كووتايی وه‌يه‌كه‌وژيان له‌ خوه‌رهه‌ڵات ناوين

شفق نيوز

دويای ئه‌وه‌ك هه‌ڕه‌شه‌ی كووتاييهاتن له‌ليان كريا له‌ی شاره‌، رووژ 19/7/2014 داعش وت: هه‌ر مه‌سيحييگ له‌ موسڵ بمينيده‌و بايه‌سه‌ جزيه‌ بيه‌يد، ئه‌گه‌ر نه‌ ئه‌وه‌ مه‌حاڵه‌ وه‌ مه‌سيحيه‌ت بمينيده‌و، ك يه‌يش ديارده‌يگ بويچگه.

ماوه‌ی چه‌ن ساڵيگه‌ وه‌ل هاتن هيز هاوپه‌يمانه‌يل ئه‌را عراق و دوياخريش په‌يابوين ئه‌و شه‌پۆله‌ ك وه‌پی ئويشن وه‌هار عه‌ره‌بی، وه‌هار كوشتن و بڕين و ويرانكردن گشت ئه‌و وڵاته‌يله‌سه‌ ك كه‌فتنه‌سه‌ وه‌ری، چوينكه‌ تونڕه‌وی ئايينی و نه‌ته‌وه‌يی و مه‌زه‌وی و حزبی ئه‌وه‌نه‌ زيای كردگه‌، وشك وته‌ڕ وه‌يه‌كه‌و سزنێد‌.

كوشتن و بڕين بويه‌سه‌ به‌شيگ ئاسايی و له‌ولايشه‌و كوومه‌ڵگای ناوده‌وڵه‌تی بويه‌سه‌ ته‌ماشاكه‌ر و هويچ جموجويليگ نه‌يريد، هه‌ر وه‌و خاتريشه‌ وه‌يه‌كه‌وژيان له‌ خوه‌رهه‌ڵات ناوين فريه‌ زه‌حمه‌ت بويه‌، چوينكه‌ كه‌سه‌يل تونڕه‌و بوينه‌سه‌ خاوه‌ن هيز و ده‌سڵات و ڕی نايه‌نه‌ وه‌يه‌كه‌وژيان نه‌ته‌وه‌يی و ئايينی و مه‌زه‌وی.

ماوه‌ی چه‌نه‌ها ساڵه‌ ميديايه‌يل خوه‌رئاوا وه‌گشتی و ئه‌مريكا وه‌تايبه‌ت باس له‌ لاوردن نه‌خشه‌ی سياسی خوه‌رهه‌ڵات ئه‌كه‌ن، دويا پيشبينييش رووژنامه‌ی نيويۆرك تايمز كرده‌ی له‌ ١٩/ ٧/ ٢٠١٤ ك عراق به‌ش ئه‌كريه‌يد ئه‌را سێ به‌ش و سعوديه‌ ئه‌را په‌نج ده‌وڵه‌ت و سوريا ئه‌را چوار به‌ش و ليبيا ئه‌را سێ به‌ش و يه‌مه‌ن ئه‌را دو ده‌وڵه‌ت. ئمجا ئه‌وه‌ك له‌ڕاسی دوينريه‌يد ئه‌وه‌سه‌ له‌ عراق و سورياو ليبياو يه‌مه‌ن ئه‌و دابه‌شبوينه‌ وجوود ديريد.

‌شادمان مه‌لا حه‌سه‌ن‌

ج . أ