تاكه‌ى مێرده‌زماى ڕه‌گه‌زنامه‌ هاوه‌شوونمانه‌و؟

شفق نيوز

گیروگرفت وه‌رگردن ڕه‌گه‌زنامه‌ هاتنه‌، چوینكه‌ وڵاته‌یل ئۆروپى وه‌ ئیرانى شماره‌یان كه‌ن، كورده‌یل فه‌یلییش هویچ به‌ڵگه‌نامه‌یگ نه‌یرن ك عیراقى بوینیان ئسپات بكه‌ید، چوینكه‌ ڕژیم وه‌رین، وه‌ختى ته‌سفیریان كرد ڕه‌گه‌زنامه‌گه‌یان زه‌فت كرد، و ئى كێشه‌ هیمان هاوه‌شوونیانه‌و له‌ هه‌ر  شوون و ماوایگ.بگه‌ردن... ئه‌را ئه‌وه‌گ زیاتر له‌ى كێشه‌ بڕه‌سیمنه‌و ، په‌یوه‌ندى كردیمنه‌ دكتۆر مه‌جید جه‌عفه‌ر ك یه‌كیگه‌ له‌و كورده‌یل فه‌یلیه‌ ك وه‌ره‌و وڵات سوید كووچكردیه‌ و ئه‌را ماڵپه‌ڕ شه‌فه‌ق وه‌ى جووره‌ باس كرد و وت:" ده‌سڵات له‌ وڵاته‌یل یه‌كێتى ئۆروپا وه‌ختى مه‌سه‌له‌ى په‌نابردن و نیشته‌جابوین و وه‌رگردن ڕه‌گه‌زنامه‌ ده‌یده‌ یه‌كا، چه‌ن بڕگه‌یگ قانوونى دیرید ك له‌ى باوه‌ته‌ پابه‌ندن وه‌پى و له‌لیانیش له‌یه‌كه‌وداین زووان یا شیوه‌زووان ئه‌و په‌نابه‌ره‌ و له‌ى باوه‌ته‌ كه‌سه‌یل پسپۆر و تایبه‌تمه‌ند دیرن".

زیاتریش وت :" بڕیگ له‌ خێزانه‌یل كورد فه‌یلى ك ئه‌را ئیران ته‌سفیركریان و نزیكه‌ چاره‌كه‌ سه‌ده‌یگ له‌ورا مه‌نن، بڕیگ وشه‌ى و ئیدیۆم فارسى هاته‌ ناو زووانه‌گه‌یان، له‌وه‌ر ئه‌وه‌ و، چوینكه‌ به‌ڵگه‌نامه‌ى عیراقییش نه‌یاشتن، له‌ ئان هاتنیان ئه‌را وڵاته‌یل ئۆروپا، جوور كورد ئیرانى شماره‌یان كه‌ن و وه‌ كورد فه‌یلى عیراقى ته‌سفیركریاى ئه‌را ئیران شماره‌یان نیه‌كه‌ن".

له‌باوه‌ت نه‌خش و ده‌ور باڵیۆزخانه‌ یا سه‌فاره‌ته‌یل عیراق له‌ وڵاته‌یل ئۆروپا و ئه‌گه‌ر كاریگ كردنه‌ ئه‌را چه‌سپانن عیراقى بوین ئى كورده‌یل فه‌یلیه‌، مه‌جید جه‌عفه‌ر ئویشى:"سه‌فاره‌ته‌ عیراقیه‌گان ئه‌وه‌ كردنه‌سه‌ مه‌هانه‌ ك نیه‌تویه‌نن عیراقى بوین ئه‌و كورده‌یل فه‌یلیه‌ بچه‌سپنن ك ئه‌را ئیران ته‌سفیركریانه‌ و هاتنه‌سه‌را ئۆروپا، چوینكه‌هویچ به‌ڵگه‌نامه‌یگ نه‌یرن ئى ڕاسیه‌ بچه‌سپنى ك عیراقیین، خوه‌یانیش خاس زانن ك كورده‌یل فه‌یلى وه‌رجله‌ ته‌سفیركردنیان هه‌رچى ڕه‌گه‌زنامه‌ و به‌ڵگه‌نامه‌ى عیراقى بوین داشتن چه‌پاوكریا، ئه‌ى دى ئى جووره‌ به‌ڵگه‌نامه‌یلیگ له‌ كورا بارن؟"

ئاماژه‌یش وه‌وه‌ دا ك :" ئى كێشه‌ ك تویش كورده‌یل فه‌یلى هاتیه‌ له‌ تاراوگه‌ ئه‌گه‌ر نه‌ڕه‌سنه‌ چاره‌سه‌ریگ نزیك ئه‌راى ، ئه‌وه‌ ئه‌را نه‌وه‌یل هاتیمانیش جوور میراتى مینیده‌وه‌".

ئه‌ندازیار عبدالله فه‌یلى ك ئه‌ویش په‌نابه‌ر كورد فه‌یلییگه‌ هووكار ئى كێشه‌ ئه‌را ئه‌وه‌ برده‌وه‌ ك وه‌رج له‌ ته‌سفیركردنیان تویشى هاتن و ئامه‌ژه‌یش وه‌وه‌ دا ك :" ئیران ته‌نیا كارتیگ سه‌وز داپیان ك نیشانه‌یگه‌ ئه‌را مه‌نن وه‌ختى له‌و وڵاته‌".

زیاتریش وت ك :" حكوومه‌ت ئیران فیزاپاسیگ دا ئه‌و كورده‌یل فه‌یلیه‌ ك ئه‌را ئیران ته‌سفیر كریانه‌ و حه‌ز كه‌ن وه‌ره‌و ئۆروپا بچن، و وه‌ى جووره‌ شماره‌ى فره‌یگ له‌ خێزانه‌یل كورد فه‌یلى وه‌ره‌و ئۆروپا كووچكردن".

ئاماژه‌یش وه‌وه‌ دا ك :" ئه‌و كێشه‌ ك بویه‌سه‌ تویش كورده‌یل فه‌یلیه‌و له‌ وڵاته‌یل غه‌ریبى ئه‌وه‌سه‌ ك ئى وڵاته‌یله‌ داواى به‌ڵگه‌نامه‌یل ڕه‌گه‌زنامه‌ له‌لیان كه‌ن ك ئنتمایان ئسپات كه‌ید له‌خاتر وه‌رگردن ڕه‌گه‌زنامه‌ یا جنسیه‌ى ئه‌و وڵاته‌یل ئۆروپیه‌، یانه‌یش ئى جووره‌ به‌ڵگه‌نامه‌یلیگ نه‌یرن".

له‌لاى خوه‌یه‌و به‌رپرس به‌ش كووچكردن خارجى له‌ وه‌زاره‌ت كووچ و كووچ وه‌پیكریایه‌یل، ئه‌حمه‌د ڕه‌حیم له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:" ئیمه‌ كه‌فیمنه‌ شوون كاروبار و بارووه‌زع عیراقیه‌یل كووچبه‌ر له‌ ده‌یشت وڵات، و وه‌گووره‌ى زانیاریه‌گانمان زوورمى كورده‌یل فه‌یلى هانه‌ ئیران".

ئه‌وه‌یشه‌ ئاشكراكرد ك :" لوجنه‌یگ له‌ لایه‌ن وه‌زاره‌ته‌گه‌مان و وه‌زاره‌ت خارجیه‌ و وه‌زاره‌ت داخلیه‌ دامه‌رزیا ك هه‌میشه‌ سه‌رده‌یده‌ وڵاته‌یل یه‌كێتى ئۆروپا  له‌ خاتر ناونویسانن ئه‌و عیراقیه‌یله‌ ك مه‌یل دیرن بانه‌و ئه‌را نیشتمان خوه‌یان و (ره‌عه‌ویه‌ت) خوه‌یان بچه‌سپنن".

زیاتریش وت:"ئه‌گه‌ر له‌وانه‌ بوین ك مه‌یل دیرن بانه‌وه‌، وهویچ به‌ڵگه‌نامه‌یگ نه‌یرن، لوجنه‌گه‌ تاقیكردن و ورده‌وبوین ئه‌نجام ده‌ید ئه‌را دڵنیابوین له‌ عیراقى بوینیان، چ كورد فه‌یلى بوون یا له‌و باقى عیراقیه‌یل".

جه‌ختیش له‌بان ئه‌وه‌ كرد ك :"ئاراسته‌گان حكوومه‌ت عیراق وه‌شیوه‌یگ گشتى و وه‌زاره‌ته‌گه‌مان وه‌شیوه‌یگ تایبه‌ت ها وه‌ل به‌رنامه‌ى هاتنه‌وه‌ى خودموختارانه‌ و ئاره‌زوومه‌ندانه‌، لوجنه‌گه‌یش ده‌سڵات ئه‌وه‌ نه‌یرى ك بویشى ئى كورده‌یل فه‌یلیه‌ عیراقیین یا نه‌، له‌هه‌مان وه‌ختیش داوا له‌و حكوومه‌ته‌یله‌ كه‌ید ك یانه‌ هانه‌ وڵاته‌گانیان هه‌ق په‌نابه‌رى به‌نه‌پیان و ناونویسیان بكه‌ن".

له‌باوه‌ت مه‌سه‌له‌ى ئه‌و كورده‌یل فه‌یلیه‌ ك كووچكردنه‌ و توان هاتنه‌وه‌یان ئه‌را عیراق جارى دویابخه‌ن و حه‌زكه‌ن به‌ڵگه‌نامه‌یل چه‌سپانن عیراقى بوینیان گیر بارن ئه‌حمه‌د ڕه‌حیم ئویشى:" چاره‌سه‌ر ئى مه‌سه‌له‌ ئه‌وه‌سه‌ ك ئى خێزانه‌یله‌ ك تویش مه‌ینه‌تى هاتن له‌و وڵاته‌یله‌ ك كووچ ئه‌راى كردنه‌، داواكارى پیشكه‌ش وه‌ وه‌زاره‌ت كووچكردن و كووچوه‌پیكریایه‌یل بكه‌ن له‌ ڕیگه‌ى ماڵپه‌ڕ ئه‌لیكترۆنى وه‌زاره‌ته‌گه‌ وله‌تى شماره‌یان و شوونه‌یل نیشته‌جابوینیان له‌و وڵاته‌یله‌ تۆمار بكه‌ن، و ئه‌رك سه‌رشان وه‌زاره‌ته‌گه‌س ك چاره‌سه‌ر گونجیاییگ ئه‌رایان په‌یا بكه‌ید".