تاوسان باوگ فه‌قیره
به‌ڵى، بیلنه‌م ئى مه‌سڵه‌ته بخه‌مه دروو!! ئمجا مه‌رامم له داستان شووڕشه‌یل شكه‌ست نییه ك له‌راسى رویدان، به‌ڵكوو خوازم ئه‌و بنه‌ما بخه‌مه دروو ك ئویشن تاوسان باوگ فه‌قیره.
ئى په‌نده ك له‌باوگ باپیره‌یلمانه‌و هاتگه‌و ئه‌رامان مه‌ندیه‌سه‌جى، له‌ى رووژگار ئیمه هویچ گرنگییگ نه‌یرێد، چوینكه ئه‌و هووكاره‌یله ك هیشت تاوسان بووده باوگ فه‌قیر له‌ى رووژگاره وجوود نه‌یرن.
ئه‌وسا باوگ وباپیره‌یلمان وه‌رز تاوسان وه وه‌رز خه‌یر زانستن، ك گشت سه‌وزى و میوه‌جاتیگ له‌تى فره‌و ئه‌رزانه، ك یه‌یش له‌وه‌رز زمسان وه‌و ئه‌رزانیه نه‌كه‌فتیاده ده‌س فه‌قیره‌یل و تواناى سه‌ندنى نه‌یاشتن.
ئى بنه‌ما ئیسه وجوود نه‌یرید، ئیسه گشت كه‌سیگ سه‌وزى و میوه‌جات له تاوسان و زمسان خوه‌ن و به‌رهه‌مه‌یل زمسانه‌یش له وه‌رز تاوسان وجوود دیرن له‌ئاكام په‌ره‌داین وه رێیه‌یل كشتوكاڵى و ده‌ركه‌فتن ماڵ شیشه‌یى ك زوورم به‌رهه‌مه‌یل كشتوكاڵى وه دریژایى ساڵ له‌تى كاڵیه‌ید.
ئمجا وه‌رجه چه‌ن رووژیگ چه‌وم كه‌فته یه‌كیگ له ره‌فیقه‌یلم و گیانى گشتى ئه‌ره‌ق كردوید، وته‌پیم: ئه‌راچه وه تاوسان ئویشن باوگ فه‌قیر، ك یه‌یش تاوسانه‌و ره‌حم وه حاڵ فه‌قیر ناكا ئه‌وه‌نه گه‌رم و گڕداره. منیش وتمه‌پى: له خودا بلاڵكیه‌وه تا له‌تاوسان واران بوارێدو پله‌ى گه‌رمى داوه‌زێد وه‌تایبه‌ت ك ئیمه هایمنه ناو مانگ ره‌مه‌زان و ئاشكراس ك مه‌ردم ئاسایى هه‌وه‌جه وه كه‌ش وهه‌واى گونجیاگیگ دیرن ئه‌را ئه‌وه‌ك بتویه‌نن رووژگ بگرن له‌ى مانگه.
ئمجا له‌وه‌ر ئه‌وه‌ك دوباره كار له‌بان بنه‌ماى(تاوسان باوگ فه‌قیر)بكه‌یم، داوا له وه‌زاره‌ت بازرگانى كه‌یم خوراك مانگ ره‌مه‌زان وه ته‌واوى بیه‌نه پیمان له‌ى رووژه‌یله تا بتویه‌نیم مه‌هانه‌ى بازرگان و دوكانداره‌یل بى وژدان وه‌پى نه‌یلیم ك جوور هه‌لیگ زاننه‌ى و گشت خوارده‌مه‌نییگ گران كردنه له‌ى مانگ پڕ له‌ره‌حمه‌ته، وه‌ل ئه‌وه‌یشا داوا له وه‌زاره‌ت كاره‌باو ئه‌نجوومه‌ن پارێزگایه‌یل كه‌یم كاره‌با ئه‌رامان دابین بكه‌ن و فشار بارنه بان خاوه‌ن موه‌لیده‌یل كاره‌بایى پابه‌ند بوون وه داین رێك وپێك كاره‌باو مامڵه‌ى خاس و په‌سه‌نیگ وه‌ل مه‌ردما بكه‌ن له‌وه‌خت داین كاره‌با.
عه‌لى وه‌حید عه‌بودى
ج. ا
