خاڵ وه‌رچه‌رخان ئه‌وه‌سه‌ خوه‌مان دروسى بكه‌یم

شفق نيوز

خه‌بات و شووڕشه‌یل فره‌یگیش ئه‌نجام داگه‌ له‌وه‌ر خاتر ئازادى و سه‌روه‌خوه‌یى، ئنجا راسه‌ راپه‌ڕین ده‌روازه‌ى خاسیگ بوى ئه‌را ئاشنابوین ملله‌ت كورد وه‌دونیاى ده‌یشت و بویه‌ هووكار زنگه‌وبوین كیشه‌ى كوردو دامه‌زرانن ده‌سڵاتیگ سیاسى و ئدارى و گرنگیداین وه‌ مه‌سه‌له‌ى ره‌واى كورد له‌لایه‌ن ده‌وڵه‌ته‌یل دونیاو راسه‌ كورد له‌ساى ئه‌و راپه‌ڕینه‌ له‌ قوناغیگه‌وه‌ چیه‌ قوناغیگ تر و له‌هه‌رێمیگ ژیه‌ن له‌ژیر سایه‌ى په‌رله‌مان و حكوومه‌ت له‌چوارچیوه‌ى عراق و خوه‌یان كاروبار خوه‌یان به‌نه‌ ڕییه‌و، وه‌لى یه‌یش ماناى ئه‌وه‌ نیه‌ ك خه‌وه‌یل و ئاره‌زوو كورد وه‌ته‌واوى هاته‌سه‌دى و غافڵ بوون له‌خه‌بات.

كورد ئه‌گه‌ر خوه‌ى هه‌وڵ نه‌یه‌یگ  و له‌بان ئاست ناوخوه‌یى و ده‌ره‌كى دووس و لایه‌نگر ئه‌را مه‌سه‌له‌ى كورد په‌یا نه‌كه‌ن و گه‌شه‌ نه‌دریه‌یگه‌ په‌یوه‌ندیه‌یل دبلۆماسى و له‌گشت ئه‌یانه‌یش گرنگتر ئه‌گه‌ر له‌ناوخود وڵاتیش یه‌كگرتن و په‌یوه‌ندى بته‌ویگ دویر له‌جیاجیایى و حزبایه‌تى سه‌قامگیر نه‌ودو گشت حزبه‌یل ناوخوه‌یى وه‌ باوه‌ڕ ته‌واویگه‌و نه‌نوڕنه‌ به‌رژه‌وه‌ندى گشتى ملله‌ت كورد، ئه‌وه‌ بیگومان مه‌سه‌له‌ى كورد ته‌كان خاسیگ نیه‌یگ وه‌ره‌و دونیاى وه‌رچه‌رخان.

راس ملله‌ت كورد بى وچان شووڕش كردگه‌و خه‌بات چه‌كدارى داشتگه‌و هه‌میشه‌ سه‌نگه‌ر له‌دوشمن گردگه‌، تاڕاده‌یگ ئى جموجویله‌ وه‌ل وه‌خته‌یل خوه‌یا ده‌ور داشتگه‌و داگیركه‌ر وه‌پى هاوریاسه‌ له‌رزه‌و هه‌وڵیگ بویه‌ ئه‌را سه‌ركه‌فتن كیشه‌ى كوردو ئاینده‌ى گه‌شیگ ، وه‌لى ئه‌گه‌ر بایمنه‌ پاى راسى مه‌سه‌له‌ى راپه‌ڕین هه‌لیگ بوى هه‌ڵكه‌فت ئه‌ڕا گشت ملله‌ته‌یل عراق جویر یه‌ك له‌باشوورى تا باكوورى و ئه‌وه‌ بوى وه‌هار ساڵ 1991 له‌و هه‌له‌ كوردیش جویر باقى مه‌ردمه‌یل تر عراق ده‌سكرده‌ راپه‌ڕین ، چوینكه‌ ده‌سڵات رژیم دكتاتۆر وه‌ته‌واوى كز بوى له‌ئه‌نجام ده‌خاڵه‌تكردن و ده‌سوه‌شانن ئه‌مریكا له‌ دام و ده‌زگایه‌یل سه‌ربازى و ئاسایش و سوپا وه‌گشتى. ئنجا مه‌ردم باشوور و ناوڕاس عراق له‌وه‌ر ئه‌وه‌ك حكوومه‌ت به‌عس زاڵ بوى له‌ناوچه‌گه‌ تواناى وه‌رگیرى خاسیگ نه‌یاشتن و سه‌ره‌تا شكه‌ست خواردن ك هه‌رچه‌نى شوونه‌یلیگیش كه‌فته‌ ژیر كۆنترۆڵ راپه‌ڕینكاره‌یل، وه‌لى هیز دوشمن قایمتر بوى له‌ڕوى چه‌ك و ته‌قه‌مه‌نى. ئنجا له‌ناوچه‌یل كوردستان رژیم به‌عس وه‌رجه‌ گشت چشتیگ ئاماده‌ى خوه‌ى كردویگ ئه‌را هه‌یواین و چوڵكردن ئه‌و ناوچه‌یله‌ له‌هه‌ر رویداگیگ  پیشبینى كریاگ. دى ئه‌وه‌ بوى خوه‌شبه‌ختانه‌ كورد له‌و هه‌له‌ ك له‌ساى هیز هاوپه‌یمانه‌یل هاته‌دى نه‌ف وه‌رگرت و نیمچه‌ وه‌رچه‌رخانیگ بویه‌ قسمه‌تى و نه‌ته‌وه‌یل یه‌كگرتگ له‌وه‌ر خاتر پشتگیرى له‌هه‌ق ملله‌ته‌یل عراق بڕیار شماره‌ 688 له‌ 5 نیسان 1991 ده‌ركردو ئه‌را یه‌كه‌مجار له‌تاریخ كورد ره‌سانه‌ ئه‌و حاڵه‌ته‌و دویاى ئه‌وه‌یش خه‌ت 36 دانریا دژ وه‌باڵه‌وداین ته‌یاره‌یل حكوومه‌ت له‌بان ناوچه‌یل كورد و شیعه‌، ك له‌یرایش كورد ده‌سكه‌فتیگ تر په‌یا كرد له‌وه‌ر ریكخستن و خودئاماده‌كردن. وه‌ هه‌ر حاڵ ئیمه‌ نیه‌تویه‌نیم بویشیم ئه‌وه‌ك رویدا ده‌سكه‌فت نه‌وى، چوینكه‌ وه‌هاوكار و ئه‌مریكاو هیزه‌یل هاوپه‌یمان ئه‌و جموجویله‌ په‌یا بوى و كورد له‌نوو هاته‌ مه‌یدان و داگیركه‌ر له‌باشوور كوردستان ڕاونا. وه‌لى ئه‌و وه‌رچه‌رخانه‌ ك ئیمه‌ ئه‌ڕاى گه‌ردیم و خه‌و وه‌پیه‌و دوینیم ئه‌وه‌سه‌ ك وه‌ده‌س خوه‌مان دروسى بكه‌یم و سه‌ره‌تا له‌ناوخود خوه‌مان ده‌س وه‌پى بكه‌یم. ئیمه‌ى كورد تا حزبه‌یلمان وه‌دڵ وگیان یه‌كه‌و نه‌گرن و قسه‌یان جفت نه‌كه‌ن و هه‌وڵ هاوبه‌ش نه‌یه‌ن و به‌رژه‌وه‌ندى خوه‌یان نه‌خه‌نه‌ كنارو به‌ره‌وه‌ندى باڵاى ملله‌ت كورد له‌وه‌رچه‌و نه‌گرن، مه‌حاڵه‌ وه‌رچه‌رخان خاس و پڕ ئاره‌زوویگ بایگه‌ دى، مه‌گه‌ر هه‌ر خه‌و بوینیم وه‌  ده‌وڵه‌ت سه‌روه‌خوه‌یى كوردى، وه‌لى ئه‌گه‌ر دڵ له‌بان دڵ بجویلیه‌یم و هه‌وڵ پڕ وژدانیگ بیه‌یم و دبلۆماسیه‌ت خاسیگ له‌لى بكه‌فیگه‌و، ئه‌وه‌ هویچ گومانیگ له‌تى نیه‌ ك وه‌رچه‌رخان جوان و ئاینده‌ى رووشنیگ چه‌وه‌ڕى ملله‌ت كورد ئه‌كا.

 

عه‌لى چه‌وجوان