خه‌مسه‌ردی ئۆرپا جه‌نگ ره‌سانه‌ وه‌رماڵه‌يل!

شفق نيوز

سه‌رۆك بارزانی هه‌ر له‌ سه‌ره‌تای هاتن داعش ئه‌را موسڵ، ئۆرپاو ئه‌مريكا له‌وه‌ ئاگاداره‌و كرد ك داعش مه‌ترسی گه‌ورايگه‌ ئه‌را بان گشت جه‌هان ئنسانيه‌ت نه‌ك ته‌نيا عراق و كوردستان، ئيسه‌يش ك هه‌ڕه‌شه‌ گه‌وراگه‌ ره‌سيه‌ ئۆرپا له‌وه‌ر دو دو هووكار بايه‌سه‌ ئۆرپاو ئه‌مريكا جدديتر بوون له‌ هاوكاريكردن هه‌رێم كوردستان، يه‌كه‌م له‌وه‌ر ئه‌وه‌ك داعش هه‌ڕه‌شه‌يگ جه‌هانيه‌ له‌بان وڵاته‌يل ئۆرپاو ئنسانيه‌ت، دويه‌ميش ئه‌وه‌سه‌ ك پيكهاته‌ی ئی ريكخرياگ ترۆريستيه‌ ك سفه‌تيگ جه‌هانی ديريد و ره‌گه‌زه‌يل جياواز له‌تی به‌شداره‌ جوور خه‌ڵك فره‌نسی و بريتانی و ئه‌ڵمانی، ئيسه‌ وه‌ هه‌زاران سه‌له‌فی له‌سای سيستم ديموكراسی ئۆرپا وه‌ ئازاد ژيه‌ن و ره‌گه‌زنامه‌ی ئۆرپی ديرن و ئه‌يه‌ن له‌ عراق و سوريا و سه‌نگه‌ره‌يل پێشمه‌رگه‌ خوه‌يان ته‌قننه‌و.

ئۆرپا تائيسه‌ له‌ جه‌نگ ترۆر سه‌ركه‌فتگ نه‌ويه‌و له‌ ئه‌وساو ئيسه‌يش بويه‌سه‌ لانه‌ی به‌رهه‌مهاوردن گفت تونڕه‌وی ئايينی و فراوانبوين ترۆريسته‌يل، ئۆرپا شكه‌شت هاوردگه‌ له‌ تيكه‌ڵكردن فه‌رهه‌نگه‌يل جياواز و له‌ به‌شداری وه‌پيكردن مه‌ردم وڵاته‌يل عه‌ره‌بی و ئسلامی و ئه‌فريقيايی له‌ناو كومه‌ڵگای خوه‌ی شكه‌ست خوارد له‌ بوار سياسی و كومه‌ڵايه‌تی و په‌روه‌رده‌يی و زانست و ماريفه‌ت جه‌هانی.

له‌و جه‌نگه‌ ك دو ساڵه‌ داعش ده‌س وه‌پی كردگه‌، سوپای هه‌ردوگ ده‌وڵه‌ت سورياو عراقی شكانگه‌و ته‌نيا هيزيگ ك تويه‌نستگه‌ خوه‌ی له‌وه‌رانوه‌ری بگريد و خاك له‌و دوشمن دڕنده‌ بسينيده‌و پێشمه‌رگه‌ بويه‌، هه‌ر وه‌و خاتريشه‌ پێشمه‌رگه‌ چه‌سپانه‌ی ك ئه‌تويه‌نيد وه‌ سه‌ركه‌فتگانه‌ جه‌نگ ئه‌و ريكخرياگ ترۆريستی دڕنده‌ بكا.

له‌ڕاسی ئه‌گه‌ر هاوپه‌يمانی جه‌هانی جددی بدێ و هاوكاری فيشتر كورد بكاو چه‌ك قورس ئه‌رای دابين بكا، ئه‌وه‌ داعش فيشتر شكه‌ست ئه‌يه‌ريد و له‌ سورياو عراقيش له‌بان ده‌س پێشمه‌رگه‌ بنبڕ ئه‌كريه‌يد.

وه‌لی بايه‌سه‌ وه‌ل هاوكاری و جه‌نگ پێشمه‌رگه‌، كومه‌ڵگای ناوده‌وڵه‌تييش هه‌وڵ فيشتر باريده‌ كار و جه‌نگ فكری داعش بكاو جه‌نگ ئابووری بكاو سه‌رچه‌وه‌ی داهاتيان وشك بكاو ڕی هامشوو وڵاته‌يل له‌ليان بگيريه‌يد و ئه‌وسا ئه‌تويه‌نن داعش كز و بنبڕی بكه‌ن.

هاوده‌نگ فارووق

ج . أ