نيشتمان ئه‌را گشته‌

شفق نيوز

ئايه‌نده‌ی وڵاتمان په‌يوه‌ندی ديريگ هويره‌و بكه‌يم و ده‌س بكه‌يمنه‌ گفتوگووی سه‌ركه‌فتگ و واز و بته‌ويگ وه‌ل گشت نه‌ته‌وه‌يل و دينه‌يل و لايه‌نه‌يل نيشتمان، ئه‌ی گفتوگووه‌يله‌ بايه‌د له‌بان بنه‌وای ئاشتی و يه‌كتره‌ك وه‌خشين و برايه‌تی و دووسی بوود. ڕيكخستن په‌يوه‌نديه‌يل كۆمه‌ڵايه‌تی و سياسی و ئابووری بايه‌د له‌ڕيگه‌ی دويری گرتن له‌ گشت ئايه‌نده‌یل تيه‌ريك بوود و گشت ئاگاداريم هه‌رچه‌نيگ له‌ ره‌نگيگ خوه‌شمان بايگ وه‌لی ئه‌و وينه‌ ك كيشيه‌يگ ئه‌گه‌ر ره‌نگه‌يلتر له‌تی وه‌كار نه‌وه‌يم ره‌يين ده‌رنيه‌چوود و له‌بان گشت وينه‌گه‌ كاريگه‌ری نه‌يگ.

ئيمه‌ بايه‌د له‌ڕيگه‌ی بڕيگ له‌ گوڕانكاريه‌يل له‌چوارچيوه‌ی هوير و باوه‌ڕه‌يل وه‌زع جه‌ديديگ وه‌دی باريم و ئه‌ی كاره‌ ته‌نيا ئه‌رك يه‌ك لايه‌ن نيه‌ به‌ڵكه‌م ئه‌رك گشت لايه‌نه‌يله‌ ك وه‌ سه‌ختی هاووڵاتيه‌يل كووتايی بارن و دوير له‌ هه‌ر فه‌رهه‌نگ توڕه‌يی و كينه‌ و تون و تيژی ئه‌را ئاوه‌دانی وڵاتمان ته‌قالا بكه‌يم. بايه‌د بزانيم ك نيشتمانيگ وجوود نه‌يريگ ئه‌گه‌ر نيشتمان گشت پێكهاته‌يل نه‌ود و هويچ نيشتمانيگ دانيه‌مه‌زريه‌يگ ئه‌گه‌ر گشت لايه‌نه‌يل له‌تی به‌شداری نه‌كه‌ن و ده‌سمه‌يه‌تی نه‌يه‌ن و پيشكه‌فتنيگيش زامن نيه‌كريه‌ی ئه‌گه‌ر وه‌گوره‌ی هوير و ته‌قالا و داهينان گشت نه‌ود. گشت پێكهاته‌يل نيشتمان بايه‌د روح يه‌كتره‌ك وه‌خشين و دووسی داشتوون وه‌ حقوق يه‌كتره‌ك ئعتراف بكه‌ن و له‌ فه‌رهه‌نگ توڵه‌سه‌ندن دويری بگرن، هه‌ميش گشت لايه‌نه‌يل بايه‌د له‌ حه‌قه‌يل و ئه‌ركه‌يل خوه‌يان يه‌كسان بوون و هويچ جياوازييگ له‌ناونيان دياری نه‌كريه‌يگ.

جه‌هان گوڕانكاريه‌يل فره‌يگ وه‌چه‌و دوينيگ و له‌ بواره‌يل ژيان ئنسانی و ئاگاداری وه‌شيوه‌ی گۆرج و ئاشكرايگ پيشكه‌فيگ، وه‌يخاتره‌ نيشتمان هه‌وه‌جه‌ ديريگ گشت ته‌قالايل خوه‌یان وه‌كار بوه‌ن تا سه‌رله‌نوو بووسيگه‌ پاوه‌ و وه‌ گشت چينه‌يل كۆۆمه‌ڵگه‌ خزمه‌ت بكه‌ێ.