كاردانه‌وه‌ى كرده‌وه‌یل تیرۆریستى له‌ عیراق و وڵاته‌یل عه‌ره‌بى

شفق نيوز

كوومه‌ڵگاى عیراقى زیاى چن، كاردانه‌وه‌ى ئیزدواجى مه‌حكوومكردن ئه‌و تاوانه‌یله‌ ك دژ وه‌ مه‌سیحیه‌یل له‌ عیراق و مصر ئه‌نجام دریه‌ن وه‌رده‌وامه‌، یه‌یشه‌ هیشت چاودێره‌یل گوزارش له‌ سه‌رسوڕمان خوه‌یان بكه‌ن له‌ ئزدواجیه‌ت پێوه‌ر یا معیاره‌یل كاردانه‌وه‌ى سه‌باره‌ت وه‌و كرده‌وه‌یل تیرۆریستى و ئه‌و خوینڕشاننه‌ ك دژوه‌ پیكهاته‌یل ملله‌ت عیراق ئه‌نجام دریه‌ن چ موسڵمان بوون یا مه‌سیحى یا ئه‌وباقى پیكهاته‌یل كوومه‌ڵگاى عیراقى.

چاودێره‌یل ئاماژه‌ وه‌ومه‌حكووم كردن فراوانه‌ دان ئه‌را ئه‌و كرده‌وه‌یل تیرۆریستیه‌ ك له‌ لایه‌نه‌یل ڕه‌سمى جه‌هانى و هه‌رێمى نیشانى دان ك ڕه‌سیه‌ ڕاده‌ى مه‌حكوومكردن ئاشكراى تاوانه‌گه‌ى ئه‌سكه‌ندریه‌ له‌ لایه‌ن شێخ عبدالعزیز بن عبدالله موفتى گشتى سعودیه‌ و سه‌رۆك ده‌سته‌ى زانایه‌یل گه‌ورا و به‌رێوه‌بردن په‌یجووریه‌یل زانستى و فه‌تواداین.

عبدالهادى الحسانى نوێنه‌ر هاوپه‌یمانى نیشتمانى له‌ په‌یوه‌ندییگى وه‌ل ماڵپه‌ڕ شه‌فه‌ق هووكار ئى ئزدواجیه‌ته‌ له‌ لایه‌ن وڵاته‌یل عه‌ره‌بى له‌ڕوى ئه‌و كرده‌وه‌یل تیرۆریستى ڕووژانه‌ ك عیراق وه‌خوه‌یه‌و دوینیده‌یان وه‌ل ئه‌و ڕویدایه‌یل تیرۆستیه‌ ك له‌ى ولات عه‌ره‌بى یا ئه‌واكه‌ ڕوى ده‌ن ئه‌وه‌سه‌ ك :" عیراق دیموكراتى و ده‌ستوور و حكوومه‌ت و ملله‌ته‌گه‌ى هه‌وڵ ده‌ن ئه‌را چه‌سپانن بنه‌مایه‌یل دیموكراسى، و له‌ولایشه‌وه‌ ڕژیمه‌یل عه‌ره‌بییگ تۆتالیتارى یا شمولى هه‌س له‌وه‌ ترسیه‌ن ك ئه‌زموونه‌گه‌ى عیراق خشه‌بكه‌ید وه‌ره‌و وڵاته‌یلیان، ئه‌ویش وه‌ریگه‌ى ئاگاداربوین ملله‌ته‌یل و كاریگه‌ریبوینیان وه‌وه‌گ له‌ عیراق روى ده‌ید له‌ ئازادى و دیموكراسى".

الحسانى زیاتریش وت :"دویاى گوێڕانكاریه‌گه‌ى ساڵ 2003له‌ عیراق و ڕمیان سه‌ربازیى ڕژیم وه‌رین ك كاردانه‌وه‌ى ئعلامى و كوومه‌ڵایه‌تى دروسكرد و جووریگ له‌ ترس له‌ لاى ملله‌ته‌یل عه‌ره‌بى دروسكرد و ڕژیمه‌یل حكومدار تویه‌نستن له‌وه‌ سوود وه‌ربگرن و بخه‌نه‌ى به‌رژه‌وه‌ندى خوه‌یان". و له‌بان ئه‌و باوه‌ڕیشه‌سه‌ ك گشت حكوومه‌ته‌یل ناوچه‌گه‌ بایه‌ت بوى له‌ڕوى تیرۆر بووسیاتان، و ئه‌گه‌ر ئى كاریشه‌ بكردیان تیرۆر وه‌ى جووره‌ گه‌وراوه‌ نه‌وى و نه‌ڕه‌سیاده‌ گشت وڵاته‌یل ناوچه‌گه‌، و یانه‌ بایه‌ت بوى هه‌ڵوێست ئنسانییگ بیاشتیان دویر له‌ سیاسه‌ت و تایه‌فه‌گه‌رى.

له‌باوه‌ت هه‌ڵوێست یا موقف دوشمنانه‌ى ڕژیم وه‌رین دژ وه‌ زوورمى وڵاته‌یل ناوچه‌گه‌ و له‌وانه‌یش وڵاته‌یل عه‌ره‌بى الحسانى وت:" وه‌ڕاسى ئه‌یه‌ كار ئه‌ڵاجه‌وییگه‌ چوینكه‌ ڕژیم وه‌رین ك دژ وه‌و وڵاته‌یل عه‌ره‌بیه‌ بوى ك دڵسووزى و هاوخه‌مى وه‌لیا نیشاندان وه‌ختى ئه‌مریكا په‌لامارى دا، و یه‌یشه‌ ئه‌وه‌ چه‌سپنید ك ئى ڕژیمه‌یله‌ گشتیان هانه‌ یه‌ك خانه‌ چ دیكتاتۆرى بوون یا مه‌له‌كى یا كۆمارى، و دوشمنایه‌تییشیان وه‌ل عیراق ئمڕوو له‌وه‌ر ئه‌وه‌سه‌ ك چویه‌سه‌ خانه‌یگ تر و تواید بڕه‌سیده‌ كاروان جه‌هان دیموكراتى".

دكتۆر به‌درخان سندى سه‌رنویسه‌ر ڕووژنامه‌ى ته‌ئاخى له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشى:"شه‌هیدبوین هه‌ر هاووڵاتییگ عیراقى له‌ هه‌ر پیكهاته‌ى دینى یا مه‌زه‌وى یا نه‌ته‌وه‌یى بوود كار خه‌ته‌رناكیگه‌ له‌ بان سه‌ڵامه‌تى ملله‌ت، و تیرۆریش عیراق له‌ ناو ده‌ریاى خوین نقومه‌وكردیه‌، و بایه‌خداین جه‌هان و مه‌حكوومكردن ئه‌و تیرۆره‌ ك دژ وه‌ مه‌سیحیه‌یل له‌ وڵاته‌یلیگتر ئه‌نجام دریه‌ید له‌وه‌ر ئه‌و ڕوڵ یا نه‌خشوده‌وره‌سه‌ ك جالیه‌تگانیان له‌ وڵاته‌یل كووچبه‌ر ئه‌نجامیده‌ن، وه‌لى جالیه‌ته‌یل عیراقى چ مه‌سیحى بوون یا عه‌ره‌ب یا كورد چالاكى میدیایى و سیاسییان كاریگه‌ر نه‌وى له‌ بان ناوه‌نده‌یل بڕیارداین جه‌هانى و ڕاى گشتى جه‌هانى، وه‌و ده‌لیله‌ ك پاپاى ڤاتیكان چ هه‌ڵوێست یا موقفیگ داشت و ئه‌و قسه‌یل توندیه‌ وه‌رانوه‌ر ئه‌وه‌گ له‌ ئه‌سكه‌ندریه‌ ڕوى دا دژ وه‌ كڵێساى قه‌دیسه‌یل".

 

كفاح هادى