حكوومه‌ت یا ره‌سانن كى شه‌فافتره‌؟

شفق نيوز

ونه‌ریته‌یل كویه‌ن كومه‌ڵایه‌تى كومه‌ڵگا. ئاڵشتبوین له‌ جنگ و خوه‌راك و سیمایه‌یل شارو ئاوایى، بیجگه‌ ئه‌وه‌یش گه‌شت و تیكڵایى زیاتر كومه‌ڵایه‌تى و سیاسه‌ له‌ بانه‌و وه‌ره‌و خوار ده‌س وه‌پیكردگه‌.

یه‌كیگ له‌ نیشانه‌یل سیاسه‌ت تازه‌و قوناغ تازه‌ له‌كوردستان، له‌هاوڕا نه‌وین خاس مه‌ردم وه‌ل حزبه‌یل سیاسى و كه‌مه‌وبوین كاریگه‌رى ئایدۆلۆژیه‌یل و كه‌مه‌وبوین ناجیگیرى له‌وه‌فادارى و به‌شدار نه‌وین كوورانه‌ له‌مه‌سه‌له‌ى سیاسى و بیباوه‌ڕى و خود نه‌وه‌سانن وه‌ دیدو ئه‌ڕاى چوینه‌یل، خوه‌ى دوینێده‌و.

وه‌ل ئه‌وه‌یشا تویه‌نیم له‌ناو حزبه‌یلیش قه‌یریگ شوونپاى جیوازكریاگ سیاسه‌ت له‌ شیواز كویه‌نه‌و بكه‌یمنه‌ نیشان وه‌ره‌و تازه‌بوین. ئنجا له‌یرا مه‌به‌سمان ده‌س وه‌پیكردن سه‌ره‌تاى پرووسه‌ى ئارام و یه‌واشه‌ وه‌ره‌و ئاڵشتبوین متمانه‌دارى كومه‌ڵگاو به‌رژه‌وه‌ندى زیاتر كه‌سى و هاوبه‌شى و هاوكارى تازه‌.

راسه‌ ك حكوومه‌ت كوردى وه‌تایبه‌ت له‌و چوار په‌نج ساڵ گوزه‌یشته‌ له‌پلان و به‌رنامه‌و ستراتیجیه‌یل فه‌رهه‌نگى و سیاسى ریخوه‌شكه‌ر و هانده‌ر به‌شیگ سه‌ره‌كى بویه‌ له‌و پیشكه‌فتن و گوزرانه‌، وه‌لى له‌هه‌مان وه‌ختیش حكوومه‌ت خاوه‌ن سستم و میكانیزم له‌یوایگ نه‌ویه‌ وه‌تایبه‌ت له‌ڕوى هاوكاریكردن به‌رنامه‌و سیاسه‌ته‌یلى وه‌ل گشت به‌شه‌یل ره‌سانن یا ئعلام له‌كوردستان.

به‌رنامه‌یل حكوومه‌ت وه‌قه‌یریگ لایه‌ن تایبه‌ته‌و خه‌ریكه‌و نه‌چیه‌سه‌ ناو گشت مه‌یدانه‌یل ره‌سانن و رووشنهویرى و ره‌سینه‌وه‌ى چینه‌یل تویش سه‌ختى و ناسه‌قامگیرى كردگه‌، وه‌تایبه‌ت له‌باوه‌ت جموجویل ژنه‌یل به‌رنامه‌یل حكوومه‌ت نه‌تویه‌نستگه‌وه‌شیوه‌ى خاسیگ هاوسه‌نگى و باڵانسیگ له‌ كومه‌ڵگا دروس بكاو پیاوه‌یل حالى نه‌كریانه‌ له‌ هه‌قه‌یل ژن له‌ كومه‌ڵگایگ دیموكراس و مۆدێرن. ئنجا بڕیگ له‌ چالاكوانه‌یل مه‌یدان ژن ك زوورمیان له‌ده‌یشت وڵات بوینه‌ هاتنه‌سه‌وه‌و تاڕاده‌ى فره‌یگ له‌ژیر كاریگه‌رى جموجویل فیمینیزم پۆست مۆدێرن ئۆرپا بوین و فره‌ وه‌گه‌رمى و حه‌ماسه‌ته‌و تیكه‌ڵ ئى جموجویله‌ بوینه‌و ستێرن جموجویله‌گه‌ گرتنه‌سه‌ ده‌س، ك پلان و ستراتیجیه‌ت ئى جموجویله‌ نه‌ك هه‌ر له‌قوناغ هوشیارى و خواست یه‌كسانى خانمه‌یله‌و نه‌وسانگه‌، به‌ڵكوو په‌ره‌ دانه‌سه‌ شیه‌وكردن و سیاسه‌ت و داواكاریه‌یلیانیش تا ناو غورفه‌ى خه‌فتنیان.

هه‌وڵه‌یل حكوومه‌ت وه‌بى هاوكارى گشت لایه‌نه‌یل ره‌سانن له‌لایگ و خه‌ریكبوین ئه‌و به‌شه‌گه‌ى تر له‌ره‌سانن ك خوه‌ى وه‌ سه‌روه‌خوه‌ى زانێد، ئى چشته‌ هووكار بویه‌ ك به‌رنامه‌و پلانه‌یل حكوومه‌ت وه‌خاسى و رووشنى نه‌ڕه‌سنه‌ ئه‌و ئه‌نجامه‌ ك ئه‌و به‌شه‌ له‌ره‌سانن له‌یرا ركابه‌رى حكوومه‌ت كه‌ن. له‌یرا ناشه‌فافى حكوومه‌ت ك مه‌رجیگ سه‌ره‌كى ده‌سڵاتیگ مۆدێرنه‌ له‌ ناشه‌فافى خود ره‌سانن كوردى سه‌رچه‌وه‌ گرێد ك پلانیگ نه‌ته‌وه‌یى و یه‌كگرتگ له‌مه‌یدان فه‌رهه‌نگى و فكریه‌و نه‌یاشتگه‌.

 

به‌در ئسماعیل شیرۆكى