌گه‌يان نه‌ف له‌لی وه‌ربگرن، وه‌لی له‌ كوردستان ئيمه‌ ميديا له‌لايه‌ن پارته‌يل سياسيه‌وه‌ كۆنترۆڵ و وه‌ڕێه‌و بريه‌ن. هه‌رچه‌ن بايه‌د ئه‌وه‌ له‌هويره‌و نه‌وه‌يمن ك سه‌رده‌ميگ ئه‌را ئيمه‌ی كورد ئی كه‌ناڵه‌يل حزبيه‌ گرنگی و ڕۆڵ گه‌ورايگ داشتن. وه‌لی ئيمه‌ ئيسه خاون حكوومه‌ت و په‌رله‌مان و دامه‌زرياگه‌يل حكووميمن و بايه‌د ميدياگه‌مانيش وه‌ل ئی قوناغمانه‌ بگونجيه‌ێد و ئيمه‌ ئيسه‌ له‌ كوردستان هه‌وه‌جه‌ وه‌ كه‌ناڵيگ نيشتمانی وه‌ هه‌ر سێ شێوه‌ی (دوينرياگ، ژنه‌فرياگ، نويسرياگ) ديريمن، وه‌لی ئايا كابينه‌ی هه‌فتم حكوومه‌ت هه‌رێم كوردستان وه‌ سه‌رۆكايه‌تی نێچيرڤان بارزانی تويه‌نێد ئی كه‌ناڵ نيشتمانيه‌ دابمه‌زرنێ؟!    ‌