جه‌مڕه‌وى له‌ زێد وخاك

شفق نيوز

 

زنجیره‌ى زوڵم و سته‌م به‌عسیه‌یل وه‌ دریژایى ماوه‌ى ده‌سڵاتیان دژ وه‌ هه‌قه‌یل ره‌واى ملله‌ته‌گه‌مان بى سه‌ره‌تاو بى كووتایى بوى، ك خوداى گه‌ورا وه‌ رووژ رووشنا روى سیه‌یان كردو هه‌ق مه‌زڵومیه‌ت ملله‌ته‌یل ژیرده‌سه‌ى عراق وه‌گشتى و نه‌ته‌وه‌ى كورد وه‌تایبه‌ت له‌لیان سه‌ندو بوینه‌ نیشانه‌ى تاوانكارى و زوڵم و سته‌م و ته‌كڕه‌وى له‌گشت دونیا.

 

مایه‌ى باسكردن و شانازیه‌ ك وه‌ یه‌ك هه‌ڵویستى و یه‌كگرتن مه‌ردم و هیز پێشمه‌رگه‌، تویه‌نریا راپه‌ڕینه‌ سه‌رتاسه‌ریه‌گه‌ى كوردستان و گشت ناوچه‌یل داگیركریاگ ئازاد بكریه‌ید له‌ژیر ده‌سڵات رژیم رمیاگ به‌غدا. رووژ 31 ئادار سوپاى رژیم گشت هیزه‌یل خوه‌ى گرده‌و كردو په‌لامار وه‌رفراوانیگ ئه‌نجامدا ئه‌را بان گشت شارو شاروچگه‌یل باشوور كوردستان وه‌ پشتگیرى سه‌دان ته‌یاره‌ى جه‌نگى و تووپ و تانك و گشت شارو ئاوایه‌یل توپواران كرد.

 

له‌وه‌ر نه‌وین هیز و چه‌ك و كه‌ره‌سه‌و نه‌وین وه‌خت خاسیگ ئه‌را خود ریكخستنه‌وه‌ى هیزه‌یل پێشمه‌رگه‌ و وه‌رگیریكردن، نه‌تویه‌نریا مقه‌یه‌تى له‌ خاك پیرووز  باشوور كوردستان بكریه‌ید له‌ده‌س ئه‌و رژیمه‌و هه‌ر له‌وه‌ر ئه‌وه‌یش ته‌نیا رییگ له‌وه‌رده‌م مه‌ردم  بى چه‌ك كوردستان ره‌وكردن بوى له‌ چنگ سوپاى به‌عسیه‌یل وه‌ره‌و ناوچه‌یل مه‌رزى و شوونه‌یل دویر.

 

سوپاى به‌عس جاریگ تر هاته‌ ناو شار و شاروچكه‌یل و خاك پیرووز و زێد باوگ و باپیره‌یلمان داگیر كردن و ده‌س كردنه‌ كوشتن و گرتن مه‌ردمان مه‌ده‌نى، یه‌یش له‌وه‌ختیگ ئه‌وانه‌ ك ده‌سگیر كریان تائیسه‌یش شوونیان نادیاره‌و زینگ وه‌چاڵ كریان.

 

جه‌مڕه‌وى كاره‌ساتیگ گه‌وراى چه‌رخ بیس و تراژیدیایگ رخه‌وبه‌ر بوى دژ وه‌نه‌ته‌وه‌ى كورد سته‌مدیده‌و سه‌بردار، ك له‌ئاكام ئه‌و كاره‌ساته‌ هه‌زاران ژن ومناڵ و پیره‌یل له‌ ورسگى گیان له‌ده‌سدان و سه‌ده‌ها كه‌سیش گه‌فتنه‌ ژیر وه‌فر و بوینه‌ قوربانى.

 

دیمه‌نه‌یل ئه‌و رویداگه‌ وژدان ئنسانیه‌ت له‌قان و مه‌سه‌له‌ى كورد ره‌سانه‌ وه‌رده‌م راى گشتى و ئه‌وه‌ بوى ئه‌نجوومه‌ن ئاسایش ناوده‌وڵه‌تى بڕیار مقه‌یه‌تیكردن گشت شاره‌یل كوردستان دا ئه‌را ئه‌وه‌ك جاریگ تر رژیم به‌غدا نه‌تویه‌نید كوردستان وه‌ ته‌یاره‌ و تووپ بوردمان بكاو مه‌ردمه‌ بیتاوانه‌گه‌ى له‌ناو بووه‌ید.

 

ئنجا هه‌ر له‌وه‌ر ئه‌وه‌یش بیلا یادگارى تاوانكاریه‌یل هه‌میشه‌ له‌هویر و هووش گشت تاكیگ نه‌ته‌وه‌گه‌مان بوود و هویچ وه‌ختیگ فه‌رامووش نه‌كریه‌ن تا له‌ ئاینده‌ نه‌وه‌ له‌شوون نه‌وه‌ وه‌پى ئاگادار بوون و گام وه‌گام هه‌وڵ سه‌بر و روى وه‌ڕوى بوینه‌وه‌و ئنتما بیه‌ن ئه‌را وڵات و خاكه‌یان و هووكاره‌ى یه‌كوه‌خشین و ئارامگرتن و ئاشق نیشتمان بوون، هه‌ر له‌وه‌ر ئه‌وه‌یش له‌ى ساڵیاد دڵته‌زنه‌ وه‌فاو سوز و گه‌ورایى ئه‌را گشت قوربانیه‌یل و ئه‌وانه‌ك له‌و سه‌ردى و زوقم و بى شوونیه‌ گیان له‌ده‌سدان و كووچ كردن وه‌ره‌و كاروان نه‌مرى و دونیاى ئه‌به‌دى.

 

به‌ختیار ئه‌حمه‌د مه‌حموود

ج . أ