عه‌باس عه‌لى شاه: وه‌رزشه‌گه‌مان لاوازه و دیرى له هویره‌و چوود
لاواز و زه‌عیفه و تویه‌نیم بویشیم وه‌ره‌و له‌هویره‌چوین چوود، وه تایبه‌تى ئه‌وه‌گ په‌یوه‌ندى وه یانه‌یل و وه‌رزشكاره‌یل فه‌یلیه‌و دیرى، و له‌بان ئه‌وه‌یشه جه‌ختكرد ك ئمڕوو هه‌وه‌جه‌مان ها وه هاوردن پسپۆره‌یل وه‌رزشى كارزان ئه‌را خاسه‌وكردن بارووه‌زع وه‌رزش عیراقى وه‌شیوه‌یگ گشتى... یه‌یشه ده‌ق دیمانه‌گه‌س:
*به‌شداریكردن كورده‌یل فه‌یلى له وه‌رزش عیراقى چوین دوینید؟
- وه‌باوه‌ڕ من وه‌رزش وه‌شیوه‌یگ گشتى وئاشكرا فره لاواز یا زه‌عیفه، وه‌تایبه‌تى ئه‌وه‌گ په‌یوه‌ندى وه یانه‌یل و وه‌رزشكاره‌یل كورده‌یل فه‌یلیه‌و دیرى.
* كاروان وه‌رزشیید له كوره‌و ده‌س وه‌پى كردیه؟
- سه‌ره‌تاى من وه‌ل یانه‌ى شورته ( ته‌میره‌ى سه‌وز) بویه ك وه‌ل به‌چكه‌شیره‌یل(ئه‌شبال) ئى یانه بازى كردمه و ئنجا چویمه‌سه تیم جایڵه‌یل یانه‌گه و له شوون ئه‌وه‌یش وه‌ل تیم سه‌ره‌كى یانه‌ى شورته له ساڵ 1983 بازى كردمه تا ساڵ 1986 و له شوون ئه‌وه ناچار بویمه له‌وه‌ر چه‌ن هووكاریگ سیاسى واز له تووپان بارم.
*كى وه‌لده‌و بوى له‌و ئانه؟
- ره‌عه‌د حه‌مودى، فه‌یسه‌ل عه‌زیز، عه‌لى روسته‌م، سه‌عه‌د قه‌یس، باسم قاسم و بازیكه‌ره‌یلیگتر.
*كى به‌هره‌دارى عه‌باس عه‌لى شاه پیشخست و به‌رزیه‌وكرد؟
- دوگلوس عه‌زیز، مه‌حه‌مه‌د ته‌بره، عه‌بد كازم، حه‌بیب نورى، ئبراهیم له‌فته، سامر موحسن، واسق ناجى، قاسم لازم.
*جوانترین بازیه‌یلد كامیان بوى؟
- فره شانازى كه‌م وه بازیه‌گه‌مان دژ وه یانه‌ى ڕه‌شید ك وه‌یه‌كسانى یه‌ك وه‌یه‌ك گۆڵ ته‌واو بوى، هه‌رله‌یوا بازیه‌گه‌مان دژ وه یانه‌ى ته‌له‌به، و بازیه‌گه‌مان وه‌ل یانه‌ى قوه‌لجه‌ویه(ته‌یه‌ران وه‌رین) و چه‌ن بازییگتر.
* وه ڕاى تو، ئه‌راى چه له‌ى مه‌وقه جه‌ماوه‌ر كه‌میگ چنه ته‌ماشاى بازیه‌یل خول عیراق؟
- وه‌باوه‌ڕ من كه‌مهاتن جه‌ماوه‌ر ئه‌را ته‌ماشاكردن بازیه‌یل خول عیراق له‌وه‌ر چه‌ن هووكاریگه و له‌وانه‌یش نه‌وین بازى ده‌سه‌جه‌مى (جماعى) له ناوبه‌ین تیمه‌یل خول عیراق، نه‌وین بازى خوه‌ش و جوان ومه‌یلكیش و كه‌مى به‌هره‌دارى.
* خاڵه‌یل نه‌رێنى یا سلبى تووپان له عیراق چه‌س له‌ى مه‌وقه؟
- نه‌وین پشتگیرى و كوومه‌ك دارایى، نه‌وین بازیگایه‌یل خاس، دوچه‌وه‌كى كردن و قه‌ومى قه‌ومى كردن و ڕشپه‌ت خواردن، ئه‌وه بیجگه نه‌خستن كه‌سه‌یل گونجیاى له شوونه‌یل گونجیاى.
* چه بایه‌د بكریه‌ید ئه‌را پیشخستن تووپان عیراق؟
- بایه‌ته وه‌هه‌ڵه‌په‌ڵه كار بكریه‌ید ئه‌را دابین كردن بازیگایه‌یل خاس و ئاماده‌كردن كه‌ره‌سته‌یل زه‌روور ئه‌را پیشخستن تووپان، ئه‌وه بیجگه پشتگیرى و كوومه‌ك دارایى، و له‌یرا من بایه‌ته ئاماژه وه‌وه بیه‌م ك فره گرنگه ده‌س نه‌خریه‌یده ناو كاروبار مه‌شقداین (تدریب) ك په‌یوه‌ندى وه گرووپ مه‌شقده‌ره‌یل دیرى وه‌ته‌نیا و هه‌میش ئیمه هه‌وه‌جه‌ى گه‌ورایگ دیریمن ئه‌را هاوردن پسپۆره‌یل وه‌رزشى كارزان ئه‌را پیشخستن وه‌رزش عیراق.
*ناسنامه‌ى عه‌باس عه‌لى شاه:
-بازیكه‌ر وه‌رین
- له ساڵ 1965 په‌یا بویه
- ژن خوازیه و 4 مناڵ دیرى
- پله پله له یانه‌ى شورته بازى كردیه هه‌ر له به‌چكه شیره‌یل تا جایڵه‌یل تا ڕه‌سیه‌سه یه‌كم ڕیز یانه‌گه.
