بیلا بویمنه‌ ئۆپۆزسیۆن؟

شفق نيوز

و بتویه‌نن هاوسه‌نگیگ له‌ ده‌سه‌ڵات و كومه‌ڵگا له‌ یه‌ك وه‌خت وه‌دى بارن باس كردیم، له‌ خول گوزه‌یشته‌ى په‌رله‌مان و وه‌رجله‌ ئه‌وه‌یش له‌ كومه‌ڵه‌ى نیشتمانى هویچ نیشانه‌یگ یاهویچ شیوه‌یگ له‌ شیوه‌گان ئۆپۆزسیۆن نه‌وى و پاساو ئه‌و كه‌موكوڕى گه‌ورا ئه‌وه‌ بوى ك وتیان وڵات هه‌مراێ هاله‌ قوناغ چه‌سپانن بنه‌ماگان دیموكراسى و نیاز وه‌ كۆده‌نگى و ته‌وافوق دیرێ، سه‌ره‌ڕاى ئه‌وه‌گ پاساوه‌گه‌ له‌جى خوه‌ى بوى وه‌لى نه‌بایه‌د هه‌میشه‌ وه‌چه‌و هیزیگ  نه‌یار و روخێنه‌ر بنوڕیمه‌ ئۆپۆزسیۆن و بویشیم ئى هیزه‌ توایگ وڵات بشیونیگ ، له‌وه‌ر ئه‌وه‌گ جیاوازى بیر و ئه‌را چگنه‌گان وه‌مه‌عناى دژایه‌تیكردن نیه‌ له‌وه‌ر ئه‌وه‌گ ئى هیز ئۆپۆزسیۆنه‌ جوور بنه‌ما باوه‌ڕ وه‌سیستم تازه‌ى ده‌سه‌ڵات له‌ وڵات دیرێ و ریز له‌ ده‌ستوور گریگ و ئه‌را جیوه‌جیكردن و پاراستنى كار كه‌یگ و نه‌بایه‌د ئیمه‌ وه‌چه‌و شك و گومان بنوڕیمه‌ چالاكى ئى هیزه‌.     
ئاره‌زوو داشتیم ك له‌ خول دیوم ئه‌نجوومه‌ن نوێنه‌ره‌یل بنه‌واى ئۆپۆزسیۆنیگ په‌رله‌مانى بوینیم ك وه‌شیوه‌ی راسه‌وخو به‌شدار نه‌وگ له‌ ده‌سه‌ڵات و هه‌وڵ نه‌یه‌یگ ئه‌را وه‌ده‌سهاوردن پۆست و ده‌سكه‌فته‌یل حزبى و تاكه‌كه‌سى، به‌ڵكم نوێنه‌رایه‌تى جه‌ماوه‌ر و شه‌قام بكه‌یگ ك هویچ ده‌سه‌ڵات یاحزبیگ یا هاوپه‌یمانییگ تائیسه‌ نه‌تویه‌نستگه‌ بانگه‌شه‌ى ئه‌و نوێنه‌رایه‌تیه‌ بكه‌یگ . وه‌لى ئه‌و په‌رله‌مانه‌گ چه‌ندین ده‌یه‌ چه‌وه‌ڕێى كردیایم و وه‌حه‌سره‌ته‌و نوڕستیایمه‌ په‌رله‌مان به‌ریتانیه‌ و كومه‌ڵه‌ى نیشتمانى فه‌ره‌نسه‌ و كۆنگرس ئه‌مریكا ناته‌ دى و چمانى تام و ره‌نگ و بووى خوه‌ى له‌ده‌سدا و بویه‌ حه‌مامیگ گشتى ك ئه‌ندامه‌یلى له‌ ئه‌نجام هڵم وگه‌رما و قه‌ره‌باڵخى ناوى  ته‌نیا خوه‌یان له‌تى دوینن و ماوه‌ى چه‌ن ساڵه‌ هه‌ هاله‌ شوون خوه‌ى و هویچ پیشكه‌فتنیگ وه‌خوه‌یه‌و نه‌یه‌، گشت لایه‌نه‌یل له‌بان به‌شه‌وكردن میرات ده‌سه‌ڵات و وه‌ده‌سهاوردن به‌ش خوه‌یان له‌ سه‌روه‌ت و سامان وڵات ریككه‌فتنه‌ و له‌بان گشت چشتیگ هاوڕا و هاوده‌نگن و ته‌نیا له‌ بان به‌رژه‌وه‌ندى و سوود مه‌ردم ناكووكن!!؟

ماوه‌ى چه‌ن مانگیگه‌ ك سه‌رجه‌م لایه‌نه‌یل له‌ بان ده‌سپیشخه‌ریه‌گه‌ى سه‌روك مه‌سعود بارزانى سه‌باره‌ت وه‌دامه‌زرانن حكوومه‌ت هاوبه‌شى نیشتمانى و به‌شه‌وكردن ده‌سه‌ڵاته‌گان وه‌شیوه‌یگ ك خزمه‌ت وه‌پروسه‌ى سیاسى و سه‌ركه‌فتنى بكه‌یگ ریككه‌فتنه‌، وه‌لى ناڕازییه‌یل هه‌ له‌ سه‌ره‌تاى ئمزاكردن ریككه‌فتن نامه‌گه‌ ده‌سكردنه‌ له‌یه‌كه‌وداینه‌یل جیاواز ئه‌را ده‌ق موباده‌ره‌گه‌ ئه‌را ئه‌وه‌گ وه‌دڵ خوه‌یان ده‌سه‌ڵاته‌گان دیارى بكه‌ن وه‌تایبه‌ت ده‌سنیشانكردن وه‌زیره‌یل ناوخۆ و وه‌رگرى و ئاسایش نیشتمانى و هه‌میش ده‌سنیشانكردن ده‌سه‌ڵاته‌یل ئه‌نجوومه‌ن سیاسه‌ته‌یل ئستراتیجى و یه‌یش له‌ وه‌ختیگه‌ ك هاولاتى هه‌ژار و بى ده‌ره‌تان هیمانى له‌ ده‌س ژانه‌یل نیم سه‌ده‌ى گوزه‌یشته‌ ناڵنیگ و ساڵه‌یل دویاى رمیان به‌عس ره‌نج و مه‌ینه‌تیه‌گانى زیاتره‌و بوینه‌.     
له‌ وه‌ختیگ كیشه‌و گرفته‌یل رووژ وه‌ رووژ توندتره‌و بوون، فه‌ره‌ له‌ سیاسه‌تمه‌داره‌یل و لایه‌نه‌یل سیاسی مكوڕن له‌ بان ئه‌و ململانیه‌یله‌ ك هویچ په‌یوه‌ندییگ وه‌نیازه‌یل و خوه‌شگوزه‌رانى مه‌ردمه‌و نه‌یرن و بڕیگتر هه‌ڕه‌شه‌ى سوود وه‌رگرتن له‌ ده‌سه‌ڵات ئه‌را به‌رژه‌وه‌ندیه‌یل خوه‌یان یا وازهاوردن له‌ پروسه‌ى سیاسى یا ته‌جمیدكردن ئه‌ندامیه‌تى خوه‌یان له‌ په‌رله‌مان كه‌ن. وه‌بى گومان به‌ش هه‌ره‌ گه‌وراى جه‌ماوه‌ر ئارزوو كه‌یگ و ئاره‌زوو دیریگ كوتله‌ى ئۆپۆزسیۆن وه‌هیزیگ دامه‌زریه‌یگ دویر له‌ ده‌سه‌ڵات و پۆسته‌ حكوومیه‌گان بوود و بووده‌ ركابه‌ر حكوومه‌ت وه‌جووریگ چاودیرى كاره‌یلى بكه‌یگ ك خزمه‌ت وه‌به‌رژه‌وه‌ندیه‌یل باڵا و پروسه‌ى سیاسى چالاك و پاریزگارى له‌ ده‌ستوور بكه‌یگ و له‌جى هه‌ڕه‌شه‌ى ده‌سكیشان له‌ پروسه‌ى سیاسى كار ئه‌را چالاكه‌وكردنى بكه‌یگ و ئۆپۆزسیۆنیگ په‌رله‌مانى نیشتمانى بنیا بنه‌یگ ك هاوسه‌نگ بوود وه‌ل ده‌سه‌ڵات و كومه‌ڵگا و وڵات وه‌ره‌و ئاسوه‌یلتر بوه‌یگ وه‌رجله‌ ئه‌وه‌گ وه‌خته‌گه‌ له‌ كیس بچوود.