په‌رله‌مان نه‌رویج كێشه‌ى كورده‌یل فه‌یلى وه‌جه‌هان ناسنێ

شفق نيوز

جینۆساید ملله‌ت كوردستان وه‌ گشت جه‌هان، و وه‌سه‌رپه‌رشتى دكتۆر كاوه‌ مه‌حمود وه‌زیر شه‌هیده‌یل وئه‌نفالكریایه‌یل هه‌رێم كوردستان وه‌ وه‌كاله‌ت، بۆرد راوێژكارى یا ئستشارى تایبه‌ت وه‌ ناساندن جینۆساید ملله‌ت كوردستان وه‌ جه‌هان، یه‌كم دیدار خوه‌ى گریه‌دا وه‌ ئاماده‌بوین ئه‌ندامه‌یل لوجنه‌گه‌ ك بیكهاتیه‌ له‌ ئه‌ندامه‌یلیگ له‌ لوجنه‌ى كاروبار شه‌هیده‌یل و ئه‌نفالكریایه‌یل له‌ په‌رله‌مان كوردستان و هاوكاره‌یلیان له‌ وه‌زاره‌ت شه‌هده‌یل و ئه‌نفالكریایه‌یل، و له‌ى دیداره‌ به‌رنامه‌ى ئاماده‌كارى ئه‌را كۆنگره‌ى ناساندن جینۆساید تاوتوێ یا مناقشه‌ كریا ك چه‌وه‌ڕى كریه‌ى له‌ مانگ ئادار هاتى له‌ په‌رله‌مان نه‌رویج گریه‌ بدریه‌ید، و له‌باوه‌ت خستن كه‌یس فه‌یلى وه‌ناو ئه‌و ڕاپۆرته‌ ك پیشكه‌شكریه‌یده‌ په‌رله‌مان نه‌رویج، وه‌تایبه‌تى ك دادگاى باڵاى تاوان عیراقى ئى كه‌یسه‌ وه‌ جینۆساید ناسان، ماڵپه‌ر شه‌فه‌ق ڕوى پرسیار ئاراسته‌ى په‌یوه‌ندیداره‌یل وه‌ى كه‌یسه‌كرد.

دكتۆر كاوه‌ مه‌حمود وه‌زیر كاروبار شه‌هیده‌یل ئه‌نفالكریایه‌یل هه‌رێم كوردستان له‌ جوواو پرسیاریگ ماڵپه‌ڕ شه‌فه‌ق ئویشى:" بۆرد راوێژكارى وه‌ختى یه‌كه‌وگرد، پێناسه‌ یا تعریف جینۆساید دژ وه‌ ملله‌ت كورد وكوردستان وه‌شیوه‌یگ گشتى تاوتوێ یا مناقشه‌ كرد، مه‌قسه‌دیش له‌ جینۆساید ئه‌وه‌گ وه‌مل گشت پیكهاته‌گان ملله‌ت كورده‌و هات هه‌ر له‌ ئه‌نفال و كیمیاواران و كوشتن بارزانیه‌یل و كورده‌یل فه‌یلى، و كیمیاوارانیش ته‌نیا هه‌ڵه‌بجه‌ نیه‌گرێده‌وه‌، به‌ڵكوو ئه‌و ناوچه‌گانتریش جوور بادینان و بالیسان و شێخوه‌سان...هتد".

ئه‌وه‌یشه‌ ڕووشنه‌و كرد ك:" كورده‌یل فه‌یلى چینیگ سه‌ره‌كى یا ئه‌ساسیین له‌ چینه‌یل ملله‌ت كورد جوور ئێزیدى و شه‌به‌ك، ك یانه‌ گشتیان تویش تاوانه‌یل گه‌ورایگ هاتن جوور ناهمیكردنیان له‌ ناسنامه‌ى نه‌ته‌وه‌یى خوه‌یان". و زیاتریش وت :"كورده‌یل فه‌یلى تویش كووچوه‌پیكردن وه‌زوور هاتن، و جایڵ وجوانه‌یلیان نوقمه‌وكریان و دارا ونه‌دارایان زه‌فت كریا". وجه‌ختیش له‌بان ئه‌وه‌ كرد ك:" چه‌وه‌ڕى كریه‌ید ك دۆسیه‌ى جینۆساید له‌و كۆنگره‌ بخریه‌ید ڕوى ك له‌ نه‌رویج گریه‌دریه‌ید، و ئیمه‌یش له‌و ڕاپۆرته‌ ك پیشكه‌ش وه‌ په‌رله‌مان نه‌رویج كریه‌ید باس ئه‌و تاوانه‌یله‌ كه‌یمن ك دژ وه‌ ملله‌ت كورد ئه‌نجامدریانه‌، و پشت وه‌و به‌ڵگه‌نامه‌یله‌ به‌سایمنه‌ ك هانه‌ ده‌سمانه‌وه‌ ، له‌وانه‌یش ئه‌و تاوانه‌یله‌ ك دژ وه‌ كورده‌یل فه‌یلى ئه‌نجام دریانه‌".

له‌لاى خوه‌یه‌و صه‌باح بیت الله ئه‌ندام په‌رله‌مان كوردستان و سه‌رۆك لوجنه‌ى شه‌هیده‌یل و ئه‌نفالكریایه‌یل له‌ په‌رله‌مان كوردستان له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌وه‌ ئویشى:"یه‌كم دیدار بۆرد ڕاوێژكارى، ك وه‌سه‌رپه‌رشتى دكتۆر كاوه‌ مه‌حمود ئه‌نجام گرت له‌تى لوجنه‌یگ دامه‌رزیا له‌باوه‌ت پێناسه‌ یا تعریف جینۆساید وه‌شیوه‌ى گشتى و جه‌هانییگ، جینۆساید گشت ئه‌و تاوانه‌یله‌ گریده‌وه‌ ك دژ وه‌ گشت پیكهاته‌گان ملله‌ت كورد ئه‌نجام دریانه‌ جوور ئه‌نفال و كیمیاواران هه‌ڵه‌بجه‌ و ئه‌و تاوانه‌یله‌ ك دژ وه‌ كورده‌یل فه‌یلى ئه‌نجام دریانه‌".

له‌ باوه‌ت جوگرافیاى كورده‌یل فه‌یلى ك كه‌فێده‌ ده‌یشت هه‌رێم كوردستان، بیت الله ئه‌وه‌ ڕووشنه‌وكرد ك:" جوگرافیاى كورده‌یل فه‌یلى نیه‌وده‌ ته‌گه‌ره‌یگ و كاریگه‌رى له‌ ڕه‌وت كێشه‌گه‌ نیه‌كه‌ید، یه‌عنى وه‌ختى ئویشن (جینۆساید ملله‌ت كورد و كوردستان) ئه‌وه‌ هه‌رچى كورده‌ گریده‌وه‌ و له‌وانه‌یش كورده‌یل فه‌یلى، ك به‌شیگ ڕه‌سه‌نن له‌ ملله‌ت كورد و هویچ جیاوازییگ نه‌یرن وه‌ل ئه‌و باقى پیكهاته‌گان ملله‌ت كورد".

جه‌ختیش له‌بان ئه‌وه‌كرد ك :" لوجنه‌ى تایبه‌ت وه‌ ناساندن جینۆساید ملله‌ت كوردستان، ئه‌ندامه‌یلى سه‌ر وه‌ لوجنه‌ى شه‌هیده‌یل و ئه‌نفالكریایه‌یل له‌ په‌رله‌مان و هاوكاره‌یلیان له‌ وه‌زاره‌ت شه‌هیده‌یل و ئه‌نفالكریایه‌یل".

شایان باسه‌ ك دادگاى باڵاى تاوان عیراقى بڕیار خوه‌ى له‌ كه‌یس كورده‌یل فه‌یلى له‌ 29 / 11 / 2010 ده‌ركرد و له‌تى ئه‌و تاوانه‌یله‌ وه‌ جینۆساید ناساند.

 

یاسر عماد