كه‌ى له‌ پيسى ره‌سانن ئه‌ل ئه‌كريه‌ێم؟

شفق نيوز

ئه‌وه‌گ ره‌سانن خراو ئه‌نجامى ئه‌ياد له‌ خراوه‌كارى فيشتره‌ له‌و ترۆره‌ وه‌ گشت ئامێره‌يل كاولكاريه‌و، ته‌نانه‌ت ئه‌و چه‌وه‌يليشه‌ ك سه‌ير موحيبه‌ت ئه‌كا له‌ى وڵاته‌ ك به‌ره‌كه‌ت له‌تى گومه‌ وشكه‌و بوينه‌، چوينكه‌ ترس و له‌زر سه‌رگه‌وراى هه‌ڵويستن و مه‌كينه‌ى ره‌سانن سته‌مكاريش سووكايه‌تى وه‌و ژان و مه‌ينته‌تيه‌يل مه‌ردم نيشته‌جى ئى وڵاته‌ ئه‌كا ك گوزه‌ر وه‌پيه‌و ئه‌كه‌ن، دى گشت رووژ و وه‌ختيگيش سنى و شيعه‌و كورد و عه‌ره‌ب و گشت پيكهاته‌يل وه‌رده‌وامن له‌ پيشكه‌شكردن قوربانى وه‌خاتر وه‌رده‌وامبوين به‌رهه‌م ئه‌و مه‌كينه‌ تا ئاماده‌بوينيگ تراجيدى داشتوون له‌ مه‌يدانه‌گه‌.

ئمجا ئى ره‌ساننه‌ وه‌ته‌نيا خراو نيه‌، به‌ڵكوو له‌هه‌مان وه‌خت خوه‌شه‌ويسى و باوه‌ڕه‌يليش خراو بوينه‌ و له‌ساى نه‌وين و كووچ په‌يامه‌يل ئاسمانى دى زوڵم و روخساره‌يل دڕنده‌يى ك ئاشكرا ديارن بويه‌سه‌ راسى.

ئى ره‌ساننه‌ ك قسه‌ له‌بانى ئه‌كه‌يم جوور سراويگه‌ ك ته‌نيا له‌ دويره‌و دوينيمنه‌ى، ك ئايا له‌وه‌رچه‌ بايه‌سه‌ مه‌سيحى و سوبى و ئێزيدى و كاكه‌يه‌يل باج ئى كيشمه‌كيش شيعه‌و سنيه‌ بيه‌ن؟ و ئاينپه‌روه‌ره‌يل ئه‌و دو مه‌زه‌وه‌ ئه‌راچه‌ بايه‌سه‌ هه‌ڵه‌يل وه‌سياسه‌تكردن مه‌زه‌وه‌يليان بگرنه‌ مل له‌وه‌ختيگ ره‌جم راسى ئه‌كه‌يم له‌بان سافه‌ خورما، ك ئايا بايه‌سه‌ له‌بان عه‌رش چ ژياريگ چوارمشقى بنيشيم؟

نموونه‌يش ئه‌را ئى باسه‌، ئه‌وه‌سه‌ ئاماره‌يل شيوياگ فريه‌يگ هه‌ن له‌باوه‌ت هه‌ڵكه‌فتيگ ك ره‌سانه‌مانه‌ به‌رزه‌خ نه‌ته‌وايه‌تى و مه‌زه‌وى و به‌رزايى كويه‌يل كوردستان و هاماريه‌يل فراوان ڕازياگ وه‌ مه‌زارگه‌ى ئيمامه‌يل و ديمه‌نه‌يل ژيان له‌ ناوچه‌يل ناونى دوچه‌مان، ك وه‌ وجوود گشت ئه‌يانه‌ پرسياريگ خوه‌ى ده‌رئه‌خا ك ئايا ئيمه‌ دڵخوه‌شيم وه‌پى؟ يا وه‌ل بوو ده‌ريايه‌يليگ له‌ نه‌فت و غاز ك ديريمنه‌ى ئايا ده‌وڵه‌مه‌نيم؟

دى نوڕێد ئى وڵاته‌ ئه‌و خاك و به‌هيشت و ماواى هه‌وه‌جه‌داره‌يل و ژاره‌يل نيه‌، چوينكه‌ گشت پيكهاته‌يل ناڵنن وه‌ده‌س فه‌قيرى و بويه‌سه‌ به‌هه‌يشتيگ ئه‌را فه‌رمانڕه‌وا و سه‌ركرده‌يل جه‌نگ و ئاشووگه‌رى، چوينكه‌ ئه‌وه‌گ قيمه‌ت ديريد له‌ى وڵاته‌ ك موڵك ملله‌ت نيه‌و هه‌ر چشتيگيش نه‌ف بياشتوود سه‌رچه‌وه‌يگ زويتر بويه‌ ئه‌را فرووشتن و دزى، دى وه‌ هه‌ر حاڵ بايه‌سه‌ دگان وه‌ ئه‌وه‌ بنه‌يم ك ئى وڵاته‌يله‌ بوينه‌سه‌ بياوان له‌ له‌گشت ريڕه‌و نه‌ريته‌يل ئنسانى و ئاسمانى و ئه‌وه‌گ ئه‌كه‌فێده‌ ده‌س ملله‌ت له‌ى بياوانبوينه‌ ته‌نيا دو چشته‌ ك ئه‌ويش سراو ده‌وڵه‌مه‌نى و فه‌قيرى هه‌ڵكه‌فته‌.

ئيمه‌ى عراقيه‌يل ده‌وڵه‌مه‌نيم وه‌ ئه‌زموونه‌يل تيه‌ڵ، و يه‌كه‌ميم له‌ ئاشكراكردن راسيه‌يل ئه‌را مه‌ردمان تر و ئه‌و سراويشه‌ ده‌وڵه‌مه‌نه‌ وه‌ ئه‌زره‌ت سامانه‌يل سروشتى و وه‌ل گشت مه‌ينه‌تيه‌يليگيش هان مه‌ردم ئه‌ياد وه‌ره‌و مه‌سه‌له‌ى مه‌زه‌وى و باوه‌ڕه‌يل به‌تاڵ له‌ داشتن به‌نه‌يى خوداوه‌ند و خوه‌شه‌ويسى ئاده‌ميزاد و فه‌قيرييش نه‌يده‌ شوون ئه‌و مه‌ردمانه‌ ك كه‌فتنه‌سه‌ مينه‌ى تونڕه‌وى ره‌گه‌زى و ئايينى و تايفى تا گشت خێر وبه‌يريگ قويته‌و بيه‌ن، هه‌ر وه‌و خاتريشه‌ مه‌ردمان خاوه‌ن ئى وڵاتيشه‌ ك ناوى عراقه‌ گووشه‌گير ئى فه‌قيريه‌ بوينه‌و ناخوازن راسيه‌گه‌ ئه‌را كه‌سه‌يل تر نيشان بيه‌ن ك هه‌رچه‌نى له‌ روخساريانيش دياره‌، دى هه‌ر خاوه‌ن وژدانيگ ئه‌گه‌ر سامانه‌يل ئنسانى و سروشتى ئى وڵاته‌ بوينێد حوكم وه‌ مه‌زڵوميه‌ت ئى ملله‌ت و خاكه‌ ئه‌كا، هه‌ر له‌وه‌ر ئه‌وه‌يش نوڕيم ك ره‌سانن غه‌دركار و هاوشيوه‌يان هووكار سه‌ره‌كى بوين له‌ دروسكردن بت و فه‌رمانڕه‌وايه‌يل جه‌ور و بوينه‌ هووكار به‌رپاكردن ئاگر ئاشووگه‌رى و جه‌نگه‌يل نه‌ته‌وه‌يى و تايفى، ك بايه‌سه‌ وه‌رجه‌ پاكه‌وكردن زه‌وى له‌ ترۆريسته‌يل دادگايى ئه‌و ره‌ساننه‌يله‌ جوور تومه‌تبار جه‌نگ بكريه‌ێد و بايه‌سه‌ ئى ملله‌ته‌ له‌ پيسى ئه‌و ره‌ساننه‌ دوباره‌ پاكه‌و بكريه‌ن.

عه‌لى حسێن فه‌يلى