كى ئه‌‌‌را یه‌‌كمجار ناو پێشمه‌رگه‌‌ وه‌‌زووان هاورد؟

شفق نيوز

ته‌‌ماشاى كریه‌ێد، وه‌‌و كه‌‌سه‌‌ ئویشن پێشمه‌رگه‌‌ ك‌ خاوه‌‌ن هویروباوه‌‌ڕیگ پاكه‌‌ و ئه‌‌‌را وه‌‌دیهاوردن ژیانیگ سه‌‌ربه‌‌ست و ئازاد‌ ئه‌‌‌را ملله‌‌ت و نیشتمانه‌‌گه‌‌ى و گشت ئنسانیه‌‌ت  گیان خوه‌‌ى كه‌ێده‌‌ قوربانى.

 

له‌‌ساڵه‌‌یل خه‌‌بات،  ئه‌‌‌و وه‌‌خته‌‌گ خه‌‌وه‌‌ر هاتن‌ پێشمه‌رگه‌‌ ئه‌‌‌را ناوچه‌‌یل ژیرده‌‌س حكوومه‌‌ت به‌‌عس‌ په‌‌خشه‌‌و بیاد، ئه‌‌‌و كه‌‌سه‌‌یله‌‌گ نه‌‌وكه‌‌ر و خوه‌‌ى فرووش بوین و وه‌‌ل ده‌‌زگایه‌‌یل حزب به‌‌عس له‌‌ ئه‌‌‌من و ئستخبارات و ڕه‌‌فیق حزبى هاوكارى ‌كردیان و ‌كه‌‌فتیانه‌‌ گیان مه‌‌ردم بى ده‌سڵات و بى تاوان كورد، له‌‌ترس ناو پێشمه‌رگه‌‌ گیانیان هاتیه‌‌ده‌‌ له‌‌رزه‌‌و فه‌‌‌رار كردیان و ته‌‌نانه‌‌ت له‌‌و ‌شوونه‌‌یلیشه‌‌ ك خوه‌‌یان له‌‌تى شاردیانه‌‌و خه‌‌و وه‌‌چه‌‌وه‌‌یلیان نه‌‌كه‌‌فتیاد، چوینكه‌ زیه‌‌ڵگیان له‌‌ ناو پێشمه‌رگه‌‌ چیاد.

 

ئه‌‌‌و شه‌‌وه‌‌گ واوواران ‌بویاتاد وتیان ئمشه‌‌و شه‌‌و پێشمه‌رگه‌‌س‌، پێشمه‌رگه‌ وشه‌‌ یا كه‌‌لیمه‌‌یگ ته‌‌ركیبییه‌‌ ‌ (پێش – مه‌‌رگ) و وه‌‌و كه‌‌سه‌‌یله‌‌ ئویشن پێشمه‌رگه‌‌ ك گیان خوه‌‌یان له‌‌ ڕێ هویروباوه‌‌ڕیگ یا فكروعه‌‌قیده‌‌یگ كه‌‌نه‌‌ قوربانى ك‌ باوه‌‌ڕ وه‌‌پى دیرن.

ئمجا بیلا بزانیمن كى داهێنه‌‌ر یا مۆخته‌‌رع ئه‌‌‌ى وشه‌‌ى پیرۆز و گه‌‌وراسه‌. ئویشن ڕووژێ له‌‌ ڕووژان له‌ ‌كومار كوردستان له‌‌ مه‌‌هاباد ( پێشه‌‌وا قازى محه‌‌مه‌‌د) كۆبوونه‌‌وه‌ یا ئجتماعیگ وه‌‌ل سه‌‌ركردایه‌‌تى یا قیاده‌و هێز چه‌‌كدار كومار داشت، له‌‌ كۆبوونه‌‌وه‌‌ یا ئجتماعه‌‌گه‌‌ پێشنیار كه‌ێگ ناویگ ئه‌‌‌را هێز چه‌‌كدار كومار ده‌‌سنیشان بكریه‌ێد، هه‌‌ر وه‌‌یخاتریشه‌‌ چه‌‌نه‌‌ها ناو له‌‌لایه‌‌ن چه‌‌ن كه‌‌سه‌‌و پێشنیار ‌كریا، جوور هێز سه‌‌ر‌بازى یا قوه‌‌ت عه‌‌سكه‌‌رى، جه‌‌نگاوه‌‌ر، فیدائى و.. له‌‌وه‌‌خت كۆبوونه‌‌وه‌‌ یا ئجتماعه‌‌گه‌‌ چاى‌ چى پێشه‌‌وا قازى ك‌ ناوى ( ئه‌‌‌حمه‌‌د ده‌سماڵ‌) بوى، تیه‌‌یگه‌‌ ناو و باس و‌ گفتوگوو ئاماده‌‌بویه‌‌یل كۆبوونه‌‌وه‌‌ یا ئجتماعه‌‌گه‌‌ ژنه‌‌فیگ، سه‌‌باره‌‌ت وه‌ ‌په‌‌یاكردن ناویگ ئه‌‌‌را هێز چه‌‌كدار كومار كوردستان، ئه‌‌‌ویش داوا له‌ پێشه‌‌وا قازى محه‌‌مه‌‌د كه‌‌ێگ ك‌ ئه‌‌‌گه‌ر ده‌‌رفه‌‌ت یا مجال بوود ئه‌‌‌ویش له‌‌بان ئه‌‌‌ى باوه‌‌ته‌‌ پێشنیاریگ بكه‌ێگ، پێشه‌‌وایش ئویشیگ: بفه‌‌رما قسه‌ ‌بكه‌،‌ ئه‌‌‌حمه‌‌د ده‌‌سماڵ چایچیش ئویشیگ: “جه‌‌ناب پێشه‌‌وا قازى، من ناویگ ها له‌‌ ده‌‌ماغم ئه‌‌‌را ئه‌‌‌و هێزه‌‌ ئه‌‌‌گه‌‌ر وه‌‌دڵدان بوود، ئه‌‌‌وه‌‌یش ناو پێشمه‌رگه‌‌س‌”، ئه‌‌‌وانیش له‌‌شوون گفتوگووكردن و قسه‌‌وباس و موناقی‌شه‌‌ وه‌ ‌فره‌‌تر ده‌‌نگ ئه‌‌‌ى ناوه‌‌ په‌‌سن كه‌‌ن، هه‌‌ر وه‌‌یخاتریشه‌‌ له‌‌و وه‌‌خته‌‌و تائیسه‌‌ ئه‌‌‌و‌ ناوه‌‌ وه‌ ‌پیرۆزى و قداسه‌‌ت ئه‌‌‌را ملله‌‌ته‌‌گه‌‌مان مه‌‌نگه‌‌سه‌‌و. هه‌‌ز‌اران سه‌ڵام ئه‌‌‌را گیان ئه‌‌‌حمه‌‌د ده‌‌سماڵ و گشت پێشمه‌رگه‌‌یگ شه‌‌هید‌.

 

ناوزه‌نگ