كه‌س بى عه‌یب نییه‌!!

شفق نيوز

ئمجا هووكاره‌ى پیكهاوردن خێزان بویه‌، و له‌ شوون ئه‌وه‌یش خێڵ و عه‌شیره‌ت، و تا ڕه‌سیه‌سه‌ دروسكردن شارسانیه‌ت نوو، وه‌لى له‌ى مێژوو یا تاریخ دویر و دریژه‌، ئى ئاده‌میزاده‌ له‌ فره‌ لایه‌ن ئه‌زموون و عیبره‌ت وه‌رگردیه‌، ته‌نیا له‌ یه‌ك مه‌یدان نه‌ود ك ئه‌راى چاره‌سه‌ر نه‌كریاس، هه‌رچه‌نى دینه‌یل ئاسمانى و ڕه‌وشته‌یل سه‌رزه‌وى و زانا و فه‌یله‌سووفه‌یل جه‌خت له‌بانى كردنه‌ و كه‌ن، ك ئه‌گه‌ر په‌یڕه‌ویى بكردیان، له‌ فره‌ له‌و گیچه‌ڵه‌یله‌ قورتار بیان ك یه‌قه‌یان گرتیه‌ و گرێد، ئه‌ویش: مینه‌كردن عه‌یب و كه‌مى وه‌رانوه‌ره‌،  ك بویه‌سه‌ مایه‌ى سه‌رژان باسكه‌ر و باسكریاى.

له‌ى باوه‌ته‌، له‌ كه‌له‌پوور وكلتوور كورده‌وارى و بگره‌ له‌ كه‌له‌پوور و كلتوور گشت ملله‌ته‌یل جه‌هان، وه‌سه‌رهات و مه‌سڵه‌ته‌یل فره‌یگ هاتیه‌ ك باس له‌ى دیارده‌ كه‌ن.. وه‌لى ئایا په‌ند و عیبره‌ت وه‌رگریمن؟ -گومان له‌لى كه‌م!.. وه‌لى بیلا ئیجاره‌ ئى وه‌سه‌رهاتیشه‌ ئه‌رادان باس بكه‌یمن، به‌شكه‌م كه‌مى بیه‌یمنه‌ى ویز ئه‌قڵ، (پا) بنه‌یمنه‌ (برێك) زووان وه‌رجله‌وه‌گ باس عه‌یب و كه‌مى مه‌ردم بكه‌یمن:

ئویشن له‌ سه‌رده‌میگ له‌ سه‌رده‌مه‌یل مێژوو له‌ شاریگ له‌ شاره‌یل، پادشایگ بوى هه‌م خیل وهه‌م شه‌ل.. ئى پادشا، حه‌ز كرد جوور گشت پادشایه‌یل دونیا، هونه‌رمه‌نده‌یل ڕه‌سمكه‌ر ڕه‌سمیگ ئه‌راى بكه‌ن و ئه‌را ئه‌وه‌گ ئى خواستیه‌ وه‌جى بارێ داروده‌سه‌ى ده‌ورى كل كرده‌ شوون هه‌رچى هونه‌مه‌ند ڕه‌سمكه‌ره‌ و وه‌ختى جه‌میانه‌و كرد داوا له‌لییان كرد ڕه‌سم خاسیگ ئه‌راى بكه‌ن، وه‌لى وه‌مه‌رجیگ هویچ عه‌یبیگى نیشان نه‌یه‌ن، یه‌عنى نه‌ شه‌لى وه‌پیه‌و دیار بوود نه‌ خیلى.. هونه‌رمه‌نده‌یل گشتیان ئى داواكاریه‌ ڕه‌ته‌وكردن و وتن ئیمه‌ چوین تویه‌نیمن ئى دو عه‌یب ئاشكرا و دیاره‌ بشاریمنه‌و، یه‌ كاریگه‌ مه‌حاڵ ... له‌ولاوه‌ یه‌كیگ له‌و هونه‌مه‌نده‌یل ڕه‌سمكه‌ره‌ وه‌ گشت ئارامییگه‌و وت: به‌ڵى گه‌ورام من ئاماده‌م ئى جووره‌ ڕه‌سمیگ ئه‌را جه‌نابد ڕه‌سم بكه‌م؛ و هات ڕه‌سم فره‌ جوانیگ ئه‌راى ڕه‌سم كرد ..چوین؟ به‌ڵى له‌و ڕه‌سمه‌ له‌یوا نیشاندا ك ئى پادشا وسیایه‌ و تفه‌نگ ڕاوكردن ها وه‌ده‌سیه‌و ك چه‌ویگى نویقانیه‌ و ئه‌و چه‌وه‌گه‌ى واز كردیه‌ و یه‌كى له‌ پایه‌یلى چه‌مانیه‌ ... وه‌ى جووره‌ و وه‌گشت ئاسانییگ تویه‌نست ڕه‌سمیگ فره‌ جوان وبى عه‌یب ئه‌را پادشاگه‌ ڕه‌سم بكا.

ئیمه‌یش خوه‌زگه‌ گشتمان بتویه‌نیمن وه‌ختى باس یه‌كیگ كه‌یمن و هه‌وڵ ده‌یمن له‌ لاى مه‌ردم باسى بكه‌یم وه‌ شیوه‌یگ فره‌ جوان باسى بكه‌یمن و ئه‌وپه‌ڕ هه‌وڵ بیه‌یمن ك هه‌رچى عه‌یب دێرێ بشاریمنه‌وه‌ى، و جه‌خت له‌بان لایه‌نه‌یل خاس و جوان ئه‌و كه‌سایه‌تییه‌ بكه‌یم، هه‌رچه‌نى ك عه‌یبه‌گانیشى زه‌ق و ئاشكرا بوون، و هه‌میشه‌ هه‌وڵ بیه‌یمن باس لایه‌نه‌یل ئه‌رێنى یا ئیجابى بكه‌یمن و خوه‌مان له‌ لایه‌نه‌یل نه‌رێنى یا سلبیى دویره‌و بخه‌یمن، ئه‌را ڕه‌حه‌تى گیان و ده‌روین هه‌م خوه‌مان و هه‌م مه‌ردم!!

 

ن: ماجد سوره‌میرى