سیاسه‌ت جوور پیشه‌

شفق نيوز

  سه‌رتا بایه‌سه‌ ئاماژه‌ وه‌ ئه‌وه‌ بكه‌یم ك سیاسه‌ت وه‌ دریژایى تاریخ ئۆرپا، وه‌ داینه‌مۆ پیكه‌فتن كوومه‌ڵایه‌تیه‌یل دانریه‌ید، سیاسه‌ت وه‌رجه‌ ئه‌وه‌ك پایه‌یگ دیاریكریاك داشتوود له‌ كوومه‌ڵگا، وه‌زیفه‌یگه‌ گرینگ له‌ ڕوى بونیادو پیكهاته‌ى كوومه‌ڵگا وه‌ گشتى.

له‌ دونیاى وه‌رجه‌ مۆدێرن، سیاسه‌ت وه‌ ئاراسته‌ى دژه‌ خاسسازى و دژه‌ ئازادى و دژه‌ دیموكراسیه‌ت كار له‌بان كوومه‌ڵگا كردیاد، وه‌لى دویاى شووڕشه‌یل یه‌ك له‌ شوون یه‌ك دى وه‌زیفه‌ى سیاسه‌ت ئاڵشت بوى وه‌ ئاراسته‌ى وه‌پیشه‌بوینى و سه‌روه‌خوه‌ییبونى له‌وه‌ر خزمه‌ت كوومه‌ڵگاو هونه‌ر وه‌ڕیه‌وبردن ده‌وڵه‌ت.

سیاسه‌ت پیهاتگه‌ له‌ خه‌رجكردن توانایگ بى وینه‌ وه‌ ئامانج به‌شداریكردن له‌ ده‌سڵات، هه‌ر له‌وه‌ر ئه‌وه‌یش كه‌س سیاسى له‌لاى "ماكس ڤیبه‌ر" پیكهاتگه‌ له‌و ئاده‌میزاده‌ ك مه‌شق كاریگ گشتى ئه‌كا وه‌ مه‌رام وه‌رگرتن ده‌سڵات و ئاره‌زووكردن ئه‌را ده‌سڵات.

وه‌ باوه‌ڕ ئه‌و زانا مه‌سه‌له‌ى سیاسه‌تكردن یا ئه‌وه‌سه‌ ئامێریگه‌ ئه‌را ئامانجیگ نموونه‌یى یا خودخواستى یا ئه‌را له‌زه‌تبردن، وه‌لى سیاسه‌ت بڕیگ نموونه‌ى باڵا پیشكه‌ش ئه‌كاده‌ كوومه‌ڵگاو بایه‌سه‌ له‌بان پیاو سیاسى ته‌نیا مه‌شق كار سیاسى نه‌كا جوور پابه‌ندبوین وه‌ بانگه‌واز و په‌یامه‌گه‌ى، به‌ڵكوو بایه‌سه‌ له‌وه‌رانوه‌ر كاره‌یل سیاسیه‌گه‌یشى مه‌شق ئداره‌ بكا وه‌ شیوازیگ ناحزبى.

ئنجا له‌یرا ڤیبه‌ر سه‌ركه‌فتن حكوومه‌ت و ده‌سڵات په‌یوه‌س ئه‌كاده‌ جیاكردنه‌وه‌ى حزب له‌ گشت مه‌سه‌له‌یل ئدارى، ك تویه‌نیم بویشیم مقه‌یه‌تیكردن گه‌ورایى و پله‌و پایه‌ى وه‌زیفى پیكهاتگه‌ له‌ دویره‌وخستن ئنتماى حزبى له‌ ئداره‌كردن، چوینكه‌ وه‌رپرسیار گه‌ورا مه‌رج سه‌ركه‌فتنى ئه‌وه‌سه‌ ك سیاسییگ وه‌پیشه‌ بوود.

حكمه‌ت نامى

ج . أ