ستراتيجيه‌ت بيده‌نگی و مه‌ترسيه‌يل مه‌رگ كيشه‌ی كورده‌يل فه‌يلی

شفق نيوز

بايه‌سه‌ له‌بان عراقيه‌يل ئه‌و روێداگه‌يله‌ بزانن ك هاته‌ تويش كورده‌يل فه‌يلی له‌ قوناغه‌يل ژيان ك وه‌پيه‌و گوزه‌ر كردن، ئه‌ويش له‌وه‌ر ئه‌وه‌گ بار ئی پيكهاته‌ بزانن و له‌لی بڕه‌سنه‌و، ك يه‌يش ته‌نيا چاره‌سه‌يگه‌ ئه‌را زاڵبوين له‌بان دويره‌وكه‌فتن ناونی هاووڵاتيه‌يل وه‌ل بڵاوكردنه‌وه‌ی وه‌خشين و خوه‌شه‌ويسی، ك بيگومان كه‌سيگيش نيه‌ ده‌رفه‌ت نه‌ياشتوود ئه‌را وه‌رگرتن نه‌خش خوه‌ی له‌ی بواره‌.

ئمجا ئه‌گه‌ر كه‌ميگ بچيمنه‌ دوياوه‌ ئه‌را گوزه‌يشته‌، دوينيم ك به‌عسيه‌يل له‌ سه‌ره‌تای كاروانيان مه‌كينه‌ی كوشتن هاوردنه‌ كار و شۆفێنيانه‌و دووزه‌خيانه‌ هويره‌و كرديان دژ ملله‌ت له‌و سه‌رده‌مه‌ ك ژيان ئاشتيانه‌و خاك له‌تی ئاوه‌دان بوی، وه‌لێ ئمڕوو خاك ويرانه‌و مه‌ردميش تويش ڤايرۆس خوسه‌و كينه‌ت هاتنه‌و ته‌نيا چاره‌سه‌ريش ئه‌وه‌سه‌ خاك تازه‌يگ په‌يا بكريه‌ێد له‌ی ژينگه‌و باوه‌ڕمان ئه‌وه‌سه‌ ك بايه‌سه‌ وه‌فادار بويمن ئه‌را ئه‌و خاكه‌و ئه‌گه‌ريش نه‌ف له‌ی ده‌رفه‌ت وه‌رده‌سه‌ وه‌رنه‌گريم، ئه‌وه‌ بيگومان قورتار نادويمن له‌ی ده‌رده‌سه‌ريه‌ ك له‌ی ژيه‌يم.

ئيمه‌ی فه‌يليه‌يل دڵته‌نگی گوزه‌يشت ك تيكه‌ڵ بوی وه‌ل ترس ئاينده‌ خوه‌شی ئی رووژگاره‌ له‌ليمان دزی و ئه‌و زه‌ره‌ده‌يليشه‌ ك دايمنه‌ی له‌وه‌خت سه‌ركه‌فتن ژانه‌يل فيشتر بوی، چوينكه‌ ئه‌و ئاگره‌ ك وه‌ربوی له‌ جه‌سه‌يلماان و زه‌فه‌ر له‌ رووحه‌يلمان هاورد، ئيمه‌ خوه‌مان ده‌می دايم تا بويمنه‌ی چيلگ ئه‌ڕای، وه‌ل ئه‌وه‌يشا كه‌س مه‌زڵومتر له‌وه‌ نيه‌ ك داواكار گشتی ليست شكايه‌ته‌گه‌ی ئه‌خوه‌نێده‌وه‌و ناچاره‌ ئاماده‌ی دانيشتن دادگايه‌گه‌ی نه‌دێ.

ئمجا ئيمه‌ هه‌ميشه‌ گرينگی ئه‌يه‌يمنه‌ ئه‌وه‌گ مه‌ردمان تر ده‌سنيشانی ئه‌كه‌ن ئه‌رامان جوور سيناريۆ و ديد و بڕياره‌يل و گشت وه‌ختيگيش ئه‌گه‌رديمنه‌ شوونيان تا ڕاده‌يگ ئه‌وه‌ له‌ هويره‌و ئه‌وه‌يم ك ئيمه‌ په‌يوه‌نديداريم وه‌ كيشه‌ی خوه‌مان و وه‌رپرسيم له‌بان ئاينده‌مان و داخدارترين چشتيگيش مه‌ترسی مه‌رگ كيشه‌گه‌مانه‌ له‌ سه‌ره‌تای ته‌مه‌ن و له‌ هه‌مان وه‌ختيش ئيمه‌ ناخوازيم ئحساسمان له‌ده‌س بيه‌يم وژدانمان له‌لی به‌تاڵ بكه‌يم و كينه‌تدار له‌ليمان ده‌ربچێد و گووش وه‌ كيشه‌گه‌ نه‌يه‌يم، وه‌لێ ئه‌وه‌گ ئيمه‌ هه‌وڵ ئه‌ڕای ئه‌يه‌يم ئه‌وه‌سه‌ ك ئوميد باريمنه‌و ئه‌را بان ڕيڕه‌و خوه‌ی وه‌ره‌و كيشه‌گه‌مان.

له‌يرا ئه‌خوازم ئاماژه‌ وه‌ ئه‌وه‌ بكه‌م‌ ك مه‌يدانه‌يل جه‌نگ توانای ئه‌وه‌ هه‌س ئاڵشت بكريه‌ن ئه‌را باخچه‌يل ئاشتی ئه‌گه‌ر گشت لايه‌نه‌يل ره‌زامه‌نی له‌بان شايسته‌يی نيشان بيه‌ن، ئه‌ويش وه‌ مه‌رجيگ ئه‌و بيده‌نگی به‌ره‌يل جه‌نگه‌ له‌ هوير نه‌وه‌ن ك هاوار و ناڵه‌ی هه‌زاران قوربانی قويته‌و دا.

ئمجا له‌ گوزه‌يشته‌ يای گرتيمنه‌ ك ئه‌رك سياسه‌ت له‌ هه‌مان ده‌رفه‌ته‌و نايه‌ێد، به‌ڵكوو له‌ نه‌فوه‌رگرتن له‌و ده‌رفته‌يله‌سه‌و ئيمه‌و ئه‌وانه‌گ په‌رچه‌م فه‌يليه‌يل هه‌ڵگرتنه‌ له‌ وه‌خته‌يليگ زويه‌و هه‌وه‌جه‌ وه‌ ئه‌وه‌ نه‌يرێد ئامار هاوڕيه‌يلمان بكريه‌ێد، وه‌ل ئه‌وه‌يشا هه‌رچه‌نی هه‌وڵيش بيه‌يم ناتويه‌نيم گوزه‌يشته‌ قورتار بكه‌يم، وه‌لێ حاڵ حازر له‌ی وه‌خته‌يلمانه‌ و ئه‌وه‌گ ئاينده‌ ئه‌رامان ئاماده‌ی كردگه‌ شايه‌ت شاره‌زايه‌يل تر بياشتوود و ئه‌و روێداگه‌يل باس بكه‌ن ك دويننه‌ی يا باس له‌و ستراتيجيه‌ته‌ بكه‌ن ك وه‌پی پڕچه‌ك كريايم.

شه‌يما كه‌ريم