چ دژایه‌تییگ هه‌س له‌ناونی ئاین و نه‌ته‌وه‌؟

شفق نيوز

كردن خودای گه‌ورا دژایه‌تی یاته‌عاروزیگ وه‌ل نه‌ته‌وه‌ په‌ره‌سی یاوه‌رگری كردن له‌ نه‌ته‌وه‌ دیری . له‌ی باوه‌ته‌ توام كه‌میگ له‌ی باوه‌ته‌ ئه‌رادان قسه‌ بكه‌م تا بڕیگ له‌ راسیه‌یل ئه‌رادان روشنه‌و بووگ . بی گومان مه‌وجیگ ئاین یا باوه‌ڕه‌یل سیاسی تیكه‌ڵ وه‌ئاین و مه‌زه‌و جه‌هان ئسلام گردگه‌سه‌ وه‌ر و ئی ئسلام سیاسیه‌ خوینه‌یل فه‌ره‌یگ وه‌ناو ئاین موقه‌ده‌س ئسلام رژانگه‌و كێشه‌و گرفته‌یل و ره‌نج مه‌ینه‌ته‌یل فه‌ره‌یگ ئه‌را موسه‌ڵمانه‌یل وه‌دی هاوردگه‌ ؛ ئیمه‌یش جوور ملله‌ت كورد و شه‌ریحه‌ی كورد فه‌یلی بی به‌ش و بی ته‌ئسیر نه‌ویمنه‌ له‌ی شه‌پۆل مه‌زه‌بی ئاینیه‌ و چه‌ندین ده‌سه‌و تاقم و رێكخراو وه‌ناو ئاین پیرۆز ئسلام له‌ناو ملله‌ته‌گه‌مان دروس كریاس ك دامه‌زرێنه‌ره‌یل ئه‌و ده‌سه‌و تاقمه‌یله‌ له‌ راسای  به‌رژه‌وه‌ندی خوه‌یان ئه‌حكام ئسلامی ئه‌را مه‌ردم باس كردنه‌ ؛ ئیمه‌ جوور كورد فه‌یلی و په‌یڕه‌و مه‌زه‌ب شیعه‌ وه‌حوكم جوگرافیا‌ی ناوچه‌یلمان ئسلام سیاسی كاریگه‌ری ناسه‌ بان هویر بڕیگ له‌ مه‌ردمه‌گه‌مان و خوه‌شك وبرایه‌یلمان له‌یوا حاڵی كردنه‌ ك ئه‌گه‌ر كه‌سیگ نماز بخوه‌نیگ و رووژگ بگری و وه‌گوره‌ی ئه‌حكام ئسلام ره‌فتار بكه‌یگ نه‌بایه‌د له‌ بوار نه‌ته‌وه‌یی كاربكه‌یگ و ئه‌را ماف خوه‌ی جوور كوردیگ یا له‌ماف نه‌ته‌وه‌گه‌ی جوورنه‌ته‌وه‌ی كورد وه‌رگری بكه‌یگ و ئه‌وه‌سه‌ دوینیمن له‌ هه‌ڵوژاردنه‌یل گوه‌زه‌یشته‌ فه‌ره‌ له‌هاوزوانه‌یلمان له‌به‌غدا ده‌نگ خوه‌یان دانه‌ قایمه‌یل مه‌زه‌بی وكه‌متر ده‌نگیان دانه‌ قایمه‌ی كوردی ؛ وه‌لی له‌ی شه‌ش ساڵه‌ له‌شوین رمیان رژیم به‌عس هاوزوانه‌یلمان ئه‌رایان سابت بویه‌ ك قایمه‌یل مه‌زه‌بی ته‌نیا ئه‌را وه‌ده‌س هاوردن ده‌نگه‌یلیان و كیشانیان وه‌ره‌ولای خوه‌یان له‌ وه‌خت هه‌ڵوژاردنه‌یل وه‌ده‌م وه‌رگری له‌لیان كه‌ن و دویای ئه‌وه‌گ كاریان وه‌پی خه‌ڵاس بوی هویچ كاریگ ئه‌رایان نه‌كردنه‌ ك شایان باس كردن بووگ . به‌ڵی چه‌ن نه‌فه‌ریگ كورد فه‌یلی له‌یلا و له‌ولا دامه‌زراننه‌ و پوسته‌یل بویچگ وه‌پیان دانه‌ وه‌لی ئه‌گه‌ر هویره‌و بكه‌یم ئه‌و لایه‌نه‌یله‌ ئه‌را مه‌ردم هه‌ژارو فه‌قیرو كه‌مده‌س ناوچه‌یل كفاح و سه‌دریه‌ و باب شێخ و شوینه‌یلترچه‌ كردنه‌ له‌ی چوارساڵه‌ تا ئایم دڵی وه‌پی خوه‌ش بووگ و سه‌رله‌نوو ده‌نگ بیه‌یگه‌ پیان ؛ چه‌ن ماڵ ئه‌را فه‌قیروهه‌ژاره‌یل كورد فه‌یلی دروس كردنه‌ ؟ چه‌نیگ له‌ كه‌لاوه‌گان و ماڵه‌ رمیایه‌گان ناوچه‌یل كوردنشین به‌غدا خاسه‌و كردنه‌ ؟ ئایا كاره‌بای ئه‌و ناوچه‌یله‌ جوور ناوچه‌یلتر ده‌وڵه‌مه‌ن نشین به‌غداس ئایا تویه‌نستنه‌ كاریگ ئه‌را مه‌جاری ناوچه‌یل ئه‌بووسێفێن و ئه‌بووده‌وده‌و و قوشه‌ل و سه‌دریه‌ و كۆلات و باب شێخ و قه‌مبه‌رعه‌لی بكه‌ن گه‌ڕیساو نه‌چووگه‌ ماڵه‌یل مه‌ردم ؟ راتب ئه‌را چه‌ن ماڵ فه‌قیر و هه‌ژار بڕینه‌سه‌و؟ كام مه‌دره‌سه‌ له‌و ناوچه‌یله‌ سازینه‌ یاكام مه‌دره‌سه‌ی كویه‌نه‌ ته‌عمیر كردنه‌ ؟ كام نه‌خوه‌شخانه‌ یامسته‌وسف له‌وشوینه‌یله‌ دروس كردنه ؟‌ تاچه‌نیگ گرنگی دانه‌سه‌ قه‌یران بیكاری هاوزوانه‌یلمان و چه‌ن شه‌هاده‌دار كورد له‌هه‌ردو ره‌گه‌ز نێروما له‌ وه‌زاره‌ته‌یل و داموده‌زگايل حكوومه‌تی ك ئی چه‌ن هاده‌سیانه‌و مه‌زراننه‌ ؛ گشت یانه‌ نیشانده‌ن ك لایه‌نه‌یل مه‌زه‌بی ك هاوزوانه‌یلمان ده‌نگ وه‌پیان دان له‌ی شه‌ش ساڵه‌ وه‌تایبه‌ت له‌ی چوارساڵه‌ له‌ حكومه‌ت جه‌عفه‌ری و مالكی هویچ ئه‌رایان نه‌كریاس یه‌ له‌بوار خزمه‌تگوزاری ؛ له‌باوه‌ت ئاینییش هویچ دژایه‌تییگ له‌ ناونی ئاین و نه‌ته‌وه‌ نیه‌ یه‌عنی ئایم تویه‌نی هه‌م نماز بخوه‌نی وهه‌م رووژگ بگری وهه‌میش ئه‌حكام ئسلامی خوه‌ی بوه‌یگه‌ ریه‌و و له‌هه‌مان وه‌ختیش له‌ حه‌ق خوه‌ی جوورتاكیگ كورد و له‌ حه‌ق نه‌ته‌وه‌گه‌ی جوور ملله‌تیگ وه‌رگری بكه‌یگ وهویچ ئاینیگ  یه‌ وه‌حه‌رام نه‌زانستگه‌ به‌ڵكم سه‌رجه‌م ئاینه‌یل ومه‌زه‌به‌یل له‌ بان یه‌كسانی یاعه‌داله‌ت ئایمه‌یل ته‌ئكید كه‌ن وه‌تایبه‌ت ئاین موقه‌ده‌س ئسلام ك ته‌نانه‌ت له‌ حه‌ق به‌ش خوریاگه‌یل غه‌یر موسه‌ڵمانیش ته‌ئكید كه‌یگ ، وه‌لی ئومیدواریم ئیجاره‌ هاوزوانه‌یلمان ته‌جروبه‌ی قایمه‌ی هاوزوانه‌یل ‌خوه‌یان بكه‌ن قایمه‌یگ ك وه‌ناو خوه‌یانه‌و له‌ مه‌ردم خوه‌یانه‌ و بیلا له‌جی بیگانه‌یل براو خوه‌شكه‌یل خوه‌یان نوێنه‌رايه‌تييان له‌په‌رله‌مان بكه‌ن ومه‌سه‌لیگ كوردی خوه‌مان ئویشیگ قه‌وم ئه‌گه‌ر گوشت قه‌وم بخوه‌ی سقانه‌گه‌ی نیه‌شكنی یه‌عنی هه‌ر جووری حه‌ساوی بكه‌ی دڵسوزییگ ئه‌را هاوزوانه‌یل خوه‌یان كه‌ن ئاره‌زوو دیریم ك ئیجاره‌ قایمه‌ی كوردستانی له‌به‌غدا ده‌نگه‌یل فه‌ره‌تری له‌ هه‌ڵوژاردنه‌یل گوزه‌یشته‌ باریگ و بتویه‌نی خزمه‌ت وه‌كورده‌یل نیشته‌جای پایته‌خت بكه‌یگ وسه‌رله‌نوو ته‌ئكید كه‌یم ك براو خوه‌شك ئه‌زیزم نماز خوه‌د بخوه‌ن رووژگ خوه‌د بگر ره‌فتارو ئه‌ڵس وبنیشد بیلا ئسلامی بوو و له‌هه‌مان وه‌ختیش خوه‌د و ملله‌ت كورد ك خوه‌دیش تاكیگید له‌و ملله‌ته‌ له‌هویرد نه‌چووگ .