چوین زانید شویه‌گه‌د دروو ئه‌كا وه‌لدا؟
یه‌كیگ له‌و باوه‌ته‌یله ك ژن وه‌پیه‌و خه‌ریكه‌و هه‌میشه هویر له‌لیه‌و ئه‌كا، ئه‌ویش ئه‌وه‌سه ك ئایا راسگووه وه‌لیا، یا دروو ئه‌كا وه‌لیا! شایه‌ت فریه‌جار له‌یوا هویره‌و بكه‌ید ك وه ته‌واوى ئاگادارید له گشت كاره‌یل شویه‌گه‌د، وه‌لى له‌یرا چه‌ن نموونه‌یگ باش ئه‌كه‌یم تا بتویه‌نید له‌ڕى ئى نموونه‌یله راس و دروو شویه‌گه‌د ئه‌راد ئاشكرا بوود.
- ئه‌گه‌ر له‌ناونى دوجار یا سێجار له باسكردن باوه‌تیگ جیاوازى له وتنى داشت، ئه‌وه دیار و ئاشكراس ك دروو ئه‌كا وه‌لدا.
- ئه‌گه‌ر له‌وه‌خت قسه‌كردنى راسه‌وخۆ ته‌ماشاى ناو چه‌وه‌یلد نه‌كرد، ئه‌وه بزان ك چشتیگ له‌لید ئه‌شاریده‌و، وه‌لى خوازیاره وه شیوه‌یگ دروسكریاگ ئه‌راد باسى بكا، چوینكه راس ناكاو ناتویه‌نید ته‌ماشاى ناو چه‌وه‌یلد بكا.
- ئه‌گه‌ر باس رویداگیگ ئه‌راد كرد، له رووژیگ تر له‌لى بپرس، ئه‌گه‌ر باسه‌گه دروو بوى، ئه‌وه ناتویه‌نید جوور یه‌كه‌مجار ئه‌راد باسى بكا، ك بیگومان ئى تاقیكردنیشه فریه ئاسایى و ئاسانه.
- ئه‌گه‌ر له وه‌خت قسه‌كردنى وشه‌و باسه‌یلى فریه دوباره كرده‌و، یا وه‌ختیگ ك زانست باوه‌ڕ وه‌پى ناكه‌ید فریه قه‌سه‌م خوارد، ئه‌وه دڵنیابه له‌وه‌ك راس ناكا وه‌لدا.
ئه‌گه‌ر له قسه‌یگ گیریا، وه‌لى تواست باڵانس خوه‌ى راسه‌و بكا، ته‌ماشاى بكه، شیویان و تێكچگن وه‌پیه‌و دیار بوى، یا ئه‌ره‌ق كرد، دى بزان ك درووه‌گه‌ى ئاشكراسه‌و ده‌ركه‌فید.
ئنجا له‌یرا بیجگه له ئومید راسگوویى و دروسكردن خیزانیگ به‌خته‌وه‌ر له‌بان بنه‌ماى متمانه، مه‌رام هویچ تر نه‌یریم، هه‌ر وه‌و خاتریشه ئى باوه‌ته خستیمنه روى تا پیاوه‌یل قورتار بوون له درووكردن وه‌ل خیزانه‌یلیان و بتویه‌نن هه‌میشه راسى بویشن ك هه‌رچه‌نى تیه‌ڵیش بوود.
كوردۆ شابان
ج . أ
