تیرۆر جوانه‌يل ئه‌كوژێ

شفق نيوز

 

 

له‌یره‌ ئاده‌میزاده‌یل بوونه‌ شماره‌و دى بیجگه‌ شماره‌و داخ فره‌ى ئه‌و شماره‌یله‌ هویچ تر له‌باوه‌تیانه‌و باس ناكریه‌ید، یه‌یش له‌وه‌ختیگ هه‌ر یه‌ك له‌و قوربانیه‌یله‌ جوور ئاده‌میزادیگ تر خاوه‌ن ئومیدو ئاره‌زوو گه‌وران و ئه‌گه‌ر داستان ژیان هه‌ركامیان له‌جیاى ئه‌و شماره‌ باس بكریه‌ید، ئه‌وه‌ كاره‌سات گه‌ورایگه‌ ك وه‌ دڕنده‌ترین شیواز كریه‌نه‌ قوربانى.

 

داستان فره‌یگ له‌وانه‌ دڵته‌زنتر و كاره‌ساتتره‌ له‌ كاره‌یل تیرۆریستى، وه‌لى هه‌میشه‌ ئه‌و جوانیه‌یله‌ ك ها له‌ داستان ژیان قوربانیه‌یل، بوونه‌ قوربانى شماره‌یل، ك ئویشن كرده‌وه‌یگ تیرۆریستى ئه‌نجام دریاگه‌و سه‌د كه‌س شه‌هیدو دوسه‌د ئه‌وه‌نه‌یش زه‌خمدار بوینه‌ى له‌تى ك له‌ناونیان ئه‌وه‌نه‌ پۆلیس و ئه‌وه‌نه‌ سه‌رباز و باقیه‌گه‌ى هاووڵاتیین.

 

دى داستان ژیان ئه‌و پۆلیس و سه‌رباز و هاووڵاتیه‌یله‌ له‌ناونى شماره‌ى ئه‌و پۆلیس و سه‌رباز و هاوڵاتیه‌یله‌ گوم بوون، ك میدیایه‌یل وه‌گشتى وه‌رپرسن له‌ بویچگه‌وكردن ئه‌و ئاده‌میزاده‌یله‌ له‌ ئاده‌میزاده‌و ئه‌را شماره‌.

 

وه‌لى وه‌ختیگ هاوڕى یا هاوساى یه‌كیگ له‌ قوربانیه‌یل دوینید و باس ژیان ئه‌و شماره‌ ئه‌راد ئه‌كا، دى له‌و زوڵمه‌ ره‌سیده‌و ك ئى ئاده‌میزاده‌ چوین جاریگ تر كریاسه‌ قوربانى شماره‌یل. ئه‌را نموونه‌: ئه‌و ته‌قینه‌وه‌یله‌ ك له‌ كه‌ركووك رویده‌ن زوورم قوربانیه‌یلى كوردن ك له‌وه‌ر كوردبوین و جووریگ له‌ ئاشنایه‌تى په‌لكیش ژنه‌فتن داستان ژیانیان بوید، وه‌لى ئه‌وه‌ك له‌ میدیایه‌یل ژنه‌فیه‌ن جاریگتر ته‌نیا بوونه‌ چه‌ن شماره‌یگ .

 

رووژانه‌ دوینید ئه‌و كرده‌وه‌یل تیرۆریستیه‌ روى ده‌ن و جایه‌ڵ جوانه‌یل كه‌نه‌ قوربانى، وه‌لى میدیایه‌یل ئى جوانه‌یله‌ كه‌نه‌ چه‌ن شماره‌یگ و جوانیه‌گان كوشن، وه‌پرسه‌یلیش وه‌ل فره‌یى شماره‌یلا راهاتنه‌و شایه‌ت هه‌ر نه‌چن فاتحایگیش له‌ پرسه‌گه‌یان بخوه‌نن ئه‌را رووح ئى جوانه‌یله‌.

 

هه‌ر له‌وه‌ر ئه‌وه‌یش وه‌ دڵنیاییه‌و گشت ئه‌و كه‌سه‌یله‌ ك بوونه‌ قوربانى، خاوه‌ن داستان تراژیدیاو ئومیدو ئاره‌زووه‌یل گه‌وران له‌ژیان، ك حه‌یفه‌ ئه‌و ئاره‌زووه‌یله‌ وه‌و ده‌رده‌ بچن، هه‌ر وه‌و خاتریشه‌ بایه‌سه‌ رى له‌تیرۆر بگیریه‌ید تا گشت جوانه‌یل نه‌ونه‌ قوربانى.

 

عارف قوربانى

ج. ا