كورده‌يل‌ جه‌له‌ولا و سه‌عديه‌ داواكه‌ن له‌وه‌ر‌اوه‌ر تيرۆريسته‌يل له‌ليان مقه‌يه‌تی بكريه‌ێ

شفق نيوز

ترسانن هاووڵاتيه‌يل و شيوانن وه‌زع بڕيگ له‌ ناوچه‌يليگ ناكووكی هاله‌بانيان، وه‌گوره‌ی قسيه‌ی وه‌رپرسه‌يل كورد خێزانه‌يل كورد فره‌يگ وه‌خاتر هه‌ڕه‌شه‌ی گرووپه‌يل تيرۆريستی و چه‌وديری نه‌كردن ئه‌من له‌لايه‌ن هێزه‌يل سه‌ربازی جيگر له‌‌ دو ناوچه‌ی جه‌له‌ولا و سه‌عديه‌ ديرن له‌و شاره‌يله‌ كووچ كه‌ن.

يه‌يش له‌وه‌ختيگه‌ قايم مه‌قام خانه‌قين له‌ حكوومه‌ت ناوه‌ندی داواكردگه‌ وه‌شيوه‌ی دادوه‌رانه‌ و يه‌كسانيگ و دوير له‌ هوير نه‌ته‌وايه‌تی و ئاينی وه‌ل گشت عيراقيه‌يل ره‌فتار بكه‌ی.

محه‌مه‌د مه‌لا حه‌سه‌ن له‌ ته‌سريحيگ ئه‌را شه‌فه‌ق وت: وه‌خاتر شيويان وه‌زع ناوچه‌يل جه‌له‌ولا و سه‌عديه‌ خێزانه‌يل كورد فره‌يگ وه‌ره‌و هه‌رێم كوردستان كووچ كردنه‌ و حكوومه‌ته‌يل و ئه‌نجوومه‌نه‌يل مه‌حه‌لی له‌ گرنگی نه‌داين حكوومه‌ت و په‌رله‌مان به‌غدا وه‌ ئه‌ی ناوچه‌يله‌ ره‌نج به‌ن.

ملا حه‌سه‌ن له‌دريژه‌ی قسيه‌يله‌گه‌ی ئشاره‌ت كرده‌ شيويان وه‌زع ئه‌منی له‌ ناوچه‌يليگ ناكووكی هاله‌بانيان و وه‌ت: فيشتر خێزانه‌يل كورد تا ئيسه‌ له‌ نه‌بوين ئه‌من و خه‌ته‌ر لايه‌نه‌يل تيروريستی چه‌كدار ره‌نج به‌ن و ئه‌ی پرسياره‌ كرد: ئيمه‌ نيه‌زانيم چ لايه‌نيگ وه‌رپرس چه‌وديری له‌ ئه‌من ناوچه‌يلمانه‌ ئايا له‌شكه‌ر عيراقيه‌ يا هێزه‌يل ئه‌مريكی يا پيشمه‌رگه‌؟

ناوبرياگ هه‌ميش ئاشكرا كرد وه‌ختيگ له‌ حكوومه‌ت ناوه‌ندی داواكه‌يم خزمه‌تگوزاريه‌يليگ پيشكه‌شمان بكه‌ی و له‌ ئه‌من ناوچه‌يلمان چه‌وديری بكه‌ی وه‌رپرسياريه‌تی ئه‌ی كاره‌ خه‌يگه‌ مل حكوومه‌ت هه‌رێم كوردستان، و حكوومت كوردستانيش وه‌خاتر پابه‌ند نه‌بوين بڕيگ له‌لايه‌نه‌يل وه‌ به‌ند يا فه‌قه‌ره‌يل ماده‌ی 140 ده‌ستوور نيه‌تويه‌نيگ كاريگ بكه‌ی.

هه‌ر له‌ی باوه‌ته‌ سه‌رۆك يه‌كيگ له‌ عه‌شيره‌ته‌يل كورد له‌ جه‌له‌ولا ئشاره‌ت كرده‌ كيشه‌ی خێزانه‌يل كورد ئه‌را گله‌وداين ماڵ و موڵكيگ له‌وه‌خت ده‌سه‌ڵات ديكتاتوری به‌عس له‌ليان برياس و له‌لايه‌ن وه‌رپرسه‌يل ئه‌و ده‌سه‌ڵات تاوانباره‌ فره‌تيانه‌سه‌ كه‌سيليگتر. جه‌لال باڵانی ئه‌را شه‌فه‌ق وه‌ت: كيشه‌يل موڵكداری زه‌وی و ماڵ تا ئيسه‌ له‌ناونی عه‌ره‌ب و كورد يه‌كلاوه‌ نه‌كرياس و ده‌سه‌ی كيشمه‌كيشه‌يل موڵكداری له‌ خانه‌قين نه‌تويه‌نستگه‌ شكايه‌ته‌يل فره‌يگ يه‌كلاوه‌ بكه‌ی وه‌يخاتره‌ گرووپه‌يل چه‌كدار تويه‌نستن ئه‌ی ده‌رفه‌ته‌ وه‌ده‌س بارن ك خێزانه‌يل ئه‌ی ناوچه‌يله‌ بترسنن و ناچاريان بكه‌ن وه‌ره‌و هه‌رێم كوردستان په‌نا بوه‌ن.

له‌لايگتره‌و كوتله‌ی هاوپه‌يمانی كوردستان له‌ ئه‌نجوومه‌ن پارێزگای دياله‌ له‌ حكوومه‌ت ناوه‌ندی و سه‌ركرده‌يل كورد داواكرد له‌ سه‌دان خێزان كورد ك له‌ناوچه‌يليگ ناكووكی هاله‌بانيان ئاواره‌ بوينه‌ پشتگيری بكه‌ن و جه‌خت كرد ئه‌و ده‌سدريژيه‌ ك له‌ دژ خێزانه‌يل كورد جه‌له‌ولا و سه‌عديه‌ ئه‌نجام گريگ سياسيه‌ و ته‌نيا ئامانجی ئاڵشته‌وكردن سرووشت ديموگرافيه‌.

هه‌ر له‌ی باره‌وه‌ دلێر حه‌سه‌ن ئه‌ندام كوتله‌ی هاوپه‌يمانی كوردستان له‌ ئه‌نجوومه‌ن پارێزگای دياله‌ ئعلان كرد: سه‌دان خێزان كورد له‌ ساڵ 2008 تائيسه‌ ماڵ و موڵك خوه‌يان له‌ سه‌عديه‌ و جه‌له‌ولا هيشتنه‌سه‌جی و وه‌ت: سه‌قامنه‌گرتن ئه‌منی و ده‌سدريژيه‌يل وه‌رده‌وام له‌ دژ كورد له‌لايه‌ن ڕيكخرياگه‌يل تيروريستی ته‌نيا سه‌به‌ب ئه‌ی كووچ كردنه‌سه‌.

حه‌سه‌ن له‌ حكوومه‌ت ناوه‌ندی داواكرد وه‌ دوسيه‌ی خێزانه‌يل ئاواره‌ له‌ ناوچه‌يليگ ناكووكی هاله‌بانيان گرنگی بدريه‌يگ وه‌تايبه‌ت ك له‌ی وه‌خته‌ فيشتر خێزانه‌يله‌ تويش قه‌يران ئابووری هاتنه‌ و فيشتريان نه‌خريانه‌سه‌ چوارچيوه‌ی ده‌سمه‌يه‌ته‌يل و هه‌قه‌يل داراييگ ئه‌را كووچ و كووچ وه‌پی كرياگه‌يل دياری كريانه‌.

شايان باسه‌ حه‌سه‌ن له‌ مانگ كانوون دويه‌م گوزه‌يشته‌ لايه‌نه‌يل چه‌كدار تيرۆريستی وه‌ يه‌تاوانبار كرد ك وه‌شيوه‌ی رووژانه‌ له‌بان خێزانه‌يل كورد جيگير له‌ سه‌عديه‌ و جه‌له‌ولا ده‌سدريژی كه‌ن و له‌ دو ساڵ گوزه‌يشته‌ فره‌تر له‌ 1400 خێزان خێزان ناچاره‌و بوينه‌ وه‌ره‌و ناوچه‌يل هه‌رێم كوردستان ئاواره‌ بوون.