گفتگوو

شفق نيوز

یه‌كتر له‌ جیاى دگان وه‌پیناین و قه‌بولكردن یه‌كتر بویاتاد، ئه‌وه‌ بیگومان خوین و قوربانى و كوشتار بویاده‌ زووان سه‌رده‌م.

ئه‌و ملله‌ت و نه‌ته‌وه‌یله‌ ك ریشگ قویل دیرن له‌ناو كلتووریگ واز و داڵوه‌خشى، هه‌میشه‌ زووان گفتگوو و یه‌كتر قه‌بولكردنیان له‌و ملله‌ته‌یله‌ باڵاده‌ستره‌ ك رووشنهویرى و كلتووریان سه‌رچه‌وه‌گه‌ى تون وتیژى و تویڕه‌یى و تونڕه‌ویه‌.

هووكار تویڕه‌یى و تون وتیژى له‌ گفتگوو ملله‌ته‌یل خوه‌رهه‌ڵات ناوین ك ئیمه‌یش به‌شیگیم له‌لى، پرسیار فریه‌یگ ها بانى، ئنجا ئه‌گه‌ر وه‌و مه‌هانه‌ ك ناوچه‌گه‌ وه‌ دریژایى تاریخ خوه‌ى شانۆ جه‌نگ و كوشتار خویناوى بویه‌و ئه‌گه‌ر ئۆرپایش له‌ سه‌ده‌یل ناوڕاسه‌و تا سه‌ره‌تایه‌یل سه‌ده‌ى 20 وه‌ملیۆنه‌ها كه‌س له‌ یه‌كترى كوشتنه‌، ئه‌ى ئه‌راچه‌ ئه‌وان ئیسه‌ خاوه‌ن گفتگوو شارستانى راسكانیین.

له‌ڕاسى كوومه‌ڵگاى ئیمه‌ قوربانى فریه‌ گه‌وراى نه‌وین گگفتگوو ئارام و ئاقڵانه‌و گووشگرتن هوشیارانه‌س. ئه‌و تون وتیژیه‌ ك په‌لكیش كه‌ش گفتگوو بویه‌، بڕیگ هووكار ها له‌پشتى جوور هه‌ركه‌س و لایه‌نیگ خوه‌ى وه‌ راس زانیدو وه‌رانوه‌ره‌گه‌ى وه‌ غه‌ڵه‌ت.

زووان گفتگوو وه‌ ئه‌وه‌ تیه‌یده‌ به‌رهه‌م ك گشتمان گووش له‌ یه‌كترى بگریم و گشتمان ئه‌گه‌ر باوه‌ته‌گه‌ ئامام خاس داشت، بكه‌یمنه‌ى بنه‌ماى كار وه‌ره‌ونوابردن كوومه‌ڵگاگه‌مان. شایه‌ت هووكاریگ تریش ئه‌وه‌ بوود ك هیمان گشتمان قه‌ناعه‌ت وه‌ ئه‌وه‌ ناوردیمنه‌ ك كوردستان كه‌شتیه‌ گه‌وراگه‌س، ئه‌گه‌ر كلتوور گفتگوو شارستانیه‌ت ملله‌ت هاوسا كاریگه‌رى داشتوود له‌بان نه‌ته‌وه‌یل، ئه‌وه‌ له‌لاى ئیمه‌ ئه‌ویش مایه‌ى دقه‌تكردنه‌، ئه‌را نموونه‌: هه‌رێم كوردستان ك هاومه‌رزه‌ وه‌ل وڵاتیگ شارستانى گه‌وراى جوور ئیران، وه‌لى دوینید له‌ڕوى ئه‌ڕاى چوین و هویر وڕا جیاوازه‌.

ئیمه‌ وه‌پیمان له‌یواسه‌ ك گرینگترین هووكار به‌رهه‌مهاوردن كلتوور شارستانى و مه‌ده‌نى، په‌ره‌وه‌پیداین و گرینگى وه‌پیداین خوه‌ندنه‌وه‌ى كتاوه‌، ك جى داخه‌ دوینید له‌ كوردستان خوه‌مان كه‌مترین چشتیگ ك وه‌كار تیه‌ریه‌ید كتاوه‌یل خود رووشنهویركردنه‌.

وه‌ل ئه‌وه‌یشا ئیسه‌یش كریه‌ید ك له‌قوناغه‌یل سه‌ره‌تایى خوه‌ندنگایه‌یله‌و نه‌وه‌ له‌شوون نه‌وه‌ له‌بان نه‌ف و قانجاز خوه‌ندنه‌وه‌ یا موتاڵعه‌ هووكاره‌ بكریه‌ن و كاریگ بكریه‌ید ك شماره‌ى خوه‌نیاره‌یل كتاو له‌ كوردستان ئه‌وه‌نه‌ى شماره‌ى گووشت و پڵاوخوه‌ره‌یل رووژه‌یل جومعه‌ له‌لى باید.

شاخه‌وان عومه‌ر سلێمان

ج . أ