كورده‌يل فه‌يلى و خواست يه‌كلاكردنه‌وه‌ى خاڵه‌يل

شفق نيوز

خاڵه‌يليگ گرينگ هه‌ن بايه‌سه‌ له‌بان رووڵه‌يل ئى پيكهاته‌ ئيجاره‌ وه‌ جددى ئاگادارى بوون، ته‌نانه‌ت ئه‌گه‌ر سه‌ختيش بوون و له‌وانه‌يش ئه‌زموون ساڵه‌يل دوياى رميان رژيم به‌عس له‌ عراق ك چشته‌يل فريه‌يگ له‌لى كه‌فته‌و وه‌بوونه‌ى ئاماكه‌يل خراوى له‌بان رووڵه‌يل ئى پيكهاته‌ى ره‌سه‌نه‌ له‌ كومه‌ڵگاى عراقى، ئمجا گرانيه‌و ناكه‌يم ئه‌گه‌ر بويشيم ئى خاڵه‌يله‌ بوينه‌سه‌ چاره‌نويسساز و يه‌كلاكه‌ر ئه‌را ناسنامه‌ى كورده‌يل فه‌يلى له‌ قوناغ ئاينده‌.

رووڵه‌يل ئى پيكهاته‌ قه‌وڵه‌يل فريه‌يگ وه‌پيان دريا له‌لايه‌ن حزبه‌يل جيوه‌جيكار له‌ وڵات، وه‌تايبه‌ت له‌وانه‌گ وازى له‌بان ته‌ل مه‌زه‌وى كردن، وه‌لێ هه‌ڵكه‌فت ئاماژه‌ وه‌ ئه‌وه‌ كرد ك مه‌زه‌و ترس له‌بانى نيه‌ له‌ساى فريه‌يى نفوز حزبه‌يل ئايينى و فروانى بنه‌ما ستوينى و پانيه‌گه‌ى له‌ عراق له‌شوون 2003، يه‌يش وه‌ل ئاماژه‌يگ ئه‌را ئه‌وه‌گ ئه‌و ده‌سكه‌فته‌يله‌ ك هاتنه‌سه‌ ده‌س له‌بان زه‌وى واقع وه‌ نه‌ف ئى حزبه‌يله‌ بوى و پشت له‌ رووڵه‌يل پيكهاته‌گه‌مان كردن و هه‌ر له‌وه‌ر ئه‌وه‌يش وه‌زيريگ فه‌يلى يا وه‌رپرس گه‌ورايگ نيه‌دوينم به‌شدارى له‌ داين بڕيار گرينگ بكا له‌ نه‌خشه‌ى سياسه‌ت و ئابووى و نه‌خشه‌ى وڵاته‌گه‌.

ئمجا يه‌كيگ له‌و خاڵه‌يله‌ ئه‌وه‌سه‌ ك خواسته‌ رووڵه‌يل ئى پيكهاته‌ له‌تى جورئه‌ت يه‌كگرتن داشتوون له‌ناونى خوه‌يان له‌ هه‌ڵوژاردنه‌يل ئاينده‌، يا دامه‌زرانن فراكسيۆنيگ يه‌كگرتگ ئه‌را كورده‌يل فه‌يلى ك ئى ڵاوردن ئى زوڵمه‌ بگرێده‌ خوه‌ى، ئه‌ويش وه‌و مه‌رجه‌ نه‌خه‌ڵه‌تيه‌ێد وه‌ دڵنيايى و داين قه‌وڵه‌يل سه‌رۆك فراكسيۆنه‌يل له‌ وه‌رجه‌ هه‌ڵوژاردنه‌يل، به‌ڵكوو بايه‌سه‌ وه‌ ليستيگ تايبه‌ت وه‌خوه‌يان به‌شدارى بكه‌ن ئه‌را چه‌سپانن قورسايى خوه‌يان وه‌لاى كه‌مه‌و له‌ قوناغ يه‌كه‌م وه‌ داناين بنه‌ماى ئاينده‌يان له‌ناو خه‌ريته‌ى سياسى عراقى و دياريكردن ئامانج كورده‌يل فه‌يلى له‌بان ده‌سكه‌فته‌يل له‌ حكومه‌ت ناوه‌ندى، جوور ئه‌وه‌گ سه‌ركردايه‌تى كوردستانى له‌ چه‌سپانن ئه‌و خاڵه‌ سه‌ركه‌فت له‌شوون ئه‌وه‌گ هه‌رێم ئسپات ئه‌وه‌ كرد ك سه‌ركرده‌يل موحه‌نكيگ ديرن و زانن چوين ده‌سكه‌فت ئه‌را ملله‌تيان وه‌ده‌س ئه‌يه‌رن.

ئيمه‌ جوور كورده‌يل فه‌يلى ناكووك نييم وه‌ل سياسه‌ت نه‌ته‌وه‌مان و مافه‌يلى، وه‌ل ئه‌وه‌يشا سه‌ر وه‌ مه‌وه‌ز شيعه‌يشيم، وه‌لێ ئه‌زموونه‌يل وه‌رين په‌نجه‌يلمان سزان له‌وه‌ختيگ ك هيشتنه‌مان ده‌س بيه‌يمنه‌ قه‌ى قه‌زانه‌يل سياسه‌ت له‌ عراق له‌ ديمه‌ گه‌رمه‌گه‌ى، وه‌لێ ئيسه‌ ئيمه‌ ئه‌زانيم له‌ كاملاوه‌ قه‌زانه‌گه‌ بگريم ك له‌يوا دياره‌ له‌ هه‌ڵوژاردنه‌يل ئاينده‌ فريه‌ گه‌رم بوود له‌وه‌ر ئه‌و ئه‌زموونه‌يله‌ ك زويتر گشت ملله‌ت عراقى وه‌پيه‌و گوزه‌ر كردگه‌، ك يه‌يش زه‌مينه‌ خوه‌ش ئه‌كا له‌وه‌رده‌م رووڵه‌يل ئى پيكهاته‌ له‌ ئستغلال به‌شداريكردن پيشبينيكرياگ ريژه‌ى فريه‌يگ له‌ رووڵه‌يل نيشتمان ئه‌را ده‌نگداين وه‌خاتر چه‌سپانن داواكاريه‌يلمان له‌ڕى به‌شداريكردن وه‌هيزيگ له‌ هه‌ڵوژاردنه‌يل ئاينده‌.

موشتاق ره‌مه‌زان