تراژێدى دویه‌تیگ كورد فه‌یلى فرووشیاسه‌ خێزانیگ ئماراتى

شفق نيوز

له‌ پۆل یا سه‌ف یه‌ك سه‌ره‌تایى بویم له‌ مه‌دره‌سه‌ى(ده‌هانه‌ى سه‌ره‌تایى دویه‌ته‌یل) ك نزیكه‌ له‌ ماڵمان له‌ ناو ئه‌و گه‌ڕه‌كه‌یله‌ ك كه‌فتنه‌سه‌ ناوبه‌ین هه‌ردوگ جاده‌ى جمهوورى و كیفاح له‌ ناوڕاس به‌غدا، سیماى گشتى زوورمى ئى گه‌ڕه‌كه‌یله‌ ئه‌وه‌سه‌ ك نه‌یار ڕژیم به‌عسى وه‌رین بوین و زوورمیان له‌ كورده‌یل فه‌یلى بوین ك ڕژیم وه‌رین وه‌ سیخوڕ یا جاسووس ئیران دیاده‌یانه‌ قه‌ڵه‌م.

له‌ زمسان ساڵ 1985 هیمان له‌ سه‌ف یا پۆل یه‌ك سه‌ره‌تایى بویم، سه‌عات نزیكه‌ى دوانزه‌ونیم نیمه‌ڕوو بوى دویاى ده‌رچوینم له‌ مه‌دره‌سه‌ وه‌ره‌و ماڵ خوه‌مان چیام؛ وه‌ختى چویمه‌ ماڵه‌و ته‌ماشا كه‌م دایگم خه‌ریك وه‌ى كردنه‌ له‌ بان ته‌رم داپیره‌ى هه‌یشتا ساڵه‌م ك وه‌ جه‌ڵته‌ى دڵ مردوید. وه‌و دیمه‌نه‌ فره‌ سه‌رسام بویم و ئه‌وه‌گیش زیاتر سه‌رسامم كرد ئه‌وه‌ بوى ك بڕیگ له‌ به‌عسیه‌یل وه‌ جنگ و پووشاك(جه‌یش شه‌عبى) چوارده‌ور باوگم گرتوین و ده‌سه‌یلى كه‌له‌پچه‌كردوین و یه‌كه‌ یه‌كه‌ وه‌ مشت(بۆكس) دیانه‌ لى، نه‌تویه‌نستم وه‌ شیوه‌ى دیاریكریاییگ له‌ى دیمه‌نه‌ بڕه‌سمه‌و، ته‌نیا ئه‌وه‌ نه‌ود ك داپیره‌م مردیه‌، ئه‌و ژنه‌ ك خێ داویمه‌ پى و فره‌ دووسى داشتم.

دویاى ئى دیمه‌نه‌، ئه‌و به‌عسیه‌یله‌ باوگم دانه‌ وه‌ر ئه‌را چاره‌نویس نادیاریگ و ته‌رم داپیره‌میش پیاویگ وه‌ناو حاجى ئه‌بو حه‌مید ك دوكانداریگ بوى له‌ نزیك ماڵمان وه‌ل بڕیگ له‌ هاوسایه‌یلمانه‌و هه‌ڵیگردن و بردنه‌ى ئه‌را قه‌ورسانه‌گه‌ى نه‌جه‌ف ئه‌شره‌ف، دى له‌ شوون ئه‌وه‌، هویچ له‌ هویرم نیه‌ ته‌نیا ده‌نگ هاوار و گیرستن نه‌ود و ئنجا خه‌وه‌و بردنم له‌ كه‌ش و هه‌وایگ نادیار ئه‌را مناڵیگ چوى من.

ئه‌را شه‌وه‌كى ئى ڕووژ تره‌ك ته‌ماشاكه‌م هامه‌ ناو زندانیگ پڕ له‌ ژن و مناڵ، دیمه‌ن دویه‌تیگ وه‌ناو له‌یلا قه‌ت له‌هویرمه‌و نیه‌چوود ك سه‌جانه‌یل له‌وه‌رچه‌و گشتمان جنگه‌یل وه‌رى دڕین و له‌ خوه‌نه‌واره‌یل داواى وه‌خشین كه‌م ك نیه‌تویه‌نم وه‌ ته‌واوه‌تى وه‌سفى بكه‌م چ دیمه‌ن كاره‌ساتییگ بوى... وه‌ختى شه‌و هات من و مناڵه‌یل خه‌ومانه‌و برد و شه‌وه‌كى له‌ خه‌و ئه‌ڵسایمن ته‌ماشاكه‌یم هه‌ر خوه‌مان مه‌نیمنه‌ و داڵگه‌یل و كه‌سوكاره‌یلمان گشتیان نیه‌سه‌یان.

ئى ڕووژتره‌ك ئیمه‌ى مناڵ وه‌سه‌یاره‌ى سه‌ربازى و پاسه‌وانه‌یل فره‌یگه‌و بردن ئه‌را مه‌دره‌سه‌یگ دویر له‌ به‌غدا وه‌ ماوه‌ى نزیكه‌ى ده‌سه‌عات، چوینكه‌ وه‌ختى ده‌رمان كردن وه‌ دیمه‌ن ئه‌و مناڵه‌یله‌ ك وه‌ره‌و مه‌دره‌سه‌ چیان وه‌ختى له‌ په‌نجه‌ره‌ى سه‌یاره‌گه‌وه‌ نووڕستم زانستم ك سه‌عات هه‌یشت شه‌وه‌كیه‌. و وه‌ختى ڕه‌سیمن دى خوه‌ر خه‌ریك بوى له‌ پشت ته‌په‌یل خوه‌ڵین ئاوا بوود له‌ دیمه‌نیگ بیاوانى ترسناك، شماره‌مان 18 دویه‌ت بوى و هه‌ر یه‌كى لیمان نمره‌یگ داشت، نمره‌گه‌ى منیش 18 بوى و لكانوینه‌ى قه‌ى شه‌ویه‌گه‌ى وه‌رم و له‌ سه‌رشمارى هه‌میشه‌ دویاكه‌س بویم، وه‌لى كوڕه‌گان هویچ نمره‌یگ له‌ قه‌یانه‌و نه‌وى وه‌لى خوه‌م وه‌ختى ده‌رفه‌ت گیر باوردیام شماره‌یان كردیام تا بزانم چه‌نیگن یه‌یشه‌ بویه‌ كاریگ وه‌خت وه‌پى گوزران كردیام و زانستم ك شماره‌ى كوڕه‌گان 6 كوڕ بوى... گه‌وراترین دویه‌تیگ وه‌لمان بوى 3  تا 4 ساڵ له‌ خوه‌م گه‌وراتره‌ك بوى... وه‌ختى ڕه‌سیمنه‌ ناو مه‌دره‌سه‌گه‌ ته‌ماشا كه‌یم گشت چشتى ئاماده‌كریاس ئه‌را پیشوازى كردن له‌ لیمان؛ جیگه‌ى خه‌فتن له‌ چوارپایه‌ و دووشه‌ك و په‌توو و خوراك و شرینى ك تا ئیسه‌ وه‌چه‌و خوه‌مان نه‌دویمنه‌ى و تامى نه‌كردویمن... جارجاریگیش ده‌نگ گیرستن چه‌ن دویه‌تیگ له‌ لیمان به‌رزه‌و بویاد و هه‌میشه‌ وه‌ چه‌پووكیگ یا زلله‌یگ  پاسه‌وانه‌یل وسیاده‌وه‌... نزیكه‌ى چوار ڕووژ له‌ورا مه‌نیمن، و هه‌ر شه‌وه‌كیانیگ ئه‌فسه‌ریگ سه‌ردیاده‌لیمان ك ئه‌وانه‌گ له‌ورا بوین وه‌ ڕێزه‌وه‌ ڕه‌فتار وه‌لیا كردیان و هه‌میشه‌(تحیه‌) ئه‌راى گردیان... ئه‌وه‌گ له‌ هویرم بوود له‌ ڕووژ چوارم چه‌ن پیاویگ وه‌ جنگ  عه‌ره‌بى خه‌لیجیه‌وه‌ هاتن، وه‌ سیمایانه‌و دیار بوى ك خوه‌شڕه‌فتارن، وه‌لى وه‌ل هاتنیان ئه‌را ناومان، هه‌ریه‌كى له‌لیان سێ چوار دویه‌ت ئه‌را خوه‌ى جیاوه‌ كردیاد و بردیاده‌ى ئه‌را سویكیگ له‌و هۆڵه‌ ك له‌تى جه‌ممانه‌وكردوین... دویاى ئه‌وه‌ خستنه‌مانه‌ ناو ئه‌و سه‌یاره‌یلیانه‌ ك وه‌ل خوه‌یانه‌و هاوردوینه‌ى و بردنه‌مان ئه‌را شوونه‌یلیگ تر ك نه‌ناسیمنه‌ى تا له‌ ئاخره‌و من ڕه‌سیمه‌ ناو ماڵ ئه‌و خێزان ده‌وڵه‌مه‌نه‌ ك له‌ ئماره‌ت (الشارقه‌) ژیه‌ن.

به‌ڵى من بویمه‌ دویه‌تیان وئه‌وانیش بوینه‌ كه‌سوكار و دووس نزیكم  وه‌ 4 هه‌زار دۆلار ك سه‌فیر عیراق له‌ ئمارات عه‌ره‌بى له‌ باوگه‌ ئماراتیه‌گه‌م وه‌رى گرت وه‌گووره‌ى قسه‌گانى ئه‌رام، منیش وه‌ گشت دڵسووزییگه‌وه‌ له‌ ناویان ژیام و هویچ كه‌مو كوڕییگ نه‌یاشتم، ته‌نیا یادگاریه‌یلم وه‌ل دایگمه‌و نه‌ود و ئه‌و مه‌ته‌ڵه‌یله‌ ك داپیره‌ى ڕه‌حمه‌تییم ئه‌رام شه‌وانه‌ ئه‌رام باسیان كردیاد. سه‌باره‌ت وه‌ باوگم هویچ چشتى له‌ هویرم نیه‌؛ ته‌نیا ئه‌وه‌ نه‌ود ك ناوى (جه‌لال)ـه‌ و دایگمیش ك وه‌ (دایگ وه‌سفى) چڕیانه‌ى... ئه‌وه‌گ له‌ هاوسایه‌یلمان وه‌ هویرم باید حاجى (ئه‌بو حه‌مید) دوكاندار و (دایگ ده‌لال) ك هه‌میشه‌ موى سه‌رم شانه‌كردیاد و (مه‌ى) ڕه‌فیقم ك دویه‌ت (دایگ شاكر) بوى... فره‌ ته‌قالا دام له‌بان كه‌سوكار و هاوسایه‌یمان بپرسم و خه‌وه‌ره‌یلیان جه‌مه‌وبكه‌م له‌ په‌یوه‌ندى كردنم وه‌ل ئه‌و عیراقیه‌یله‌ ك ئمارات ژیه‌ن وه‌لى هویچ نه‌كه‌فته‌ گیرم چوینكه‌ زانیاریه‌گانم له‌ باوه‌ت كه‌سوكاره‌یلم فره‌ كه‌م بوین... دویاخر په‌یوه‌ندى كردمه‌ ڕیكخریاییگ عیراقى ك وب ساتیگ له‌ بان تووڕ ئه‌نته‌رنێت داشت و هه‌رچى زانیاریمه‌ خستمه‌ وه‌رده‌سیان و ئه‌وانیش تویه‌نستن بڕه‌سنه‌ ئه‌و شوونه‌گ له‌تى ژیامه‌ و ئه‌وانه‌گ له‌ كه‌سوكاره‌یلم مه‌ننه‌سه‌وه‌ و چه‌ن ڕه‌سمیگ مناڵییم له‌ لایان ئه‌رام هاوردن ك هه‌ر میننه‌ ئه‌و ڕه‌سمه‌یلمه‌ ك له‌ سه‌ره‌تاى ژیانم له‌ ناو خێزانه‌ ئماراتیه‌گه‌م ئه‌رام گرتوینه‌ى و ڕه‌سیمه‌ ئه‌و ڕاسیه‌ ك من دویه‌ت (جلال)م ك بوخت په‌یوه‌ندى داشتن وه‌ ئۆپۆزیسۆن دژ وه‌ ڕژیم سه‌دام حوسێن كردوینه‌ پیه‌وه‌ و تا ئیسه‌یش كه‌سوكارم چاره‌نویسى نیه‌زانن و چاره‌نویس ئه‌و برامیشه‌ نیه‌زانن ك هه‌ر له‌و مه‌دره‌سه‌ وه‌لما بوى ك زویتر ئه‌رادان باسى كردم... دایگمیش وه‌گووره‌ى قسه‌ى قه‌ومه‌یل عیراقییم دویاى چوار مانگ له‌و كاره‌ساته‌ ئه‌مر خودا كردیه‌ .. یه‌یشه‌ په‌یاممه‌ ئه‌را گشت ملله‌ته‌یل دونیا.. ئایا دى كه‌سیگ تویه‌نى باس وه‌خشین و عاف كردن به‌عسیه‌یل بكه‌ید؟؟!!