وڵات ئه‌گه‌ر و مه‌گه‌ر

شفق نيوز

له‌ ماوه‌ی حوكم ٣٥ ساڵه‌ی ته‌كڕه‌وی و تونڕه‌وی و ديكتاتۆريه‌ت حزب به‌عس پيكهاته‌يل جياجيايگ له‌ی عراقه‌ ناڵانن وه‌ده‌س زوڵم و زوورداری، وه‌ل ئه‌وه‌يشا زوورم مه‌ردم كورد ئاواره‌ كرياو دويای گله‌وخواردنيانيش له‌ ئيران جاريگتر گه‌رمايگه‌رم ته‌رحيل كريان وه‌ره‌و ناوچه‌يل ناوڕاس و باشوور عراق.

يه‌يش بيجگه‌ زه‌فتكردن ماڵ وموڵك و ته‌عريبكردن شوونه‌يليان و بيجگه‌ ده‌ركردن خيزانه‌يل كورد فه‌يلی و گرتن و كوشتن رووڵه‌يليان و بيسه‌رووشونكردن هه‌زاران جايه‌ڵ جوان بيتاوان له‌ليان و بيجگه‌ ئه‌نفال و كيمياواران و سزانن باخ و بووسان و كاولكردن هه‌زاران ئاوايه‌يل كورده‌واری له‌ ماوه‌ی ساڵه‌يل هه‌يشتای سه‌ده‌ی وه‌رين.

وه‌لی ته‌نيا مه‌ردمانيگ ك ئاسووده‌و سه‌رفراز بوين له‌ی عراقه‌ له‌سای حوكم فاشيه‌ت به‌عس هه‌ر دارو ده‌سه‌و جه‌لاده‌يل سه‌دام و نه‌وه‌يلی بوين ك وه‌رگری له‌ مه‌ندنه‌وه‌ی ئه‌و ده‌سڵاته‌ كرديان و مه‌ردم بيتاوان ده‌سگير كرديان و خستيانه‌ی ناو مه‌كينه‌ی هڕووشكه‌ر و مه‌ردم وه‌و ره‌فتاره‌يل نائنسانيه‌ وه‌پی رخه‌و برديان.

ئی وڵاته‌ له‌سای ده‌سڵات رژيم به‌عس تا رووژ ئمڕوو هه‌ر شوون جه‌نگ و كاولكاری و په‌ت و سێداره‌و كوشتن و گرتن بوی، ئيسه‌يش ئه‌را ماوه‌ی فيشتر له‌ ده‌يه‌يگه‌ كووتايی وه‌و رژيم خوينمژه‌ هاتگه‌، وه‌لی هيمان له‌ی عراق ناسه‌رفرازيه‌ ئوميد و ئه‌زره‌تيگ به‌خته‌وه‌ری وه‌ی مه‌ردم بيچاره‌يه‌ نه‌وه‌خشياگه‌و رووژ نيه‌ سه‌دان كه‌س له‌تی وه‌بی تاوان نه‌كوشيه‌ن و نه‌ونه‌ قوربانی ته‌قينه‌وه‌يل ترۆريستی.

مانای ئه‌وه‌سه‌، ئی عراقه‌ وڵاتيگ ئه‌گه‌ر و مه‌گه‌ر و هات ونه‌هاته‌ ، چوينكه‌ كه‌سيگ نيه‌ ئمڕوو وه‌بی ترس و له‌رز بتويه‌نيد بگه‌رديد وه‌ناو جاده‌و بازاڕ و شوونه‌يل گشتی ئی وڵاته‌ له‌وه‌ختيگ ك مه‌رگ سه‌نگه‌ر له‌ليد گرتگه‌و ها له‌ كه‌مين ئه‌راد، له‌وه‌ختيگ ك ته‌قينه‌وه‌ی له‌ ناكاو ژن و مناڵ و گه‌ورا ئه‌گريده‌ ئامانج و كريانه‌سه‌ قه‌ره‌برويت ئی ئاگر وه‌رده‌وامه‌ ك په‌ل وه‌ره‌و ئاشوو تايفه‌گه‌ری كوتاگه‌و كپه‌وكردنی سه‌خت و سته‌مه‌.

نه‌وزاد نوری

ج . أ