ئابوورى عراق

شفق نيوز

گومان كاڵین له‌ مه‌یدان مه‌سه‌له‌ى وه‌رده‌وامبوین كاركردن، ئه‌ویش وه‌ نه‌خشه‌ناین ئه‌را وه‌ڕیه‌وبردن ئابوورى، له‌وانه‌یش شكه‌ستهاوردن سستم ده‌وڵه‌ته‌یل سۆشیالیستى و ده‌ركه‌فتن سه‌ره‌تایه‌یل شكه‌ستخواردن خراو ئه‌زموونه‌یل په‌ره‌وه‌پیداین له‌به‌شیگ گه‌وراى ده‌وڵه‌ته‌یل، ك په‌نا بردیانه‌ وه‌ر شیواز بیرۆقراتیه‌یل له‌ مه‌یدان نه‌حشه‌داناین، ئنجا ئه‌و شكه‌ستخواردنه‌ هاوكار بوى وه‌ل سه‌ركه‌فتن خاسیگ  له‌ڕز قه‌یرى له‌و ده‌وڵه‌ته‌یل گه‌شه‌كردگه‌ ك په‌نا بردیانه‌ وه‌ر سستم بازاڕ و له‌وه‌رجه‌ گشتیانیش ده‌وڵه‌ته‌یل ئاسیایى.

بیجگه‌ ئه‌وه‌ك ئه‌و ده‌وڵه‌ته‌یل گه‌شه‌كردگه‌ له‌ڕوى وه‌ڕیه‌وبردن پرووسه‌ى په‌ره‌وه‌پیدان له‌بان هاساو شیواز نه‌خشه‌داناین بوى، وه‌لى له‌لایگ تره‌وه‌ دوینیم سه‌ختیه‌یل وه‌زع ئابوورى و كومه‌ڵایه‌تى و سیاسى له‌وڵاته‌یل گه‌شه‌سین كاریگه‌رى فره‌یگ له‌بان دانه‌ره‌یل بڕیار داشتن و به‌شدار بوین له‌ په‌كخستن خاس هیزه‌یل بازاڕ له‌ چاره‌سه‌ركردن هه‌ر شیویان و كه‌م وكوڕییگ بنه‌ڕه‌تى.

ئى مه‌سه‌له‌ له‌ ئابوورى عراق فره‌ چڕوپڕتره‌ له‌سایه‌ى ئه‌و سه‌ختى بونیاتناین ئاشكرا ك هاته‌ تویش مه‌سه‌له‌ى به‌رهه‌مهاوردن له‌ ده‌یه‌یل گوزه‌یشت، ك وه‌ سه‌به‌ب جه‌نگ و ئابڵوقه‌ یا حسار ئابووریه‌وه‌ قویلتره‌و بوى و دویاخریش كزى ژیرخان و كه‌م وكوڕى ده‌زگاو دویاكه‌فتن سستمه‌یل قانوون و قانوونداناینیش له‌وه‌ نه‌خش یا ده‌ور خوه‌یان داشتنه‌. له‌ڕاسى ئه‌و سه‌ختیه‌یله‌ ك ئشاره‌ت وه‌پیان كریا بوینه‌ سه‌به‌ب ئه‌را كاركردن میكانیزم یا ئالیه‌ته‌یل بازاڕ له‌عراق، ك دیاره‌ ئه‌و میكانیزمه‌یله‌ نیه‌كریه‌یگ  وه‌ جوانى و خاسى كار بكه‌ن له‌سایه‌ى شیویان سستم نرخه‌یل له‌بان مه‌یدانه‌یل سه‌ره‌كى به‌رهه‌مهاوردن. وه‌ل ئه‌وه‌یشا كزى حاڵه‌ت ركابه‌رى یا مونافسه‌ له‌ بازاڕ عراق حاڵه‌تیگ له‌ جیاوازى دروس ئه‌كا له‌ناونى توانایه‌یل كه‌رت یا قه‌تاع گشتى و تایبه‌ت له‌سایه‌ى وه‌زع نه‌ڕه‌سى ئه‌و ده‌زگایه‌یله‌ ك له‌و بازاڕه‌ كار كه‌ن، بیجگه‌ ئه‌وه‌یش داوه‌زین ئاست بیكارى بووگه‌ سه‌به‌ب كزبوین هه‌ڵویست و له‌یوا دیاره‌ ئه‌و وه‌زعه‌یله‌ له‌یوا له‌ ئابوورى ئمڕوو عراق كه‌ن له‌گشت ئابووریه‌یل جه‌هان زیاتر هه‌وه‌جه‌ وه‌ پلانداناین داشتووگ، ئه‌ویش نه‌ك له‌وه‌ر هاوكاریكردن له‌ناونى كه‌رته‌یل ئابوورى، به‌ڵكوو له‌وه‌ر خاتر گونجانن له‌ناونى به‌رژه‌وه‌ندیه‌یل یه‌كتربڕ هیزه‌یل كومه‌ڵایه‌تى كارا یا فعال له‌ مه‌یدان عراقى، هه‌ر له‌وه‌ر ئه‌وه‌یش وه‌سه‌به‌ب پلانداناینه‌وه‌ بووگ بڕه‌سیه‌یگه‌ شیوازیگ ته‌وافقى له‌ناونى ئى كه‌رت یا قه‌تاعه‌یله‌و ئه‌و ده‌سه‌و تاقمه‌ له‌ژوارچیوه‌ى وه‌خت دویرو دریژیگ ئه‌را گه‌شه‌وه‌پیداین ئابوورى و كومه‌ڵایه‌تى ك له‌ دانیشتنیگ ئاشكراوه‌ سه‌رچه‌وه‌ بگریگ  له‌باوه‌ت ئامانجه‌یل گشتى و دابه‌شكردن گرانى و قانجازه‌یل. هه‌ر له‌وه‌ر ئه‌وه‌یش هیزه‌یل بازاڕ خوه‌ى وه‌ته‌نیا نیه‌تویه‌نیگ هاوسه‌نگى بگریگ له‌ناونى به‌رژه‌وه‌ندیه‌یل ناكووك، چوینكه‌ بازاڕ عراق و كومه‌ڵگاى عراقى نه‌ڕه‌سیه‌سه‌ پله‌ى ئى جووره‌ پیشكه‌فتنیگ ك بتویه‌نیگ وه‌ گشت توانایگه‌وه‌ كار بكا، هه‌ر له‌وه‌ر ئه‌وه‌یش تویه‌نیم بویشیم سه‌ركه‌فتن پرووسه‌ى په‌ره‌وه‌پیداین له‌ ئابوورى عراق به‌سیاسه‌ وه‌زعه‌گه‌وه‌.