نزيكه‌وبوين له‌ سه‌روه‌خوه‌يی

شفق نيوز

 

بيگومان خاوه‌ن ئه‌قلیه‌ت شۆفێنى و هویر وڕاى نه‌خوه‌ش و ناته‌ندروس‌ هه‌ميشه‌ هوير له‌وه‌ ئه‌كا ژيان سه‌رفرازی‌ و پیشكه‌فتنخواز له‌ژیر چه‌تر سته‌م و كاولكاری شكه‌ست وه‌و خه‌ياڵ و ئاره‌زووه‌ باريد ك ساڵه‌يل دوير و دريژيگ خه‌بات ئه‌رای كردگه‌.

ئه‌را ئيمه‌ی كورد مه‌سه‌له‌ی نزيكه‌وبوين له‌ سه‌روه‌خوه‌يی و گامناين گورج له‌ی رويه‌و خاسترين چاره‌سه‌ر ئه‌را كيشه‌ی ملله‌ته‌گه‌مان وه‌خاتر قاوداين سته‌م و چه‌وسیان و گله‌ونه‌خواردن جاريگتر ئه‌را ژیر ساى ده‌سڵات دیكتاتۆریه‌ت، يه‌يش ته‌نيا رييگه‌ ئه‌را ئه‌وه‌ك بڕه‌سيمنه‌ هه‌قه‌يل ره‌وامان و مقه‌يه‌تی له‌ ده‌سكه‌فته‌يلمان بكه‌يم.

ئيمه‌ زانيم عه‌ره‌به‌يل شۆفێنی و پاشمه‌نده‌يل به‌عس هيمان له‌ی عراقه‌ نه‌خش باڵايگ ديرن له‌ دژايه‌تيكردن ملله‌ت كورد و هه‌ميشه‌ حاشا له‌ هه‌قه‌يلی كردنه‌و ناخوازن ئی ملله‌ت ستمه‌ديده‌ خوه‌شی وه‌چه‌و بوينيد، وه‌لی له‌يه‌ودويا ملله‌ت و سه‌ركردايه‌تی كورد بايه‌سه‌ وه‌ جددی هوير له‌ مه‌سه‌له‌ی سه‌روه‌خوه‌يی بكه‌ن و بتويه‌نن قه‌واره‌يگ پڕ له‌ بته‌وی دامه‌زرنن وه‌ناو ده‌وڵه‌تيگ كوردی ئه‌را ئه‌وه‌ك له‌ كيشمه‌كيش كاولكاری و چه‌وسيان و ژيرده‌سه‌يی قورتار بوود.

ئیسه‌يش له‌ شوون هه‌ڵوژاردنه‌يل په‌رله‌مانی، ئه‌وه‌سه‌ جاريگتر نوری مالكی سه‌رۆك وه‌زيره‌يل عراقی هه‌ر له‌بان ئه‌قڵيه‌ت جاران خه‌ريك داناين مه‌رجه‌ ئه‌را كورد وه‌خاتر هاوپه‌يمانيكردن، ك يه‌يش له‌ڕاسی مايه‌ی نگه‌رانی و ناڕه‌حه‌تيه‌ ك وه‌خته‌يل فريه‌يگ له‌ده‌س خوه‌مان بيه‌يم وه‌بی ئه‌وه‌ك نه‌ف له‌ شه‌راكه‌ت و هاوبه‌شی وه‌ربگريم، ئمجا ئه‌تويه‌نيم بويشيم ئيسه‌يش واده‌ی نزيكه‌وبوينه‌ له‌ سه‌روه‌خوه‌يی و نه‌بايه‌د كورد ئی هه‌ڵه‌ له‌ ده‌س خوه‌ی بيه‌يدو جوور هه‌رێمه‌يل تر وه‌رجه‌ خوه‌ی وه‌ زويترين وه‌خت هه‌وڵ جيوه‌جيكردن ئی مه‌سه‌له‌ بيه‌يد.

عه‌لی ره‌حمان

ج . أ