ره‌سانن فه‌يلى و يه‌كده‌نگى

شفق نيوز

هووكاره‌يل ره‌سانن جياوازن و شيوه‌يل جوراوجوورن، ئمجا هه‌رچه‌نى قانجازه‌يل فريه‌يگ پيشكه‌ش كرده‌سه‌ جه‌هان وه‌گشت شيوه‌يگيه‌و، وه‌لێ جوور هه‌ر چشتيگ تر خراوى و خاسى و مه‌ترسيه‌يل ديرێد ئه‌تويه‌نێد نه‌ف له‌لى وه‌ربگرێد وه‌تاك و جه‌م وه‌خاتر جيوه‌جيكردن ئامانجه‌يل و به‌رژه‌وه‌نديه‌يل گشتى ملله‌ت.

بيگومان جوورايه‌تى و فريه‌يى هووكاره‌يل ره‌سانن بوار ئه‌ياد ئه‌را وه‌ديكردن و ده‌سكه‌فتن ده‌رفه‌ت له‌وه‌ر ئاشكراكردن چشته‌يليگ ك ساڵه‌يل گوزه‌يشت نادياريان كردوێد و له‌لايه‌ن حكومه‌ته‌يل يه‌ك له‌شوون يه‌ك چه‌سپيان جوور ده‌سنيشانكردن ئازادى راده‌رخستن وه‌گشت شيوه‌يگ و ده‌رفه‌ت نه‌داين وه‌ وزه‌و توانايه‌يل سياسى و كومه‌ڵايه‌تى له ‌مه‌سه‌له‌ى ده‌ركه‌فتن و جموجويل وه‌ ئازادى گوزارشكردن.

حكومه‌ته‌يل نه‌ف له‌ هووكاره‌يل ره‌سانن وه‌رگرتن و هاوردنه‌يانه‌ كار له‌وه‌ر به‌رژه‌وه‌ندى و ماف وه‌ مه‌ردم نه‌يان نه‌ف له‌و هووكاره‌يل ره‌ساننه‌ وه‌ربگرن نه‌وه‌گ له‌ڕى ره‌ساننه‌و داواى مافه‌يليان بكه‌ن و فكره‌يليان بخه‌نه‌ ڕوى له‌وه‌ر خاتر ڕيگرتن له‌ چويچيان و گوزارشكردن وه‌ ئازادى له‌ هوير وڕايان.

ئمڕوويش كورده‌يل فه‌يلى جوور باقى پيكهاته‌يل تر ماف ئه‌وه‌ ديرن ئسپات وجوود خوه‌يان بكه‌ن دوياى ئه‌و ئنفتاحه‌ ك روێدا له‌ ره‌سانن له‌ڕى ئه‌و هووكاره‌يله‌ وه‌خاتر ئاشكراكردن ستراتيجيه‌ت واقعى ك ئاره‌زووه‌يليان جيوه‌جى ئه‌كاو كارئاسانى ئه‌رايان ئه‌كا له‌وه‌ر ره‌سين وه‌ ئامانجه‌يليان.

ره‌سانن يه‌كيگه‌ له‌و ڕيه‌يل فراوان و خاس و هه‌ڵكه‌فتگه‌ ئه‌را گوزارشكردن و ده‌رخستن هوير و ڕا و بڵاوكردنه‌وه‌ى چالاكيه‌يل و ئاشكراكردن رۆڵيان له‌ كومه‌ڵگا جوور باقى پيكهاته‌يل تر كومه‌ڵگا، ئه‌ويش وه‌و مه‌رجه‌ ك ئامانج له‌لى چه‌سپانن نفوز و ئيراده‌ نه‌دێ و بايه‌سه‌ له‌وه‌ر وه‌رگرى له‌ وجوود و ناسنامه‌و مافه‌يل ره‌وا باريه‌ێده‌ كار، ئمڕوويش كورده‌يل فه‌يلى دوياى ئه‌و هه‌مگه‌ ساڵه‌يل به‌دبه‌ختيه‌ ك وه‌رجه‌ رميان رژيم وه‌رين هاته‌ تويشيان و شوونه‌وار سه‌خت و خراو له‌بانيان دروسكرد و له‌وانه‌يش سه‌ختى سياسى و كومه‌ڵايه‌تى و ياسايى، وه‌ل ئه‌وه‌يشا بار ئيسه‌يش له‌ عراق و ئه‌و ئاژاوه‌يله‌ ك وجوود ديرن فيشتر خه‌ڕگه‌گه‌ خسه‌و كرد له‌بانيان له‌ مه‌سه‌له‌ى وه‌ده‌سهاوردن مافه‌يل ماددى و مه‌عنه‌وييان، ك هه‌رچه‌نى ياسايش وجوود ديرێد، وه‌لێ ئه‌و خراوه‌كاره‌يله‌ ك هيمان بنبڕ نه‌وينه‌ بوينه‌سه‌ گرفت له‌وه‌رده‌ميان وه‌بى ئه‌وه‌گ مافه‌يل ره‌واى خوه‌يان وه‌ربگرن.

قسه‌ى هه‌ق وتريه‌ێد، فريه‌يگ له‌ نويسه‌ره‌يل ئه‌زيزمان داره‌يل خوه‌يان ئاودان و وه‌رده‌وامى دانه‌ مێژوويان و وه‌گشت ئازايه‌تييگه‌و وه‌رگرى له‌ مافه‌يل فه‌يلى كردن و باس له‌ مه‌زڵوميه‌ت و مه‌ينه‌تيه‌يل كورد فه‌يلى كردن له‌ڕى ئه‌و هووكاره‌يله‌ ك وجوود ديرێد و يه‌يش جى ريز و حورمه‌ته‌، وه‌لێ مه‌ردم فه‌يلى ماف خوه‌يه‌ هووكاره‌يليگ ئه‌را ئعلانكردن تايبه‌ت داشتوود نوێنه‌رايه‌تى ناسنامه‌و مێژوو و ژيار و رووشنهويرييان بكا جوور باقى پيكهاته‌و لايه‌نه‌يل تر عراقى و كه‌ناڵه‌يليگ ئاسمانى تايبه‌ت په‌يا بوينه‌و تا ڕاده‌ى كه‌ميگ گرينگى ئه‌يه‌نه‌ كيشه‌ى كورد فه‌يلى و هويچ وه‌ختيگ نوێنه‌رايه‌تى ئاره‌زووه‌يل فه‌يلى ناكاو هه‌ر له‌وه‌ر ئه‌وه‌يش بايه‌سه‌ له‌ بانمان گرينگى وه‌ يه‌كده‌نگى بيه‌يم له‌وه‌ر يه‌كڕزى و يه‌كخستن هيزه‌يل ئه‌را ئه‌وه‌گ شيرازه‌ى يه‌كه‌م پرووژه‌يگ ژيارى نموونه‌يى دابنه‌يم نوێنه‌رايه‌تى ئى مه‌ردمه‌ بكا.

وه‌ل ئه‌وه‌يشا هه‌رچه‌نى ريز و حورمه‌ت ديريم ئه‌را وجوود چشته‌يليگ، وه‌لى بايه‌سه‌ چه‌وديرى گشت گام خاسيگ بكه‌يم و ئه‌وه‌گ له‌ توانامان هه‌س پيشكه‌شى بكه‌يم له‌وه‌ر سه‌ركه‌فتن مه‌سه‌له‌گه‌و قاپى له‌ڕوى ئه‌وانه‌ بووه‌سيم ك به‌رژه‌وه‌ندى خوه‌يان خستنه‌ بان به‌رژه‌وه‌نديه‌يل گشتى ملله‌تمان و هه‌ر له‌وه‌ر ئه‌وه‌يش بيلا خه‌م گشتمان يه‌كه‌وگرتن وزه‌و توانايه‌يلمان بدێ له‌وه‌ر يه‌كگرتگى مه‌ردمه‌گه‌و نواگيرى له‌ چويچيان ك ئه‌دێده‌ هووكار گومبوين مافه‌يل و ناسنامه‌، ك بيگومان يه‌يش هه‌وڵ گشتلايگ ئه‌خوازێد ئه‌را ده‌رخستن هوير وڕا وه‌خاتر گه‌شه‌داين وه‌ى مه‌سه‌له‌.

عه‌بدولخالق ئه‌لفه‌لاح