عراق بچوو له‌ جامه‌ك ته‌ماشاى خوه‌د بكه‌

شفق نيوز

كۆنترۆڵ سیاسى و ئابوورى خوه‌ى و شوورش به‌رپا كرد، هه‌ر له‌و وه‌خته‌و عراقیه‌یل له‌بان خاڵه‌یل وشكانن سوپاى بریتانیا مه‌شق له‌بان تازه‌ترین چه‌ك بریتانیا كردیان، دویاخریش هه‌ردوگلا وه‌یه‌كه‌وه‌ په‌لامار كوردستان دان، یه‌یش بیجگه‌ ئه‌وه‌ك یه‌كه‌م حكوومه‌ت له‌تاریخ سیاسى كورد له‌ناو بردن و تاڵانى فره‌یگیش ئه‌نجام دان.

دویاى ئه‌وه‌یش له‌ژیر ئامووژگارى و تواناى لۆجیستى و سه‌ربازى و ئدارى و سه‌رپه‌رشتى راسه‌وخۆ جه‌نراڵ و سه‌ركرده‌یل سه‌ربازى و هه‌واڵگرى بریتانى ده‌وڵه‌ت عراق بنیات نریا، هه‌ر له‌لایه‌ن خود ئه‌وانه‌وه‌ پیاویگ له‌ هووز هاشمیه‌یل له‌ ئوردنه‌و هاوردن و كردنه‌ى پاشاى عراق ك ملله‌ت سوریا وه‌پى رازى نه‌وین، دى ئه‌و ده‌وڵه‌ته‌ ك ناوى نریا عراق به‌رهه‌م و ده‌رئه‌نجام سیاسه‌ت و ئایدۆلۆژیاو مقه‌یه‌تیكردن به‌رژه‌وه‌ندى ئابوورى و سیاسه‌ته‌یل حكوومه‌ت بریتانیا بوى، ماناى ئه‌وه‌سه‌ دروسبوین ئه‌و ده‌وڵه‌ته‌(عراق)هویچ په‌یوه‌ندییگ  وه‌ به‌رژه‌وه‌ندى ملله‌ته‌یل عراقه‌و نه‌یاشت، هه‌ر له‌وه‌ر ئه‌وه‌یش دوینیم ك تاریخ ئى ده‌وڵه‌ته‌ پیكهاتگه‌ له‌ چه‌سپانن(نایب عه‌ریف)ه‌یل له‌بان ناوه‌نده‌یل سستم حوكمڕانى و دویاخریش داین جڵه‌و گشت عراق وه‌ده‌س بڕیگ دیكتاتۆر و تونڕه‌و دینى و نه‌ته‌وه‌یى و شۆفینیزم.

عراق له‌تاریخ سیاسى ناشرینترین تاریخ دیرید، وه‌ دریژایى تاریخ له‌جیاى ئه‌وه‌ك بووده‌ خاك وه‌یه‌كه‌وه‌ ژیان مه‌ده‌نیانه‌و دیموكرسیانه‌ له‌ناونى پیكهاته‌یل جیاواز، وه‌لى دوینید بویه‌سه‌ زیندان ئه‌را گشت ملله‌ته‌یل عراق، عراق وه‌رجه‌ گشت ده‌رسیگ  مه‌ردم هووكاره‌ى ده‌رس مردن كرد و له‌یوا له‌ مه‌ردمه‌گه‌ى كرد وه‌ جووریگ ته‌ماشاى ژیان بكه‌ن ك بار قورس و سه‌ختیگه‌.  

ژیان مه‌ردم كوشتیان له‌وه‌ر ئه‌وه‌ك خوه‌یان بژیه‌ن، شوون پاى جه‌للاد و دیكتاتۆره‌یل عراق له‌بان ده‌یشت و ده‌ر و كویه‌و هه‌ڵه‌ته‌یل كوردستان و بیاوانه‌یل عراق ئه‌وه‌نه‌ خویناویه‌ ك سروشت وه‌گشت زووردارى خوه‌یه‌و تواناى پاكه‌وكردنى نه‌یرید، ئه‌و دیكتاتۆره‌یله‌ ك ته‌نیا وه‌ زووانیان به‌هه‌یشت ئه‌را ملله‌ته‌یل عراق دروس كردیان، وه‌لى له‌ڕاسى عراق كردوینه‌ دوزه‌خ.

دویاى رمیان رژیم سه‌دامیش له‌ 2003و دویاخریش بنیاتناین ده‌وڵه‌ت عراق له‌بان بنه‌ماى ده‌ستوور تازه‌یگ ئه‌گه‌ر یا ئحتمال ئه‌وه‌ له‌لى كریا عراق بووده‌ باخچه‌ى سه‌وز و جوانیگ ئه‌را گشت ملله‌ته‌گه‌ى، وه‌لى دى كاره‌سات و ناخوه‌شیه‌یل عومریان دریژه‌و خوه‌شى له‌تى كه‌مه‌.

وه‌ل ئه‌وه‌یشا له‌ناو دڵ عراق تازه‌ خه‌ریكه‌ یه‌كه‌ یه‌كه‌ى بڕگه‌و مادده‌یل ده‌ستووریش قه‌ده‌ر چه‌وه‌ڕییان ئه‌كا و ئاره‌زوو عراقیه‌یل كه‌فیده‌ ژیر سم وڵاخ مالیكزم و له‌لایگ و له‌ناو ته‌پ و تووز عه‌رش رمیاگ سه‌دام و غه‌یدان و زه‌یدى و حه‌دیسى و عه‌قیلى و شه‌وانه‌ خوه‌یان له‌بان شاشه‌ى ته‌له‌فزیۆنه‌یل وه‌ك پاڵه‌وان ئه‌نفال تازه‌ خوه‌یان نمایش كه‌ن، ك بیگومان ئه‌یانه‌ ناخوازن عراق سه‌قامگیر بوود، ئنجا ئه‌ى عراق بچوو له‌ جامه‌ك ته‌ماشاى روخسار خویناوى خوه‌د بكه‌.

زیره‌ك كه‌مال
ج. ا