ترامپ.. دز يا نه‌فام؟

خدر خه‌لات به‌حزانى

شه‌فه‌ق نيوز/ دوير له‌وه‌گ وه‌پى ئويشن ته‌وه‌ره‌يل خوه‌رهه‌ڵاتى ناوينى ك ده‌وڵه‌ته‌يليگ لايه‌نگر ئيران و ده‌وڵه‌ته‌يليگ لايه‌نگر سعوديه‌ خويان حه‌شار ئه‌يه‌ن، ئيران هه‌وه‌جه‌ وه‌ پاريزه‌ر يا ده‌نگيگ ره‌سانن نوقمبوێ جوور من نه‌يرێد و زه‌ره‌ديش وه‌ سعوديه‌ ناڕه‌سنێد ئه‌گه‌ر ريك نه‌كه‌فم وه‌ل ريڕه‌و مه‌يله‌ وه‌هابيه‌گه‌ێ.

 

ترامپ سه‌رۆك ئه‌مريكى گه‌ردێده‌ شوون به‌رژه‌وه‌ندێ وڵاته‌گه‌ێ، يه‌يش ماف خوه‌يه‌، چوينكه‌ له‌ وه‌خت قه‌سه‌مخواردن سه‌رۆكايه‌تى وت: قه‌سه‌م ئه‌خوه‌م ك ئه‌رك پۆست سه‌رۆكايه‌تى وڵاته‌يل يه‌كگرتگ ئه‌مريكى وه‌ دڵسووزێ جيوه‌جى بكه‌م و تا بتويه‌مم كار له‌بان خاسسازێ و مقه‌يه‌تى ده‌ستوور وڵاته‌يل يه‌كگرتگ بكه‌م.

 

ئمجا له‌وه‌ر ئه‌وه‌گ خوه‌يشى له‌ بنه‌ڕه‌ته‌و پياو كاره‌، ماف خوه‌يه‌ گه‌مه‌ له‌ناونى پۆسه‌گه‌ێ و ئه‌قڵيه‌ت بزنسيه‌تى بكا تا قانجاز ئه‌را وڵاتيگ بارێد، ك يه‌يش وه‌ شيوه‌ى نموونه‌ييگ ئه‌نجام دا له‌وه‌خت سه‌ردان ئىى دوياخريه‌ ئه‌را سعوديه‌، ك له‌يوا كرد گشت مانگايه‌يل سعودى هاورده‌ شير وه‌رجه‌ واده‌يليان له‌وه‌ر ده‌سه‌وه‌ركردن قه‌يماخيگ وه‌ تام گژوگياێ زارگه‌ێ كومپانياێ "ئه‌لمه‌راعى" به‌رهه‌مهاوه‌ر له‌ ئه‌مريكاێ لاتينى و هنارده‌ێ بكا ئه‌را "ئه‌ليانكێ" هويڵان دڵنيا له‌وه‌گ مقه‌يه‌تى خه‌يوه‌ته‌يلى ئه‌كا و نوێنه‌رايه‌تى سواره‌يل ئازاێ ئه‌كا وه‌ل ئه‌سپه‌يلى ك ماوه‌ێ سه‌ده‌يليگه‌ جه‌نگ نه‌كردنه‌.

 

ترامپ شايه‌ت دز بوود، چوينكه‌ سه‌ركه‌فت له بردن دارايى فريه‌يگ ك يه‌كسانه‌ وه‌ل به‌رهه‌م سعودێ ئه‌را دو ساڵ ته‌مام له‌ نه‌فت(وه‌گووره‌ى نرخ به‌رميل ئمڕوو)، ئى سه‌ركه‌فتنيشه‌ په‌يوه‌س نيه‌ وه‌ زيره‌كێ ترامپ ئه‌وه‌نه‌ێ ئه‌وه‌گ په‌يوه‌سه‌ وه‌ نه‌فامێ لايه‌ن وه‌رانوه‌ر و ترس و له‌رزه‌ێ له‌ نزيكه‌وبوينى له‌ له‌حزه‌ێ روى وه‌ڕوى بوينه‌وه‌ێ راسكانى دوياى ده‌يه‌يليگ له‌ جه‌نگه‌يل ك ئه‌ويش بيگومان وه‌ وكاله‌ت وه‌ل ئيران.

 

وه‌لێ ترامپ جوور كاوڕ ك كه‌فته‌ شوون بوو پترۆل چووڵه‌وانێ، ئه‌وه‌ ده‌ركه‌فت ك ساف سايه‌قه‌ تا راده‌ێ نه‌فامى، به‌ڵكوو ئسپاتى كرد ك هويرى جوور هوير ماسيه‌، وه‌تايبه‌ت ئه‌و ماسيه‌ ك لێرگى شووڕه‌و بويه‌ و دڕنده‌يى و هه‌مه‌جيه‌ت راوچى له‌ هوير بردگه‌.

 

شايه‌ت ترامپ ئه‌وه‌ له‌ هويرێ چيه‌ ك 16 سعودى له‌ ناونى ئه‌و 19 ترۆريسته‌ بوين ك په‌لامار تاوه‌ر بازرگانى جه‌هانى دان له‌ نيويۆرك و دويريش نيه‌ ره‌گه‌زنامه‌ێ بن لادن سه‌ركرده‌ى ئه‌لقاعيده‌ێ ترۆريستى فه‌رامووش كردگه‌ وه‌ل ئه‌و سه‌دان خوه‌يكوش سعوديه‌ ك خوه‌يان ته‌قاننه‌و له‌ناوچه‌يل جه‌نگ له‌ عراق و سوريا و شوونه‌يل تر.

 

ئايا ئه‌دێ ترامپ ئه‌و راپۆرته‌يل هه‌واڵگرێ و رووژنامه‌نويسيه‌ له‌ هويره‌و بردوێد ئاماژه‌ وه‌ ئه‌وه‌ ئه‌كه‌ن ك سه‌رچه‌وه‌يليگ له‌ ده‌وڵه‌يل كه‌نداو عه‌ره‌بى و له‌وانه‌يش سعوديه‌ پويل فريه‌يگ رشنن ئه‌را ريكخرياگه‌يل ترۆريستى جوور ئه‌لقاعيده‌ و داعش و سه‌رمايه‌داره‌يليگ و ته‌نانه‌ت ميره‌يل و نيمچه‌ ده‌وڵه‌مه‌نه‌يليگيش له‌ ده‌وڵه‌ته‌يل لماوێ نه‌فتيه‌و پويل به‌خشنه‌ ئه‌و گرووپه‌يل ترۆريستيه‌ ك ترامپ ئه‌خوازێد جه‌نگ وه‌ليانا بكاو وه‌ شه‌ڕخواز تاريفيان ئه‌كاو دژه‌يليانيش وه‌ خێردار..!!

 

ئوميده‌وارم ترامپ ئاشكراى شماره‌ى ئه‌و په‌لاماره‌يله‌ بكا ك ئه‌نجاميان دريا ئه‌را بان داعش له‌لايه‌ن سعوديه‌و هاوپه‌يمانه‌يلى و ئوميده‌وارم ئاشكراى ئه‌وانه‌گ بكا جه‌نگ دژ داعش ئه‌كه‌ن و ئه‌وانه‌گ پشتگيرى دژه‌ داعش ئه‌كه‌ن.

 

ترامپ، ئى نه‌فامه‌ وه‌ ئه‌قڵيه‌و ناچێد ك ئاساييترين ئاده‌ميزاد خوه‌رهه‌ڵاتى خاس ئه‌زانێد گشت ريكخرياگه‌يل ته‌كفيرى ك ترۆر و وێنه‌يل كوشتن و سه‌ربڕين و رفانن ژنه‌يل و مناڵه‌يل بڵاو ئه‌كه‌ن و كوشت و كوشتار خراو ده‌رهه‌ق ئاده‌ميزاد ئه‌نجام دان له‌ خوه‌رهه‌ڵات ناوين و له‌ ئه‌فريقيا و ئۆرپاو ته‌نانه‌ت له‌ پويلايى ماڵ ترامپ ئه‌فه‌ندييش، گشت ئه‌يانه‌ رياكخرياگه‌يلگن راديكاڵى و فكره‌ى وه‌هابى ديرن ك جوور ئايين فه‌رمى سعوديه‌س؟

 

پيشنيار ئه‌وه‌ ئه‌كه‌م ئه‌را ترامپ و تاقمه‌گه‌ێ مراجعه‌ێ بنته‌مه‌ڵ باوه‌ڕى و مه‌زه‌وى ريكخرياگه‌يل ترۆريستى بكه‌ن جوور ئه‌لقاعيده‌، داعش، بوكوحه‌رام، ئه‌لنوسره‌، ئه‌بو سه‌ياف، لايه‌نگره‌يل به‌يتوئه‌لئه‌قساو ريكخرياگه‌يل تر چه‌ته‌يل ته‌كفيرى تاوانبار و دڕنده‌يل، تا بوينن ك گشت ئه‌وانه‌ له‌ گوان مانگاێ وه‌هابى ئه‌مژن جوور ئه‌وه‌گ توێژه‌ريگ عراقى وته‌ێ وه‌ گووره‌ى كتاو بيگانه‌يل ئعتباردار.

 

من ك هاووڵاتييگ ئێزيدى عراقييم، ناڵانم وه‌ده‌س دريژه‌ێ فكر وه‌هابى و نزيكه‌ى نيم مليۆن ئاده‌ميزاد له‌ مه‌ردم پيكهاته‌گه‌م كوشياو رفياو نزيكه‌ى 10 هه‌زار كه‌سيش له‌ليان دويره‌و خريا ك زوورميان ژن و مناڵن و هه‌زاران دويه‌ت و ئافره‌تمانيش فرووشيان و هه‌تك كريان له‌لايه‌ن لايه‌نگره‌يل فكر وه‌هابى سعوديه‌و، ئمجا وه‌و خاريشه‌ ئويشمه‌ ترامپ: وه‌ى وه‌ خوه‌د و ديموكراسيه‌ت وڵاته‌گه‌د ك هاند ئه‌ياد ئه‌را هاوپه‌يمانێتى وه‌ل ترۆر له‌ وه‌رانوه‌ر 380 مليار دۆلار.

 

له‌وه‌يش ترسم خوه‌د بته‌قنێده‌وه‌و بچڕێد"ئه‌ڵڵاهو ئه‌كبه‌ر"ئه‌را چگن وه‌ناو به‌هه‌يشت وه‌هابيه‌يل پڕ شه‌راو و ژنه‌يل روێت و نير ومايه‌يل ئه‌گه‌ر چه‌ن ملياريگ تر وه‌پێد بيه‌ن، وه‌ل ئه‌وه‌يشا ئه‌ترسم ئيفانكاێ جوان بڕفيه‌ێد و بازرگانى جنسى وه‌پيه‌و بكريه‌ێد، وه‌لێ "مه‌دام ميلانيا" وه‌ ئاسانى ئه‌كوشيه‌ێد، چوينكه‌ وه‌هابيه‌يل پپيره‌ژنيگ ناخوازن ئه‌را نيكاح وه‌كار نه‌يه‌ێد، ئه‌گه‌ريش باوه‌ڕ وه‌پيم ناكه‌ێد بايه‌سه‌ پرسيار له‌ وه‌هابيه‌يل سعودى هاوڕيێد بكه‌ێد.

خدر خه‌لات به‌حزانى