ره‌سانن له‌ناونى وه‌رپرسیارێتى كوومه‌ڵایه‌تى و ئازادى

شفق نيوز

 

هاووڵاتیه‌یلیش له‌چوارچیوه‌ى بنه‌مایه‌یل وه‌رپرسیارێتى كوومه‌ڵایه‌تى هه‌ق ئه‌وه‌ له‌لاى میدیا دیرن ك له‌ زه‌مینه‌ى ئه‌و ئازادیه‌ ك ئه‌را ده‌زگایه‌یل ره‌سانن فه‌راهه‌م بویه‌و كار له‌تى كه‌ن له‌ڕوى كوومه‌ڵایه‌تیه‌وه‌ ئه‌ركه‌یلیان كه‌فیده‌ بانى و بایه‌سه‌ پابه‌ند بوون وه‌ ئه‌وه‌ك له‌وه‌خت كاركردن ئه‌را وه‌دیهاوردن ئامانجه‌یل پیشه‌یى خوه‌یان نه‌ونه‌ مایه‌ى زه‌ره‌دڕه‌سانن ماددى و چشته‌یل تر.

 

هه‌ڵبه‌ته‌ دید جیاجیا هه‌س ئه‌را دیاریكردن چه‌مك وه‌رپرسیارێتى كوومه‌ڵایه‌تى، ئنجا كه‌سه‌یلیگ هه‌ن ره‌سانن وه‌ پیشه‌یگ دانه‌ن و راسه‌وخۆ په‌یوه‌سى كه‌نه‌ بازاڕه‌و، یه‌یش وه‌و مانا ك ره‌سانن وه‌سیله‌یگه‌ ئه‌را فرووشتن زانیارى له‌وه‌رانوه‌ر ئه‌و داهاته‌ ك كه‌فیده‌ ده‌سى، دى نوڕید ئه‌یانه‌ گشت سیستمه‌گه‌ له‌ پیشه‌یگ كوڵه‌و كه‌ن ئه‌را بازاڕگه‌رمى و په‌یاكردن پویل، ك وه‌ى بوونه‌یشه‌و تا ئه‌و راده‌ ئازادى وه‌خوه‌یان ره‌وا دوینن ك بڵاوكردنه‌وه‌ى باوه‌ت و ئاگاداركردنه‌وه‌ خاسترین كاڵاس ئه‌را فرووشتن و په‌یاكردن داهات، هه‌ر له‌وه‌ر ئه‌وه‌یش دوینید له‌بان ئى بنه‌ما كار كه‌ن و په‌یمانه‌سازى پیشه‌یى له‌لاى ئى جووره‌ كه‌سه‌یله‌ ئه‌را گشت مه‌سه‌له‌یگ چ كوومه‌ڵایه‌تى یا سیاسى و ته‌نانه‌ت هونه‌رى و كلتوورییش ته‌نیا ئه‌وه‌سه‌ ك چه‌نیگ بازاڕى گه‌رمه‌.

 

نووڕستنیگ تر هه‌س ك ره‌سانن جوور دامه‌زریاگیگ  كوومه‌ڵایه‌تى فراوانتر دوینید، یه‌یش وه‌ ئه‌وه‌ك ره‌سانن جیوازكه‌ر زانیاریه‌و ئه‌كه‌یلیگ په‌روه‌رده‌یى و گه‌شه‌وه‌پیداین و ره‌ساننكار كلتوورى و سیاسى و خوه‌شگوزه‌رى دیرید و هه‌ر له‌وه‌ر ئه‌وه‌یش له‌بان بنه‌ماو په‌یمانه‌سازى هه‌ر یه‌كیگ له‌یانه‌ وه‌رپرسیارێتى كوومه‌ڵایه‌تى كه‌فیده‌ بانى.

 

ره‌سانن سیستمیگه‌ له‌ناو كوومه‌ڵگایگ دیاریكریاگ و له‌ ماوه‌یگ دیاریكریاگیش كاره‌یلى ئه‌نجام ده‌ید، ئنجا له‌ى رویه‌و ره‌سانن ئه‌ركه‌یلیگ گرینگ له‌ گشت كاره‌یل كوومه‌ڵایه‌تى و سیاسى و كلتوورى نیشان ده‌یدو نه‌خش هاوكارى و ته‌واوكاریه‌یلى هویچ كه‌متر نیه‌ له‌ پیكهاته‌و دامه‌زریاگه‌یل تر كوومه‌ڵایه‌تى ئه‌را مقه‌یه‌تیكردن گونجیان و ئاشتیانه‌ى كوومه‌ڵگا.

 

له‌بان بنه‌ماى ئى ئه‌رك و بنه‌ماى وه‌رپرسیارێتى كوومه‌ڵایه‌تییشه‌، دامه‌زرانن و ریكخستن ره‌سانن بایه‌سه‌ وه‌ جووریگ نه‌خش خوه‌ى نیشان بیه‌ید ك گرینگ بوود ئه‌را ئیسه‌ى كوردستان و كیشه‌گه‌ى. ئنجا ئه‌رك ریكخستن ره‌ساننیش وه‌رجه‌ هه‌ر لایه‌ن و دامه‌زریاگیگ كوومه‌ڵایه‌تى كه‌فیده‌ مل خود میدیاكاره‌یل، چوینكه‌ ئه‌وان ك وه‌رپرسیارێتى پیشه‌گه‌و چه‌سپانن ئازادى ها بانیان وه‌هه‌مان راده‌یش وه‌رپرسیارێتى كوومه‌ڵایه‌تییش كه‌فیده‌ بانیان له‌وه‌رانوه‌ر كوومه‌ڵگاگه‌یان، هه‌ر له‌وه‌ر ئه‌وه‌یش بایه‌سه‌ له‌لایگه‌و  ئازادى ره‌سانن بچه‌سپنن جوور مه‌سه‌له‌یگ خواست و ره‌سه‌ن، له‌لایگ تریشه‌و بایه‌سه‌ شوونیگ خاس و گونجیاگ ئه‌را ئى ئازادیه‌ له‌ناو وه‌رپرسیارێتى كوومه‌ڵایه‌تى دیارى بكه‌ن.

 

ئازاد حه‌سیب قه‌ره‌داغى

ج . أ