ژینگه‌ى دیموكراسى و له‌ناوبردن ده‌نگ فه‌یلى

شفق نيوز

خوه‌نستیمنه‌و ده‌رهه‌ق وه‌ملله‌ت بیچاره‌ هه‌ر له‌فه‌یسه‌ڵ یه‌كه‌م بگر تا غازى و گه‌یلانى و به‌كر و سه‌دام، ك ئیسه‌یش دویاى رمیان رژیم دكتاتۆرى و هاتن رژیم دیموكراسى و یه‌كێتى ئه‌را بان ته‌خت ده‌سڵات هیمان هه‌ر ئه‌و زوڵم و سته‌مه‌ وه‌رده‌وامه‌و حوكم ته‌كڕه‌وى له‌ژیر چه‌تر دیموكراسى خوه‌ى له‌ناو ئه‌و تاریخ سیه‌ى پڕ له‌ تارماییه‌ خوه‌ى ناونویس كردو چیه‌ ڕز ئه‌و رژیمه‌یل شۆڤێنى و ره‌گه‌زیه‌ ك حوكم دادگه‌رانه‌ له‌وژدان نه‌یاشتنه‌و هه‌ر له‌هه‌وڵ عرووبه‌و ره‌گه‌زپه‌رسى و جیاوازیكردن بوینه‌ له‌ناونى پیكهاته‌و چینه‌یل جوراوجوور كوومه‌ڵگا.

ئاشكراس ك تا دویه‌كه‌ ملله‌ت كورد چه‌وسیاگ و ژیرده‌سه‌ بویه‌و خاك و نیشتمانى داگیر كریاگه‌، وه‌لى ئمڕوو له‌هه‌رێم كوردستان ژیان تایبه‌تیگ پڕ له‌ئاسووده‌یى و سه‌رفرازى هه‌س له‌سایه‌ى خوداو خه‌بات وه‌رده‌وام كورد. ئنجا ته‌نیا چینیگ ك تائیسه‌یش زوڵم و حاشا له‌وجوود و هه‌قه‌یلیان ئه‌كریه‌ێد"كورده‌یل فه‌یلى"ین.

كورد فه‌یلى ژیان تیه‌ڵیگ به‌نه‌ سه‌ر، ساڵه‌یل فره‌یگه‌ گه‌ردنه‌ شوون هه‌قه‌یلیان، خوه‌شاڵ بوین وه‌ڕمیان دكتاتۆریه‌ت و نه‌مه‌ندن سه‌دام و دارو ده‌سه‌ى. چه‌وه‌ڕى ئه‌وه‌ كردن له‌سه‌رده‌م ئازادى و دیموكراسى ئاره‌زووه‌یلیان بایده‌ دى، زه‌خمه‌یلیان ساڕیژ بكریه‌ێد، ماڵ و موڵكه‌یل زه‌فتكریاگیان باریه‌ێده‌و، حكوومه‌ت یاسا وه‌رگرى له‌هه‌قه‌یلیان بكا، چاره‌نویس روڵه‌یل بى سه‌روشوونیان ئاشنا بكا، قه‌ره‌بوو بكریه‌ن، وه‌لى له‌یوا دیاره‌ كاروان ژیان ئى چین سته‌مدیده‌ پڕه‌ له‌به‌دبه‌ختى و كاره‌سات جوراوجوور، پڕه‌ له‌نائومیدى و كووچ وه‌پیكردن و بیبه‌شى!!!

كورده‌یل فه‌یلى خوه‌شڵه‌خوه‌شى ئه‌وه‌ كردن بڕیار دادگاى باڵاى تاوانه‌یل ده‌رهه‌قیان جیوه‌جى بوودو ترویسكه‌ى رووشنایى بویننه‌ چه‌و، ناسنامه‌یان بیه‌نه‌وه‌، وه‌لى ئه‌وه‌سه‌ جاریگ تر له‌نوو ئه‌نفال كریه‌ن و ده‌نگبڕ بوون و زووان و كلتووریان ریشه‌كیش كریه‌ێد له‌ساى ده‌وڵه‌ت یاساو ده‌ستوور هه‌میشه‌یى، وه‌لى ئیجاره‌ له‌ڕى وزاره‌ت ژینگه‌ى عراق دیموكراسى له‌كه‌ش وبار سه‌خت و ناپوختیگ ك لایه‌نه‌یل له‌تى یه‌كانگیر نین و شكه‌ست پرووسه‌ى سیاسى بویه‌سه‌ هووكار له‌ناوبردن ده‌نگ فه‌یلى له‌به‌غداى پایته‌خت ك وزاره‌ت ژینگه‌ موڵه‌ت 10 داسه‌ رادیۆى"شه‌فه‌ق"و بایه‌سه‌ ماوه‌ى ئى ده‌ رووژه‌ نه‌مینێدو بووه‌سیه‌ێد. یه‌یش ماناى ئه‌وه‌سه‌ جاریگتر كورده‌یل فه‌یلى سزا دریه‌ن، سزاگه‌یش ئه‌وه‌سه‌ روڵه‌یل ئى چینه‌ بیبه‌ش كریه‌ن له‌ئازادى و هه‌قه‌یلیان.

بیگومان رادیۆى شه‌فه‌ق ك له‌ساڵ 2004 دامه‌زریا، گشت مه‌رجه‌یلى یاساییه‌و ته‌نانه‌ت دویاى جیوازبوینى ئه‌را ناوچه‌ى كه‌ڕاده‌ ره‌زامه‌نى له‌بان داناین ته‌وه‌ر یا بورجیگ له‌لایه‌ن خود وزاره‌ت ژینگه‌ى عراقى وه‌پى دریاگه‌ وه‌كتاو شماره‌"1588" له‌ 1/ 6/ 2009 ئه‌را داناین بورجه‌ تازه‌گه‌ى، وه‌لى ئه‌ڵڵاجه‌وى ها له‌ورا هه‌مان وزاره‌ت وه‌ كتاو شماره‌"439" داواى لاوردن و ئه‌ڵگرتن بورجه‌گه‌ ئه‌كا وه‌مه‌هانه‌ى كاریگه‌رى ئى بورجه‌ له‌بان هاووڵاتیه‌یل ده‌وروه‌رى!!. ئایا ئه‌گه‌ر ئى مه‌سه‌له‌ هووكاریگ سیاسى له‌پشتى نیه‌ ماناى چه‌س ته‌نیا رادیۆیگ كوردى له‌به‌غدا نه‌مینێد!؟ ئى ئه‌ڕاچه‌ وشیارى نه‌دریاسه‌ ئیزگه‌یگ تر له‌شار به‌غدا؟ یه‌یش له‌وه‌ختیگ ك له‌شان رادیۆى شه‌فه‌قه‌و رادیۆیگ تر مه‌سیحیه‌یل وه‌دویرى 20مه‌تر وجوود دیرێدو ئه‌وان له‌ى باوه‌ته‌و ته‌بلیغ نه‌كریانه‌. ئى رادیۆ یه‌كه‌مین رادیۆیگه‌ له‌تاریخ عراق ك وه‌شیوه‌زووان فه‌یلیانه‌ به‌رنامه‌یلى په‌خش ئه‌كاو له‌هه‌مان وه‌خت وه‌هه‌ردوگ زووان كوردى و عه‌ره‌بى و شیوه‌وزووان كوردى سۆرانییش  به‌رنامه‌و باوه‌ته‌یل سیاسى و كوومه‌ڵایه‌تى و رووشنهویرى ره‌سنێده‌ مه‌ردم، وه‌لى داخ گرانیگم ئه‌وه‌سه‌ خه‌ریكه‌ جوانه‌مه‌رگى كه‌ن و هه‌ڕه‌شه‌ى لاوردنى كریا.

 

جه‌ماڵ ئه‌ركه‌وزاى