با ئاوايه‌يل هه‌رێم كوردستان بكه‌يمنه‌ شوون گه‌شتياری

شفق نيوز

 

ئه‌را نموونه‌: ناوداری له‌ جووريگ له‌ خوارده‌مه‌نيه‌يل ناوخوه‌يی، سيستم كشتوكاڵی و كوومه‌ڵايه‌تی وه‌ل ژينگه‌يگ پاك و بيگه‌رد، بيجگه‌ ئه‌وه‌يش دابينكردن هه‌وه‌جه‌يل گه‌شتيار له‌و ئاوايه‌يله‌ گرينگی خوه‌ی ديريد له‌بان ئامانج گه‌شت وگوزار و كاردانه‌وه‌ی خاسيش ديريد له‌بان ئه‌و گه‌شتياره‌يله‌ ك روی له‌ی ئاوايه‌يل گه‌شتياريه‌ ئه‌كه‌ن و وه‌خت وچانداين خوه‌يان له‌تی ئه‌وه‌نه‌ سه‌ر.

له‌يرا بايه‌سه‌ ئی ئاوايه‌يله‌ تام و له‌زه‌ت ئاوايه‌تی وه‌پيانه‌و ديار بوود وه‌ل دابينكردن گشت خزمه‌تگوزاريه‌يل، ك ئه‌ويش بايه‌سه‌ وه‌ جووريگ بوود گه‌شتيار تويش دڵه‌ڕاوه‌كی نه‌ود، ئمجا هه‌ر له‌ هووكاره‌يل جيوازكردن بگر تا خه‌ت په‌يوه‌نديه‌يل و بنگه‌ی ته‌ندروسی و شوون ئسراحه‌تكردن گشت ئه‌يانه‌ بايه‌سه‌ موور ئاوايی وه‌پيانه‌و ديار بوود له‌يوا له‌ گه‌شتياره‌يل بكا وه‌خته‌يل خوه‌شيگ له‌تی بوونه‌ سه‌ر و ئه‌و ساته‌يله‌ فه‌رامووش نه‌كه‌ن ك له‌ی ئاوايی گه‌شتياريه‌ وه‌پيان به‌خشياگه‌و وه‌ڕاسی جوور ئاواييگ گه‌شتياری ته‌ماشای بكه‌ن ك تايبه‌تمه‌ندی خوه‌ی ديريدو ئاره‌زوو ئه‌وه‌ بكه‌ن له‌ ده‌رفه‌ت نزيكيگ دوباره‌ وه‌ل بريگ له‌ خيزانه‌يل تر سه‌ردانی بكه‌ن.

فريه‌يگ له‌ ئاوايه‌يل هه‌رێم كوردستان شوونه‌وار گه‌شتياری گرتنه‌سه‌ خوه‌يان و كاريگ له‌يوا نه‌كرياگه‌ قانجاز له‌ليان بكريه‌يد، ك دوينيم چه‌نه‌ها ئه‌شكه‌فت مه‌يلكيش هه‌ن ئيسه‌ گرينگی وه‌پيان نه‌درياگه‌و ڕی ئه‌رايان دروس نه‌كرياگه‌ تا مه‌ردم بتويه‌نيد بڕسنه‌ لای وه‌ ئاسانی.

له‌ی كوردستان خوه‌مانه‌ كانياو له‌يوا هه‌س ئاوه‌گه‌ی تاقيه‌و كرياگه‌و ده‌ركه‌فتگه‌ ك ئه‌را چاره‌سه‌ركردن نه‌خوه‌شيه‌يل پووس نه‌فداره‌و له‌ليانيش هه‌س ئه‌را چاره‌سه‌ر جوراوجوور وه‌ كه‌ڵكن، وه‌لی وه‌گووره‌ی خواست كار له‌بانيان نه‌كرياگه‌ جوور ئه‌وه‌ك وڵاته‌يل تر ديرنه‌ی و كردنه‌سه‌ی شوون مه‌يلكيش گه‌شتياره‌يل و ريكلام فريه‌يگ ئه‌رای كردنه‌و گشت هه‌وه‌جه‌يليگ ئه‌را ده‌سه‌وه‌ر كردنه‌و مه‌ردميش وه‌ مه‌رام چاره‌سه‌ر و ئسراحه‌ت له‌گشت لايگه‌و سه‌ردانيان ئه‌كه‌ن.

ئاوايه‌يليگ ديريم خه‌ريكن وه‌ كاره‌يل ده‌سچن و كشتوكاڵی و خوارده‌مه‌نی گشتجوور و مه‌ردمه‌گه‌يان ئه‌تويه‌نن خزمه‌ت وه‌ خوه‌يان و گه‌شتياره‌يل هه‌رێم بكه‌ن، وه‌لی جی داخه‌ مه‌ردمه‌گه‌يان روی كردنه‌سه‌ شار و شاروچكه‌يل و له‌يوا زانن ئه‌و شاره‌يله‌ گه‌نجينه‌ی ئه‌وان ها له‌تی و زوورميان له‌ شار نيشته‌جی بوينه‌و گه‌نجينه‌ی خوه‌يان له‌ زێدوماوای باوگ و باپيره‌يليان هيشتنه‌سه‌ جی.

ئمجا لايه‌ن په‌يوه‌نديدار با له‌يه‌ودويا باڵ له‌لی هه‌ڵماڵن و ئی ئاوايه‌يل هه‌رێمه‌ وه‌ گه‌شتياره‌يل ئاشنا بكه‌ن و كار خواست ئه‌نجام بيه‌ن ئه‌را سه‌ردان و مه‌ندنه‌وه‌ی گه‌شتياره‌يل ده‌ره‌كی و ناوخوه‌يی هه‌رێم تا كاريگه‌ری ته‌ماميگ داشتوون له‌بان زيايكردن داهات گه‌شت وگوزار و خاستركردن گوزران ئاواينشينه‌يل و زاڵبوين له‌بان قه‌ره‌باڵغی شاره‌يل ك كيشه‌ی فريه‌يگ دروس كردنه‌و گرانی روی له‌ شاره‌يل كردگه‌.

هه‌ر وه‌و خاتريشه‌ بايه‌سه‌ له‌بان حكوومه‌ت هه‌ر له‌ ئيسه‌و گرينگی ته‌ماميگ ئی مه‌سه‌له‌و له‌يوا بكا ك ئی ئاوايه‌يله‌ موور گه‌شتياری وه‌پيانه‌و ديار بوود تا وه‌ته‌مامی گه‌شه‌ بكه‌ن و له‌ ئاينده‌يش كه‌ڵك له‌ليان وه‌ربگيريه‌يدو بوونه‌ شوون مه‌يلكيشان گه‌شتياره‌يل و كاريگه‌رييش داشتوون له‌بان پيشكه‌فتن گه‌شت وگوزاری هه‌رێم كوردستان.

نه‌سره‌ت سابير خۆششناو

ج . أ