هه‌ڵه‌وگه‌ردانن ماف كورده‌يل فه‌يلی، ئه‌ركێگ ميللی و وه‌پرسياريه‌تیيگ مێژووييه‌

شفق نيوز

نه‌ته‌وه‌يل جياواز له‌ ناو وڵات، بويه‌ مه‌مه‌ر يه‌گ مه‌ردم عيراق وه‌ تايبه‌ت ئه‌را كورده‌يل فه‌يلی ژيانيان تيڵه‌و بوودو  تام تيه‌ڵ زڵم و نادادپه‌روه‌ری بچه‌شن.

كورده‌يل فه‌يلی هانه‌ شوون يه‌گ ناسنامه‌ی نه‌ته‌وه‌يی خوه‌يان بارنه‌‌ ده‌س و هه‌ چوی نه‌ته‌وه‌يل تر له‌ عيراق له‌ وڵات خوه‌يان و له‌ ژيرسايه‌ی حكومه‌تێگ ديموكراتيك ك ئه‌وانيش به‌شێگ له‌ مه‌ردم عيراق بزانێد، ژيان بكه‌ن. حكومه‌تێگ ك ناسنانمه‌ی عيراقیيان ك وه‌ده‌س حكومه‌ته‌يل گوزه‌يشته‌ی عيراق له‌ليان سه‌ننه‌، جارتر هه‌ڵه‌وگه‌ردنێگ پيان.

كورده‌يل فه‌يلی هانه‌ بان ئه‌ی باوه‌ڕه‌ ك دويای رميان رژيم به‌عس و دامه‌زرانن ده‌وڵه‌ت تازه‌ی عيراق له‌ ساڵ ٢٠٠٣، بتويه‌نن وه‌ مافه‌يل بنه‌ڕه‌تی خوه‌يان له‌ عيراق بره‌سن و نۆينه‌ره‌يل خوه‌يان له‌ ناو په‌رله‌مان و و‌ه‌زاره‌تخانه‌يل ئه‌ی حكومه‌ت تازه‌ له‌ عيراق داشتوون و  له‌ داوايل و مافه‌يليان ديفاع بكه‌ن، وه‌لی ئيچنه‌ كارێگ سه‌ر نه‌گرت و  كێشه‌ی وان بويه‌ باوه‌تێگ ئه‌وڵا نريای له‌ عيراق.

زڵم و بێ عه‌داڵه‌تی ده‌وڵه‌ته‌يل گوزه‌يشته‌ی عيراق بويه‌ مه‌مه‌ر يه‌گ كورده‌يل فه‌يلی له‌وڵاته‌يل و ناوچه‌يل جياوه‌جيای جه‌هان په‌خشه‌و بوون و  فره‌تر له‌ هه‌روه‌خت تر ئيسه‌ هه‌وه‌جه‌ وه‌ يه‌ ديرن تا يه‌كه‌و بگرن.

پێويسته‌ وه‌ يه‌يشه‌ ئشاره‌ بكه‌يم ك وه‌زاره‌ت بازرگانی عيراق چه‌نێ له‌يه‌وه‌ر وتگه‌: وه‌ ته‌مامی داوايل كورده‌يل فه‌يلی جوواو ئه‌دێ. ئيچنه‌ كارێگيش ئه‌ده‌ێ چوين رفلكسێگ ئه‌رينی له‌ وه‌رايوه‌ر ئه‌ی چينه‌ له‌ نه‌ته‌وه‌ی كوردو هه‌ڵه‌وگه‌ردانن مافه‌يل بنه‌ره‌تيان بزانيه‌يد.

هه‌ له‌ سه‌ريه‌يشه‌، له‌ ئه‌ودويای وه‌زاره‌تخانه‌يل و ئداره‌يل و ده‌زگايل ده‌وڵه‌تی ئه‌خوازيم ك ئه‌وانيش وه‌ داوايل و خواسته‌يل قه‌ره‌بۆ كردن ئه‌و زيانه‌يله‌گ وه‌كورده‌يل فه‌يلی ره‌سيه‌ جوواوه‌ به‌ن و وه‌ هه‌ڵه‌وگه‌ردانن ناسنامه‌و ماڵ و موڵكه‌يل زه‌فت كريايان،  مه‌ڵهه‌مێگ بنه‌نه‌و بان به‌شێگ له‌ ژانه‌يل ئه‌ی چينه‌ له‌ نه‌ته‌وی كورد.

هه‌ وه‌يجووره‌يشه‌ له‌ليان ئه‌خوزايم، مه‌دره‌سه‌ێگ ئه‌را په‌روه‌رده‌ كردن مناڵه‌يل فه‌يلی ك بتويه‌نن وه‌ زووان كوردی بخوه‌نن دابنن تا وه‌ی جووره‌ له‌ مافه‌يل مێژوويی، نه‌ته‌وه‌يی و فه‌رهه‌نگی ئه‌ی به‌شه‌ له‌ نه‌ته‌وه‌ی كوردی پشتێوانی بكه‌ن. بايه‌د نۆينه‌ره‌يلێگ له‌ كورده‌يل فه‌يلی له‌ كۆنفرانسه‌يل و كۆوه‌وبوينه‌يل و ده‌زگايل ده‌وڵه‌تی بودان تا له‌ مافه‌يل ره‌وای خوه‌يان ك له‌ جارنامه‌ی هه‌ق ئايه‌ميزاد وه‌ پێ ئشار كرياس، ديفاع بكريه‌يد.

هه‌ڵه‌وگه‌ردان مافه‌يل كورده‌يل فه‌يلی ئه‌ركێگ مللی و وه‌رپرسياره‌تی مێژووييه‌، بايه‌د وه‌ل واز كردن ده‌وه‌ريل په‌روه‌رده‌يی پێشه‌يی، رێ ئه‌را وه‌ دی هاتن چينێگ له‌ كارگه‌ره‌يل پێشه‌ی و زامت كيش ك بوونه‌ مه‌مه‌رێگ ئه‌را وه‌‌ره‌وناوچێن و گه‌شه‌ی  عيراق واز بكريه‌يد.

مه‌حمه‌دعه‌لی سه‌ماوی