وه‌ی وه‌پێد ئه‌ی نيسان

شفق نيوز

له‌ی مانگه‌ ئه‌وه‌ ئه‌كه‌فێده‌ هويرمان ك رژيم به‌عس له‌ ٧ نيسان لاپه‌ڕه‌ی مێژوو سيه‌يگ جوور لاپه‌ڕه‌ی ساڵ ١٩٤٧ وه‌ فكره‌ی عه‌فله‌ق و حه‌ورانی هاورده‌ كار و ها هويرمانيش له‌ ٩ نيسان ٢٠٠٣ به‌عس رميا، ك ره‌تڵ ده‌بابه‌يل ئه‌مريكی له‌ ٢٠٠٣ سه‌رانسه‌ر خاكمان په‌يمانه‌ كرد وه‌ خه‌ته‌يليگ ك ئاكامی پرووسه‌يگ ناڕيك سياسی بوی و هيزه‌يل سياسی له‌لی كه‌فته‌و ری ملله‌تمان به‌شبه‌شه‌و كرد و به‌ڵگه‌يش ئه‌را ئه‌وه‌ په‌رله‌مانه‌ نه‌خوه‌شه‌گه‌مانه‌!

له‌ نيسان يادگاريه‌يليگيش جوور كاره‌سات ئه‌ياده‌ هويرمان ك رژيم سه‌دام ئه‌نجامی دا دژ پيكهاتيگ ره‌سه‌ن له‌ ملله‌ته‌گه‌مان، له‌ نيشان ساڵ ١٩٨٠ چه‌ته‌يل به‌عس فراوانترين هه‌ڵمه‌ت وشكانن و گه‌ردين ئه‌نجام دان له‌ شار و شاروچكه‌يل ناوڕاس و باشوور عراق و دار سندان فه‌يلی له‌ ريشگه‌و بڕی تا بخاده‌ی ده‌يشت باخ عراق و دڕگ و عاقوڵ هه‌مه‌جی له‌ شوونه‌ بكاڵێد.

له‌ ٤ ئی مانگ سيه‌، له‌و ساڵ ژه‌هراويه‌، داروده‌سه‌يل سه‌دام ده‌سكردنه‌ كرده‌وه‌يگ كووچ وه‌پيكردن كورده‌يل فه‌يلی و دويره‌وخستنيان ئه‌را چاره‌نويسيگ ناديار و (١٢٠) هه‌زار خيزان له‌ كورده‌يل فه‌يلی ده‌ركرد وه‌ ئيڤای سه‌ربازی له‌ مناڵ و دويت و ژن و پياوه‌يل پير په‌ككه‌فتگ و گشت ماڵ و موڵكه‌يليان زه‌فت كرد و ته‌نانه‌ت ماڵه‌يليانيش خاره‌ت كريا. له‌وه‌رجه‌ ئه‌وه‌يش جايه‌ڵ جوانه‌يليان جياوه‌ كريان و بردنه‌يان وه‌ره‌و شوونه‌يليگ ناديار و تائيسه‌يش بيسه‌روشوونن و شماره‌يان ده‌يان هه‌زار بوی و هويچ كه‌سيگ له‌ليان قورتار نه‌وی.

يه‌يش حكايه‌تيگه‌ ك بڕێگ له‌ليمان خوازيار فه‌رامووشكردنيه‌، چونيكه‌ پاڵه‌وانه‌يل تاوانباری هيمان وجوود ديرن له‌ ناونيمان، بڕێگ له‌ليان غه‌يره‌ن و كه‌فتنه‌ چوارچيوه‌ی بار تازه‌ له‌ژير ناونيشان شه‌راكه‌ت له‌ پرووسه‌ی سياسی و بڕيگيانيش هيمان هۆسه‌ی ره‌گه‌زی و شۆفێنی و كينه‌تدار كيشێد و بڕيگيش له‌ليان ره‌خنه‌ له‌ گوزه‌يشته‌ ئه‌گرێد وه‌ شه‌رم و بيده‌نگ و بڕيگيش هه‌ن په‌نجه‌ی خوه‌يان ئه‌گه‌زن وه‌بی ده‌نگ.

دويای گشت ئه‌و سه‌رده‌مه‌، ك گوزه‌ر كرد له‌بان دويره‌وكه‌فتن هاوسای خوه‌شه‌ويسم"عه‌باس عه‌لی قه‌ڵه‌وڵسی"ئی شێخ شيعه‌ی فه‌يليه‌، ك شه‌و ٤/ ٤ / ١٩٨٠ له‌ ماڵ ده‌ركرياو تائيسه‌يش ئه‌گه‌رديم له‌شوون ته‌رم ده‌يان هه‌زار جايه‌ڵ جوانه‌يل فه‌يلی و مه‌ژگمان وه‌ ژانه‌و خورنيم و له‌يوا له‌ليمان هات شه‌رمه‌زار گوزه‌يشته‌ بكه‌يم و واز له‌لی باريم و ره‌تيه‌و بكه‌يم و بڕيگ له‌ مافه‌يل باقی قورتاربويه‌يل بيه‌يمنه‌وه‌و خه‌ڵاتيان بكه‌يم له‌بان سه‌بريان و دگان وه‌ ئه‌وه‌ بنه‌يم ك زوڵم له‌ليان كرياگه‌و عوزرخوايی له‌ليان بكه‌يم له‌و كاره‌ساته‌يله‌ ك هاته‌ تويشيان به‌ڵكه‌م له‌ی عوزرخواييه‌ ميزان به‌ختيان راسه‌و بوود. ئمجا قسه‌ وه‌رجه‌ سه‌ڵام ئه‌را ئه‌وانه‌گ زوڵم له‌ی پيكهاته‌ كردنه‌و ئيه‌يش وجوود ديرن له‌ناونيمان و به‌شدارن له‌ پرووسه‌ی سياسی و بڕيگ له‌ليانيش ئه‌فسه‌رن له‌ سوپاو ده‌زگايه‌يل ئاسايشی...! سڵام...

قاسم ئه‌لعجرش